Read Yupik Exodus 12 Bible Online

Exodus 12 - Yupik bible

Exodus 12

¹ATANREM qanrutak Moses-aankuk Aaron-aaq-llu Egypt-aami:

²“Man'a iraluq ciuqliugarkauguq allrakumi elpecen̄un.

³Makunek ayuqucirtuqiki tamalkuita Israel-aat: mat'um-gguq erenrin qulngurutiitni atauciuqaqluteng angutet cucukliqilit qusngiyagarmek wall'u qusngirngalnguyagarmek enelgutni-llu pikameggnek.

⁴Ilakellriit ikgelkuneng, nangluku neresciigatarkaukunegteggu, elaqliteng-llu avegluku piniaraat yuut amllertaciat cuqluku, yuum-llu ataucim neqkanra cuqekluku.

⁵Cucuklirniartuci qusngimek wall'u qusngirngalngurmek, tau͡gaam angucaluugarkauluni ataucimek allrakurluni natlugnerunani-llu.

⁶Iralum erenrin akimiarunritariita atakuani tamarmeng Israel-aam yuin tuqutarkaugait ungungssit.

⁷Yuut ungungssim augan iliinek piluteng mingugniarait amiiget naparyait, amiiget-llu qulait, eneni ungungssimek nervigkameggni.

⁸Taumi unugmi kemget kelipiluki kenirraarluki nerniarait qatlinarqelrianek naunrarnek avuluki, kelipanek-llu quulecirailngurnek tapirluki.

⁹Neryaqunaciki ilait qassauluki wall'u qallaulluki, tau͡gaam tamalkuuciicetun kelipirraarluki, ilakluki qamiqurrit, iruit, iluita-llu cai.

¹⁰Ilakuiyaqunaci unuaqullranun. Ilakuartangqerqan unuaqullranun ekuakiciki.

¹¹Nerniartuci upingaluci, naqugngaluci, aluilitaci aturluki ayaruci-llu tegumiaqluki; cukangnaqluci nerniartuci. Man'a ATANREM Kituutekaa.

¹²“Tuani unugmi pekciiqngama tamalkuan nuniini Egypt-aam, tuquqluki angutet yung'eqarraarutet, yuungraata ungungssiungraata-llu, anucimirqecetaarluki tamalkuita agayutai Egypt-aam. Wiinga ATANRUUNGA.

¹³Auk nallunailkutaqeciqerci eneni uitavigpecen̄i. Wiinga auk tangrraqamku kitularciqamci cangerlagmun tuc'etevkenaci piunrirtekarpecen̄un anucimirqecetaallemni Egypt-aarmiut.

¹⁴Atulaqiciu una erneq agayumacirpecen̄un piciryaraqluku, nerevkariyaraqluku, umyuaqiyaraurrluku wiinga ATANEQ caliallemnun. Atulararkauluku taqsuunaku.”

¹⁵ATANEQ cali qanertuq, “Ernerni malrunlegni nerlarciquci quuleciraunrilngurnek kelipanek. Erenret-llu ciuqliatni anciiqaci nevcen̄ek quulecirat. Tua-i kina imna nerelria quuleciramek kelipamek erenret ukut malrunelgen iluatni, tauna ilaungairuciiquq yumnun.

¹⁶Erenret taukut ciuqliatni malrunelgatni-llu quyurrluci agayulaqici, caliksaunaci taukugni erenregni neqkiullerpeci avatiini.

¹⁷Atulaqiciu man'a piciryaraq, quuleciriyarailngurmek kelipartularvik, tua-i-wa tuani ernermi anutellruamci yuullgutkellriani Egypt-aamek. Taumek erneq una pinritevkenaku piciryaraqekiciu taqsuunaku ukanirpak.

¹⁸Iralut ciuqliatni atakuani akimiarunritariitni (14) erenrin, nerlarniartuci quuleciraunrilngurnek kelipanek, yaavet yuinaq ataucimek cipluku (21) ernengellran atakuanun.

¹⁹Ernerni malrunlegni eneci quulecirartangqerrngaituq. Kina imna ilasi wall'u tamakumiungurtelleq quuleciralegmek nerkuni yumnun ilaungairuciiquq.”

²⁰

²¹Moses-aam Israel-aat ciuliqagtait tamalkuita taisqai qanrulluki-llu, “Cucuklirluci tamarpeci ilakuralriit ataucimek angucalumek qusngiyagarmek, wall'u ayagyuamek qusngirngalngurmek, tuqulluku tauna Kituun aturniarci.

²²Avayaanek naunraam hyssop-aam tegulluci, akurqaarluku-llu qantamun augmek imalegmun minguglukek amiigem naparyak, amiigem-llu qulii. Kina-llu anngaunani tuaken enemek unuakuurrnatkaanun.

²³ATANEQ-llu pekeskuni Egypt-aakun tuqurqiluni, tangerciqaa auk naparyani amiiget-llu qulaitni. Tuqum-llu an'gilaa tuquciyartulria itercessngaitaa enevcen̄un.

²⁴Elpeci irniarpeci-llu niisngaarkaugait makut picirkat akwarpak.

²⁵Itquvci nunamun, ATANREM akqutkellranun elpecen̄un cikiutekciqniluku, man'a piciryaraq atulararkaugarci pinriteksaunaku.

