Read Yupik Esther 9 Bible Online

Esther 9 - Yupik bible

Esther 9

¹Adar-aaq ernenguq qula pingayunek cipluku, picirkiutem tuani aturarkaullra tekilluni, tuani ernermi Jews-aat inglukestait neryuniullruut Jews-aat cirlaklerkameggnek. Tau͡gaam pailmun, Jews-aat ellaita inglukesteteng cirlakait.

²Jews-aat quyungqaviitni tamalkuitni nunarpagni angayuqam ataniumakaini Jews-aat quyurrluteng ingluliuryuumait tuqungnaqesteteng. Yuut-llu tamiini alingyagucamegteki ingluliurciigaliit.

³Kiituani atanerruat, nunam-llu atanrin, angayuqam-llu pistain ikayungait Jews-aat Mordecai-aq aliksagucamegteggu.

⁴Nunani tamiini nallunriamegteggu Mordecai-am pinilriarurucia piniriinaucia-llu angayuqam eniini.

⁵Taumek Jews-aat inglukesteteng umyugiurutkekait. Curugaqluki nuussirpagnek caskirluteng tuqurqelluki-llu.

⁶Tuani-llu nunarpagmi Susa-mi Jews-aat tuquciluteng tiissitsaam avganek (500) yugnek,

⁷Haman-aam-llu, Jews-aat inglukestiita, qulen qetunrai tapqulluki tamakunun tuqulluki, ukut wani-wa: Parshandatha, Dalphon, Aspatha, Poratha, Adalia, Aridatha, Parmashta, Arisai, Aridai, Vaizatha-llu. Tau͡gken uayaarilriartaitellruuq akluitnek.

¹¹Tuani-llu ernermi qanrutkait angayuqamun Susa-mi yuut tuqucimallret amllertaciit.

¹²Tua-llu angayuqaq qanertuq Esther-aamun, “Susa-qainarmi Jews-aat tuqucillruut tiissitsaam avganek (500) amllertalrianek yugnek Haman-aam qetunrai ilakluki. Qaillun-kiq pillruat nunani allani! Cali-qaa camek allamek piyuutengqertuten? Piyullren piksagutarkaugan. Qanrusnga camek cali allamek piyullerpenek, tua-i piksaguciiqan.”

¹³Esther-aam kiugaa, “Cangatenrilkan elpeni Jews-aat maani Susa-mi unuamek pillrat unuaqu cali pivkaqiu. Haman-aam-llu qetunrai agarrluki yugnek agarcissuutmun.”

¹⁴Angayuqaq alerquriuq tuaten pisqelluki, alerquutii-llu nallunrircecimaluni Susa-rmiuni. Haman-aam qulen qetunrain temait agartait yugnun tangertelluki.

¹⁵Erenrin-llu Adar-aam qula cetamaurteqerluki Jews-aat Susa-mi quyurrluteng ataam tuqurqiut yugnek amllertalrianek yuinarnek akimiarnek (300) tuani nunarpagni, tau͡gken cali uayaarilriartaunani akluitnek.

¹⁶Jews-aat-llu cali allani nunani uitalriit quyurrluteng akiurutut inglukesteteng tuquqluki yuinaat pingayun akimiarmek cipluku tiissitsaanek (75,000) tuquciluteng. Tau͡gken cali tamaani uayaarilriartaunani akluitnek.

¹⁷Adar-aaq ernengellrani qula pingayunek cipluku (13) tuani tuqurqillruut. Unuaquani-llu, qula cetamanek cipluku erenrani, arulaingqallruut angnirluteng-llu nunaniryugluteng nerevkarin aturluku tuani ernermi.

¹⁸Jews-aat tau͡gken Susa-mi uitalriit iralum erenrin akimiaratni (15) arulaingqallruut, tuqurqellruamegteki ingluteng iralum erenri qula pingayunek cipnengqerluku (13) unuaquani-llu erenret qula cetamanek cipnengluki (14), tuqurqillermeggnek-llu taqellruluteng erenret akimiaratni.

¹⁹Taumek Jews-aat nunarrarni uitalriit angniryaraqsagutellruat iraluq Adar-aaq ernengaqan qula cetamanek cipluku nerevkariyaraqluku payugutaarucaraqluku-llu ilameggnun neqkanek.

²⁰Mordecai-am makut piurallrit igauceqaarluki iganek ayagcecillruuq tamalkuitnun Jews-aanun, canimaarmi yaaqvani-llu uitalrianun tamiini Persia-mi,

²¹qanrulluki atulaasqellukek erenrek qula pingayunek cipluku cali-llu qula cetamanek cipluku Adar-aami allrakut tamalkuita.

²²Tua-i-wa taukugni erenregni Jews-aat tuqurqillruata inglukestemeggnek, angniiterpallermeggnek angnirillruata taukugni erenregni. Qanrucimaluteng erenrek taukuk angniryaraqesqellukek. Atulaasqellukek nerevkariluki payugtaarulluteng-llu neqkanek arrsaulriit-llu cali payugtaqluki.

²³Tua-i Jews-aat Mordecai-am alerquutai maliggluki tuaten pilallerkarteng allamiaqan ayagnillrulliniat.

²⁴Haman-aaq Agagite-aq, Hammadeth-aam qetunraa, Jews-aat tamarmeng inglukestiit, picirkiullruyaaquq Jews-aat piunrirnaluki, nall'arcetaarutkun-llu purim-aamek aterpagcimalriakun erneq tauna piunririllerkani nallunairluku.

²⁵Tau͡gaam Esther-aam angayuqaq ullallrua, ellii-llu angayuqaq igakun alerquiluni tamana Haman-aam assiitellria picirkiuraa elliinun tut'arkaurtelluku tua-i ellii qetunrai-llu agarcimallruut.

²⁶Taumek tamakut erenret angniryarait Purim-aamek acillrullinikait. Mordecai-am igallra tamalkuita-llu ellaita atulteng pitekluki,

²⁷Jews-aat picirkiullruut ellmeggnun, kinguvemeggnun, Jews-aarurtarkaulrianun-llu, piyarakegni allamiaqan ukuk erenrek aturturalaasqellukek angniryaraqlukek Mordecai-am alerquutekellruciatun.

²⁸Tuaten-llu piarkaurrluteng pillruut tamarmeng Jews-aat ilakuralriit kinguveteng-llu nunani tamalkuitni atulararkaulukek erenrek Purim-aam taqsuunateng ukanirpak.

²⁹Queen Esther-aaq-llu Abihail-am pania, Mordecai-acetun igarmillruuq ikayurluku, piyunarqucini aturluku, Purim-aam atullerkaanek ak'a Mordecai-am igautekellran.

³⁰Igaq-llu ciuniumaluni Jews-aanun tamalkuitnun ayuqelirraarluku-llu ayagtelluku yuinarnun arvinlegnun malrunlegnek cipluku (127) nunainun Persia-m. Jews-aat tuyurluki uitanqegcisqutmek

³¹alerqurluki-llu kinguvertuumaita atulaasqelluki Purim-aam erenri piyaraitni, alerquutengqerruciicetun aturarkameggnek yagyaranek tuquigaqata. Tamana tamarmek Mordecai-ankuk Queen Esther-aaq-llu alerquutekellruak.

³²Esther-aam alerquutii, asguranairluki picirkiutai Purim-aam, igausngallruut kalikarmi imegyarami.