Read Yupik Exodus 15 Bible Online

Exodus 15 - Yupik bible

Exodus 15

¹Tua-llu Moses-aam Israel-aat-llu yuarun man'a aturaat ATANERMUN: “Aturciqua ATANERMUN, tua-i-wa ucurnarqellriakun cirlakian; egtellrui elussitat yugtuumaita imarpigmun.

²ATANEQ pinilria akiurucestekaqa; anirturtekelqa elliinguuq. Agayutkaqa nanrarciqaqa-llu, atama Agayutii, yuarutkeciqaqa angelriarucia.

³ATANEQ anguyagten͞guuq; ATANEQ elliin atqaa.

⁴“Elliin egtai Egypt-aam anguyagtai pekcessuutai-llu imarpigmun; atanerruari-llu avurat qecuqitut imarpigmi Red Sea-mi.

⁵Et'ulriim imarpiim patui; kill'uteng-llu teggalqutun terr'anun.

⁶“Tallirpilirneren, ATANEQ, ucurnarqellriamek piningqertuq, piunrirai ciqumlluki inglukesteput.

⁷Angtaciakun ucurnarqucirpet cirlakaten inglukesteten; eq'uqrucavki ekuavkaraten carangllugtun.

⁸Cupngavni meq quyurtuq quyigiluni; qacarnertun ayuqliriluni; imarpiim et'uqra tegg'iluni.

⁹Inglukestiit qanertuq, ‘Kingunrirturciqanka anguluki-llu; avverqeciqanka akluit tegullua-llu piyugtacimtun; nuussirpaglua wiinga uayarciqanka.’

¹⁰Tau͡gaam cupngavteng, ATANEQ, Egypt-aarmiut qecuqitut; kill'uteng kic'aqutatun alingnarqellriamun mermun.

¹¹“ATANEQ, kina agayutni elpetun ayuqa? Kina elpetun ayuqa tanqiullermikun ucurnaqluni? Kina caliyugngaa irr'inarqellrianek angelrianek-llu calianek elpetun?

¹²Tallirpilirneren yagtellerpeni nunam igellrui inglukesteput.

¹³Akqillren aturluku ciuliqagtellruaten yuut anirtulten; pinirpegun-llu ciuliqagtellruluki tanqilriamun uitavigpenun.

¹⁴Nunat niicameng kakavut alingluteng; Philistine-at-llu alingem tull'uki.

¹⁵Ciuliqagtai Edom-aam nanikuagut; Moab-ami-llu yui pinilriit uulegtut; Canaan-aam-llu yui caperrsunga'arrluteng.

¹⁶Alinga civuura-llu tut'uq ellaitnun. Tangrraat pinin elpet, ATANEQ, nangerngaluteng-llu casciiganateng alingem ugaani, yugpet, angitellerpet teguarullratnek, kiturnatkaatnun.

¹⁷Yut'en itrutellruaten nunalgarrluki-llu ingrirpenun, elpet, ATANEQ, cucukellerpenun nunaknaluku, Agayuvigmun elpet piliaqellerpenun.

¹⁸Elpet, ATANEQ, atanruarkauguten akwarpak akwanun.”

¹⁹Israel-aat piyuallruut kinertellriakun nunakun imarpigmi. Tau͡gaam Egypt-aarmiut pekcessuutait horse-aarit-llu yugtuumarmeng ekellratni imarpigmun, ATANREM meq utercetellrua patuluki.

²⁰Prophet-aam Miriam-aam, Aaron-aam alqaan, aturcetaani tegua, tamarmeng-llu arnat maligtaat aturcetaarluteng yurarluteng tuaten.

²¹Waten Miriam-aam atuutai: “Aturci ATANERMUN, tua-i-wa ucurnarqellriakun anagivkarillruan; egtellruaki-llu elussitat yugtuumaita imarpigmun.”

²²Tua-llu Moses-aam ciuliqagtai Israel-aam yui, unilluku imarpik Red Sea-q, ayagluteng-llu yuilqurranun Shur-am. Pingayun erenret aturluki ayagtut yuilqukun mermek nataquteksaunateng.

²³Tua-llu tekitut nunamun at'legmun Marah-mek, tau͡gaam tuani meq qatlinarqessiyaagan ellaita merciigataat. Tauna pitekluku acillruat Marah-mek.[8]

²⁴Yuut-llu qanemyuugartut Moses-aamun apluku-llu, “Camek merciqseta?”

²⁵Tua-i Moses-aaq piicagtuq cumiggluni ATANERMUN, ATANREM-llu tangercetaa muraggarmek. Tauna mermun egtaa; meq-llu miy'unariluni. Tuani ATANREM cikirai alerquutnek yuutekaitnek, tuani-llu cali elliin naspaagai,

²⁶qanerluni, “Niisngakuvciu ATANEQ Agayutsi, elluarrluci yuuluci tangvallrani, alerquutai-llu tamalkuita aturluki, naulluutet Egypt-aarmiunun tuc'etellrenka elpecen̄un pivkarngaitanka; tua-i-wa wiinga Atanruama canrircetaqluci.”

²⁷Tua-i-llu Elim-aamun tekitut. Tuani qula malrugnek cipluku mermek ulvelriartangqertuq yuinaat-llu pingayun qulnek cipluku (70) palm-anek avayarpalegnek napanek. Tuani qavartartut mer'em canianun.