²⁶Irniarpeci apeskaceci, ‘Cauga man'a piciryaraq?’

²⁷Waten kiukici, ‘Ungungssimek tuquciyarauguq Kituutem atullran nalliini, qigcikutnguluni ATANERMUN. Tua-i-wa kitullruaki Israel-aat enait Egypt-aami: Tuquqluki Egypt-aarmiut wangkuta tau͡gken pivkenata.’” Yuut-llu ciisqumiggluteng ciktaartut.

²⁸Israel-aam-llu yui tuaten pillruut, ATANREM alerqullruciatun Moses-aankuk Aaron-aaq-llu.

²⁹Unuum qukallrani ATANREM tuqutai tamalkuita tan'gaurluut yung'eqarraarutet, Pharaoh-m, atanruviim aqumllerani aqumgalriim, qetunraanek ayagluki, pinrilqerrunaki, itengqalriit tuaten qetunrait ilakluki. Ungungssit-llu cali angucalut irniqarraarutait tuqucimaluteng.

³⁰Tuani unugmi Pharaoh, atanerruat-llu, tamarmeng-llu Egypt-aarmiut tupagtut. Qialrianek-llu nep'nguq Egypt-aami tamalkuan, enet tamarmeng tuqumalriartangqerrameng.

³¹Tuani-llu unugmi Pharaoh-m Moses-aankuk taisqak qanrullukek-llu, “Ayagtek, Israel-aam-llu yui! Nunamnek ayagci. Ayagluci kevgiuryarturciu ATANEQ qanellrucirpetegtun.

³²Malikluki qusngiuceci, qusngirngalnguuceci', kuluvauceci-llu ayagci; wiinga-llu piicautniarpecia.”

³³Egypt-aarmiut-llu kiikiarait yuut patagmek unitesqelluku nunaseng, qanerluteng, “Tamamta tuquciqukut ayanrilkuvci.”

³⁴Tua-i yuut kelipissuuteteng imirait quulecirailngurnek urtanek aklunun-llu imgulluki atmagluki ayautait.

³⁵Israel-aam-llu yui pillruut Moses-aam qanellratun, kaigavikluki Egypt-aarmiut qerrirlinek suulutaanek-llu kenugutnek aturanek-llu.

³⁶ATANREM takaryagucetai Egypt-aarmiunun, cikirtelluki-llu kaigataitnek. Waten piluteng Israel-aat ayautait tukuutait Egypt-aarmiut.

³⁷Israel-aam yui piyualuteng ayagtut Rameses-aamek Sukkoth-aamun. Amllertaut waten angutet nallmegteggun, arnat mikelnguut-llu ilakevkenaki: tiissitsaam avga yuinaat-wa talliman tiissitsaat (600,000).

³⁸Allanek-llu amllernek yugnek ilangqertut, amllernek-llu qusnginek qusngirngalngurnek-llu, kuluviit-llu malikluki.

³⁹Kelipiut quuleciryarailngurnek kelipanek urtanek ayautellermeggnek Egypt-aamek, alqunaq tuaken ayagcecimallruameng neqkameggnek uptellerkaunateng, wall'u quuleciralegnek negtaaranek uptellruvkenateng.

⁴⁰Israel-aat Egypt-aami uitallruut allrakuni yuinaat yuinaq yuinaq-llu qulnek cipluku (430).

⁴¹Allrakut taukut erenrita nangneqliatni tamarmeng ATANREM yuin ilakutellriartain unitellruat Egypt-aaq.

⁴²Unuullruuq ATANREM murilkillra, anutnaluki Egypt-aamek. Tauna unuk allakaumauq ATANERMUN. Una-llu unuk alerquusngaluni Israel-aam yuinun akwarpak pegg'aryaraqesqelluku kinguverkaitnun-llu tamalkuitnun.

⁴³ATANREM qanrutak Moses-aankuk Aaron-aaq-llu, “Makut maa-i picirkiutekai Kituutem: Allanrulria nerngaituq Kituutem neqkaanek,

⁴⁴tau͡gaam teguaq kiputellerci neryugngaciquq, ciumek nuugirraaquvcen̄i.

⁴⁵Ak'anun nunavcen̄i uitangailnguq, wall'u akilirluku calilria nerngaituq.

⁴⁶Neqkat tuani enemi upcimalriit taumi enemi nerumaciqut, anucimaarkauvkenateng tuaken. Cali enri neqkarpeci ayemcimangaunateng.

⁴⁷Tamalkirrluteng Israel-aam yuin man'a piciryaraq atularciqaat.

⁴⁸Tau͡gaam nuugiumanrilnguq yuk nerngaituq. Allaneq upallrukuni nunavcen̄un ilalirluci-llu aturyugluku Kituun, nuugirraaqiciki tamalkuita angutet enelgutai ciumek. Nutaan tamakumiungulriatun ayuqliriciquq, ilaucugngariluni Kituun atuquvciu.

⁴⁹Picirkiutet-llu piugarkauluteng ayuqluteng, nutem Israel-aam yuinun allanernun-llu ilaksaguskevcen̄un.”

⁵⁰Tamarmeng Israel-aat maligtaat aturluku-llu ATANREM pisqutkellra Moses-aankugnun Aaron-aaq-llu.

⁵¹Taumi ernermi, ATANREM Israel-aam yuin ilakutellriartai, anutellrui Egypt-aamek.