Read Yupik Esther 8 Bible Online

Esther 8 - Yupik bible

Esther 8

¹Tuani-llu ernermi Ahasuerus-aam cikiutekai tamalkuita Haman-aam aklui Esther-aamun. Esther-aam-llu angayuqaq qanrulluku Mordecai-aq tungelquqniluku. Tuakenirnek-llu Mordecai-aq it'langluni angayuqam ciuqerranun.

²Angayuqam kulutni takarnarqucirissuutelek Haman-aamek tegullni Mordecai-amun tunaa. Esther-aam-llu Mordecai-amun aulukevkarai Haman-aam aklui.

³Esther-aam angayuqaq qanrutenqigtaa ciuqerranun palurrluni qialuni tuaten. Kaigavikluku arulaircecesqelluku assiitellria Haman-aam picirkiurallra Jews-aanun.

⁴Angayuqam suulutaaq scepter-aani yagucaku Esther-aam tungminun nangerrluni qanertuq,

⁵“Piunakekuvgu ikayuryuumakuvnga-llu canrilkan-llu elpeni qanermek ayagcecikina Haman-aam alerquutellra atuugarkaunrirtelluku Jews-aat piunriumallerkaat nunani ataniumakevni.

⁶Umyuamkun nangteqciqngama yum'a tungelquma-llu piunriumallerkaat tekiskan.”

⁷Angayuqam Ahasuerus-aam qanrutak Esther-aankuk Mordecai-aq-llu, “Nallunritartek Haman-aaq agarcetellruaqa picirkiuryaaqellra Jews-aanun pitekluku, aklui-llu Esther-aamun piksagutelluki.

⁸Tau͡gaam picirkiuraq taqumaaqami angayuqam atrakun takarnarqucirissuutiinek-llu takarnarquciumalria cimirciigatuq. Tau͡gaam elpet igaryugngauten camek piyullerpenek; igaquvet igarniartuten atqa aturluku takarnarqucirissuutemnek-llu takarnarqucirluku.”

⁹Man'a tuaten pillruuq iralut pingayuat Sivan-aaq ernengqerluku yuinaq pingayunek cipluku. (23) Mordecai-am-llu angayuqam igartai taisqerraarluki qanllerminek igarcetai Jews-aanun, nunat-llu atanritnun, atanerruaritnun-llu nunat amllertalriit yuinaat arvinlegen malrunlegnek cipluku (127) India-mek ayagluki Sudan-aq tekilluku. Qaneryarallgutkenrilnguut qaneryaraitgun igaryaraicetun-llu pimalrianek.

¹⁰Mordecai-am-llu igaucetai Angayuqam Ahasuerus-aam atrakun takarnarqucirissuutmikun-llu takarnarqucirluki. Ayagalluki-llu tamakut igat horse-aatgun cukalriatgun angayuqam piikun.

¹¹Tamakutgun-llu igatgun Jews-aat qanrucimaluteng angayuqamun pisqen̄iluki Jews-aat nunani tamalkuitni quyurrluki ingluliurucuumasqelluki ingluit piunrirluki; tuqurqesqelluki-llu nangluki akluit-llu piksagulluki.

¹²Picirkiun-llu tamana aturyugngariarkauluni ernermi tuani Jews-aat piunriumallerkaatni, ernengkan qula pingayunek Adar-aq, iralut qula malrugnek cipyutiit.

¹³Picirkiutnguluni-llu qanrutkumaarkauluni nallunrirtelluki tamalkuitnun nunami tamaani, Jews-aanun upingaluki akinauryuumasqelluki inglukestait tauna erneq tekiskan.

¹⁴Tamakut-llu picirkiutem ayagacestekai angayuqam horse-aarinun cukalrianun ekluteng ayagtut cukatacirmegcetun elliin alerquuciatun. Tamana-llu picirkiun cali nallunrircecimaluni Susa-mi.

¹⁵Tua-llu Mordecai-aq an'uq ciuqerranek angayuqam takarnarqellrianek aturanek aturluni, qiuglinek qatellrianek-llu, ulikutarluni-llu qesuuramek 'lumarraqegtaarmek, tangnirqellriamek-llu suulutaamek nasqerruterluni. Susa-rmiut-llu cakneq angnirtut qayagpagaluteng nunaniryugluteng.

¹⁶Jews-aat-llu angnirtut nunaniryugluteng umyuarrlugcaranrirluteng, quyaluteng aviucimallerteng nalluvkenaku.

¹⁷Tamatum-llu nunam nunarpaini picirkiun tamana naaqumaaqan Jews-aat calillermeggnek arulairluteng nerevkarilartut angnirluteng. Kiituani-llu amlleret tamaani Jews-aarurtellrulliniut Jews-aat aliksagucamegteki.