Read Yupik Exodus 13 Bible Online

Exodus 13 - Yupik bible

Exodus 13

¹ATANEQ qanertuq Moses-aamun,

²“Allakarciki tamalkuita yung'eqarraarutet tan'gaurluut wangnun, tua-i-wa yung'eqarraarutet tan'gaurluut Israel-aat cali-llu angucalut irniqarraarutait ungungssit wiinga pikngamki.”

³Moses-aaq qanertuq yugnun, “Umyuaqelaqiciu man'a erneq anllerci Egypt-aamek teguaruvillerpecen̄ek. Mat'umi ernermi ATANREM anutellruaci angelriakun pinimikun quuleciramek kelipamek ner'arkaunrituci.

⁴Mat'umi ernermi Egypt-aaq unitarci ciuqlirmi iralumi Abib-aam iraluani.

⁵ATANREM piciuluni akqellrui ciuliaci cikirciqniluki nuniitnek Canaan-aarmiut, Hittite-at, Amorite-at, Hivite-at Jebusite-at-llu. Tamaavet tekiuskaci enuqitnailngurmun naungignarqellriamun nunamun man'a aturarkaugarci nerevkariyaraq ciuqlirmi iralumi allrakut tamalkuita.

⁶Malrunlegni ernerni nerlararkauguci quuleciriyarailngurnek kelipanek, erenret-llu malrunelgatni nerevkariluci ATANEQ umyuaqluku.

⁷Ernerni-llu malrunlegni nerlaryaqunaci kelipanek quuleciranek. Quulecirarkamek, wall'u quuleciranek kelipanek pitangqerrngaituq nunavcen̄i tamalkuan.

⁸Man'a ayagni'rqan yuc'i qanrutaqluki taringevkarluki: waten pilarniluci umyuaqluku ATANREM elpecen̄un pillra Egypt-aaq unitellerpecen̄i.

⁹Mat'um atullra umyuaqutnguarkauguq catun unatevcen̄un qillrusngalriatun wall'u qaurarpecen̄un. Neq'akiyarauluni egmircimallerkaanek elitnaurumallerkaanek-llu ATANREM Alerquutiinek. Tua-i-wa ATANREM anutellruaci Egypt-aamek angelriakun pinimikun.

¹⁰Atularniarci nerevkariyaraq piyaraan nalliini allrakuaqan.

¹¹“ATANREM itruskaci nuniitnun Canaan-aarmiut, ukvernarcariluni akqutkellerminun elpecen̄un ciuliarpecen̄un-llu, elpecen̄un cikiutekekaku,

¹²elliitekarkaugaci tamalkuita yung'eqarraarutet tan'gaurluut ATANERMUN. Irniqarraarutait-llu angucalut ungungssirpeci ATANREM pikai.

¹³Irniqarraarutait ciulviit ataam elliinek kiputarkaugaci naverrluki qusngiyagarmek, tau͡gken ataam kipucuumiilkuvciu uyaqurri ayemn̄iaci. Ataam-llu kiputarkaugaci tamalkuita angutet yung'eqarraaruceci.

¹⁴Mat'um kinguani, qetunrarpeci apeskaci, mat'um atullran caucianek kiulaqiciki, ‘Angelria pinini aturluku ATANREM anutellruakut Egypt-aamek tuani teguarullemten̄ek.

¹⁵Pharaoh asvailtaallrani ayagcecuumiinata ATANREM tuqutellrui tamalkuita yuut ungungssit-llu yung'eqarraarutait tan'gaurluut. Tauna pitekluku tuqutelaraput elliitekluki ATANERMUN irniqarraarutait angucalut ungungssit, tau͡gaam ataam utertelluki yung'eqarraarutet tan'gaurluut.

¹⁶Mat'um atullra umyuaqutnguciquq catun qillengqalriatun unatemten̄un wall'u qauramten̄un; watnallemteggun-wa umyuaqerkauluku ATANREM anucillra wangkutnek Egypt-aamek angelriakun pinimikun.’”

¹⁷Pharaoh-m ayagcecaki yuut Agayutem ayautenritai tumyarakun cen̄akuiryarakun Philistia-mun, tamaaggun canimellrungraan. Waten Agayun umyuarteqngami, “Yuut umyuarteng cimiryuaraat uterrluteng-llu ataam Egypt-aamun tangerqunegteggu anguyagarkaucirteng.”

¹⁸Tua-i ayautai uivulluki yuilqukun Red Sea-m[7] tungiikun. Israel-aam yui anellruut Egypt-aamek anguyallerkameggnun upingaluteng.

¹⁹Moses-aam, Joseph-aam temii malikellrua. Joseph-aam-wa Israel-aam yui akqivkallruateng qanerluni, “Agayutem anirtuqaci temka ayauskiciu maaken.”

²⁰Israel-aat unitaat Sukkoth-aaq qavartarluteng-llu Etham-aami, qau͡gyarrlainaam yuilqum engeliini.

²¹Erenrani ATANEQ ayalartuq ciunratgun napalriakun amirlukun aperturluku tumkaat, unugmi-llu ciunratgun ayagaqluni napalriakun kenerkun tanqiggluki, tua-i pekcugngavkarluki unugmi erenrani-llu.

²²Napalria amirluq ciunratneterrlainarluni erenrani napalria-llu keneq unugmi.