Read Yupik Exodus 10 Bible Online

Exodus 10 - Yupik bible

Exodus 10

¹Tua-llu ATANEQ qanertuq Moses-aamun, “Ullaggu Pharaoh. Wiinga asvairutellruaqa atanerruari-llu makunek irr'inarqellrianek pinalua ellaitni.

²Cali-llu elpecen̄un qanrucugngarisqelluki irniaci tutgaraci-llu qaillun Egypt-aarmiunek cirlakillemnek cali-llu irr'inarqelrianek caliaqellemnek ellaitni. Tamarpeci elpeci nallunrirciqerci wiinga ATANRUCIQA.”

³Moses-aankuk tua-i ullagaak Pharaoh qanrulluku-llu, “ATANEQ, Agayutiit Hebrews-aat qanertuq, ‘Qaku elpenek pivakenriqatarcit ciuqamni? Yuunka ayagteski agayuniartut wangnun.

⁴Cali ayagcecuumiilkuvki yuunka unuaqu Petgertayulinek nunavnun taiciciqua.

⁵Nuna patuciqaat tangrruunrirtelluku; nerciqait-llu kavtiit piunrinritellrit napauteci-llu naumalriit tamaani.

⁶Ena uitaviin imirciqaat enait-llu cali pistevvet Egypt-aarmiut-llu. Arcaqalriaruciquq, ciuliaci-llu waten pilriamek tangeqsaitut yuurqaanermeggnek.’” Tua-i-llu Moses-aam tuiggluni Pharaoh unilluku.

⁷Tua-llu Pharaoh-m atanerruarin qanrutaat, “Qaillun taktalriamek uum yuum pinerrlugcetaarturqatartakut? Ataki Israel-aat ayagteski piicagviknauraat ATANEQ Agayutseng. Ayuqucingeksaitan-qaa cali Egypt-aam navguumallra?”

⁸Tua-i Moses-aankuk Aaron-aaq-llu ataam taitagket Pharaoh-mun elliin-llu qanrutak, “Ayagluci tua-i piicagyarturci ATANERMUN Agayutevcen̄un, tau͡gaam naliit yuut ayagciqat?”

⁹Moses-aam kiugaa, “Tamamta ayagciqukut mikelnguput ak'allaat-llu malikluki. Malikeciqaput qetunraput, paniput, qusngiput, qusngirngalnguput, kuluvaput-llu, nerevkarin aturciqngamteggu tuani ATANERMUN.”

¹⁰Egypt-aam angayuqra cali qanertuq, “Ukvernarcariunga elpecen̄un malikarkauvkarpek'naki arnaci irniaci-llu. Nallunaituq pillerkiurucirci ingluliurutnaluci.

¹¹Qang'a! Anguterrlainarni tau͡gaam ayagci piicagyarturluci ATANERMUN tuatnallerkarci piyuutekekuvciu.” Moses-aankuk-llu ayagcetagket Pharaoh-m ciuqerranek.

¹²Tua-llu ATANEQ qanertuq Moses-aamun, “Unateten nalugki quliinun Egypt-aam petgertayulit piniartut. Tailuteng nerniarait cat tamalkuita naumalriit kavcillrani uitaqallret.”

¹³Moses-aam tua-i nalugaa ayaruni, ATANREM-llu anuqengevkaraa calaramek nunamun ernerpak unugpak-llu, unuakuqerluku-llu nutaan anuqem tekiulluki petgertayulit.

¹⁴Petgertayulit-llu tuc'ameng misvikaat Egypt-aaq tamalkuan, anagulluteng amllerrameng ciungani tuaten pitaksaunateng tuaten-llu pitanqiggngaunateng.

¹⁵Patuani nuna tamalkurmi tunguriuq, nerait-llu naunraat tamalkuita kavtiim uitatellri napat-llu atsait. Cungagcetellriartairulluku napani naunrarni-llu Egypt-aam nuniini tamalkuan.

¹⁶Tua-llu Pharaoh-m cukangnaqluni Moses-aankuk taisqak qanerluni-llu, “Wiinga assiilngirtua ATANERMUN Agayutevtegnun elpetegnun-llu.

¹⁷Assiilngurmek au͡g'aritegnga ataucirqumek, piicaglutek-llu ATANERMUN Agayutmun au͡gaasqelluku man'a piunririlria anucimirqecetaarun wangnek.”

¹⁸Tua-i Moses-aam unilluku Pharaoh piicagtuq ATANERMUN.

¹⁹ATANREM-llu anuqa calaramek cimiraa tuknilriamek anuqmek kanavamek. Petgertayulit-llu tenglluki Suez-aam[6] kangiqutaanun, atauciunge'rmi uitaqerpek'nani Egypt-aami.

²⁰Tau͡gaam ATANREM Pharaoh umyugaakun asvairucetaa, Israel-aat-llu ayagcetevkenaki.

²¹ATANREM qanrutaa Moses-aaq, “Nalugki unateten qilatmun tan'gerem tan'gercetqapiggluni elpegnarqellriim Egypt-aam nunii patuniaraa.”

²²Moses-aam-llu unatni yagtai qilatmun, tan'geriluni-llu caknerpak tamalkuan Egypt-aami erenret pingayun aturluki.

²³Egypt-aarmiut-llu atunem tangrrutesciigaliut. Uitaluteng-llu eneni tarratesciiganateng ernerni pingayuni. Israel-aat tau͡gaam kiimi uitaviat tanqigcen̄ani.

²⁴Pharaoh-m Moses-aaq taisqelluku qanrutaa, “Ayagluci piicagyarturci ATANERMUN arnat irniaci-llu malikluki. Tau͡gaam qusngit, qusngirngalnguut, kuluviit-llu maavet unilluki.”

²⁵Moses-aam-llu kiugaa, “Tuaten pikumta elpet cikirarkaugarpekut ungungssiarnek tuqulluki ekuagiluta elliitekamten̄ek ATANERMUN Agayutemten̄un.

²⁶Qang'a, ungungssiuteput malikeciqaput, atauciungraan unicingaitukut. Wangkutnek cucuklirarkaungamta ungungssinek agayussuutekamten̄ek ATANERMUN Agayutemten̄un. Tuavet tekipailemta nalluamteggu ungungssit naliitnek ekuagicirkarput elliinun.”

²⁷ATANREM Pharaoh umyugaakun asvairucetaa ayagcecuumiinaki-llu.

²⁸Qanertuq-llu Pharaoh Moses-aamun, “Wangnek ayii! Wak'nirnek tangenqigcecaqunak wangnun! Taumi ernermi tangenqigeskumken tuquciquten!”

²⁹Moses-aam kiugaa, “Qanrucirpetun piarkauguq! Wiinga tangenqiggngaitamken!”