Read Yupik Esther 7 Bible Online

Esther 7 - Yupik bible

Esther 7

¹Tua-i angayuqaq Haman-aaq-llu neryarturtuk Esther-aamun

²aipirilutek. Wine-amek mer'inanermeggni angayuqam aptenqigtaa Esther-aaq, “Queen Esther, camek piyugcit? Qanrusnga tua-i piksagutarkaungavgu. Angayuqauvima avkengraaku cikirciqamken.”

³Queen Esther-aam kiugaa, “Canrilkekuvgu wangnek picalqukevkenii piyuuteka taitarkaukuvgu, wani-wa piyuuteka wiinga unguvayugyaaqlua yuunka-llu unguvasqelluki.

⁴Wiinga yuunka-llu tunumaukut tuqurqumaarkaurrluta. Pisten͞guluta tunumaarkaukumta nepaunii uitayartua qanrucarpek'nak-llu; tau͡gaam wani-wa nangluta tuqurqumaarkaurtukut.”

⁵Angayuqam Ahasuerus-aam Queen Esther-aaq aptaa, “Kina au͡gtaqevkenani tuatnayugta? Nauwa tauna angun?”

⁶Esther-aam kiugaa, “Inglukestevvut, nangcestevvut, uunguuq assiitellria yuk Haman-aaq!” Haman-aaq angayuqam queen-am-llu ciuqerragni uitauq alingqapiggluni.

⁷Angayuqaq qenerrluni nang'e'rtuq nerrlerminek naucetaarvigmun-llu anluni. Haman-aam nallunrilamiu angayuqamun anucimirqecetaararkaucini tamana pitekluku, anevkenani cakneq kaigavikaa Queen Esther-aaq unguvavkaasqelluni.

⁸Esther-aam aqumlleranun palurteqanrakun takumcuca'arluni angayuqaq itertuq naucetaarvigmek. Tangrramiu Haman-aaq angayuqaq qanpagtuq, “Enemni-llu-qaa uum tangvagtelluni queen-aq callugluku akusrarutekqataraa.” Angayuqaq tuaten qanran pistain Haman-aam qamiqurra caquat.

⁹Tua-i-llu iliit, Harbonah-mek at'lek qanertuq, “Haman-aaq pilillruuq yuum uyaqurrakun agarcissuutmek enemi elatiini Mordecai-aq, anirturtekellren tuavet agarrnaluku. Tauna-llu yuinaat pingayun akimiarmek cipluku it'ganernek qertutaluni.” Angayuqaq-llu picirkiriuq, “Tuavet Haman-aaq agarciu!”

¹⁰Haman-aaq tua-i agarcimallruuq piliaqevkallerminun Mordecai-am agarrvigkaanun. Tua-i nutaan tua-i angayuqaq qenertenrirtuq.