Read Yupik Exodus 16 Bible Online

Exodus 16 - Yupik bible

Exodus 16

¹Tamarmeng Israel-aat ayagtut Elim-aamek. Erenret-llu akimiaratni, iralum tungliani Egypt-aamek ayallermeng kinguani, tekitut yuilqurranun Sin-am. Tauna akuliignetuq Elim-aankuk Sinai-aq-llu.

²Tamaani yuilqumi tamarmeng qanemyuugartut Moses-aamun Aaron-aamun-llu,

³qanerluteng, “Tuqutellrunrilkiikut-llam ATANREM Egypt-aami, neqkalirluta assirluta nerlallemten̄i; elpetek ayautarpecikut maavet yuilqumun paluluta tuqusqelluta.”

⁴Tua-llu ATANEQ qanertuq Moses-aamun, “Ellallirceciiqaqa neqkanek qilagmek pikarpecen̄ek, yuut avuryartularniartut ernerpak pikanermeggnek unuaquaqan. Maaggun naspaamaciqut alerquutenka aturluki ilumun piarkauciat.

⁵Erenret arvinelgatni avularniartut erenregni malrugni pikanrulriamek.”

⁶Tua-i Moses-aankuk qanrutakek tamalkuita Israel-aam yui, “Ataku nallunrirciqerci ATANERMUN anutellrucirci Egypt-aamek.

⁷Unuakumi-llu tangerciqerci ucurnarqucia ATANREM. Elliin niitaa qanemyuugautsi ellminun. Ilumun elliinun tau͡gaam qanemyuugartuci, wangkuk elliinun pisteqainaugukuk.”

⁸Cali Moses-aaq qanertuq, “ATANREM cikiraaci kemegturkarpecen̄ek atakumi, kelipanek-llu piyugtacirpecetun unuakumi, tua-i-wa niitellruamici qanemyuugallerpecen̄i ellminun. Wangkuk qanemyuugautenritarpecikuk ATANEQ tau͡gaam.”

⁹Moses-aam Aaron-aaq qanrutaa, “Tamalkuita yuut qanruski tailuki ATANREM ciuqerranun nangercesqelluki, tua-i-wa elliin niitellruaki qanemyuugautait.”

¹⁰Aaron-aam qalarusnginanrani yuut, takuyallermeggni yuilqum tungiinun, alqunaq ATANREM ucurnarqucia alairtuq amirlumi.

¹¹ATANEQ-llu qanertuq Moses-aamun,

¹²“Niitaqa qanemyuugallrat Israel-aat. Qanruski atakuarqan kemegnek nerciqniluki, unuakumi-llu kelipanek piyugtacimegcetun cali. Nutaan-llu nallunrirciqerci wiinga ATANRUCIQA elpeci Agayutsi.”

¹³Atakuan egtuugugaat tengaurluteng tekitut uitaviat patuyuumaluku unuakumi-llu yukutartuq avatiit tamarmi.

¹⁴Yukutaq-llu kinran, tamarmi yuilqum qainga pitanguq cayagarnek mamkunateng, kanertun ayuqluteng.

¹⁵Israel-aat tangrramegteggu cauciitaat, apqaurulluteng-llu, “Cauga?” Moses-aaq-llu qanertuq, “Man'a neqkauguq ATANREM elpecen̄un cikiutekellra neresqelluku.

¹⁶Waten ATANREM alerquraaci: tamarpeci avuusqelluci tamakunek pikanerpecen̄ek, yuk atauciq saskat pingayunelgen imarkanritnek pikirturluku.”

¹⁷Tua-i Israel-aat tuaten piut, ilaita avuqengait amllenruluteng ilaita-llu ikgellruluteng.

¹⁸Cuqtellratni amllellriamek avullret pivallanritut ikgellrulriamek-llu avullret pimyaagpek'nateng, tamarmeng avuameng pikanemeggnek.

¹⁹Moses-aam qanrutai, “Ilakuiyaqunaci unuaqu pikarpecen̄ek.”

²⁰Tau͡gaam ilaita niitenritaat Moses-aaq, ilakuiluteng unuakutarkameggnek. Aninqellrit-llu paralqallinii tep'ngarrluteng-llu. Taumek Moses-aam tuaten pillret qenruskai.

²¹Unuaquaqan tamarmeng avulartut piyugtacimegcetun, akerta puqlangaqan ilakuarit urugaqluki.

²²Erenret arvinelgatni avurtut erenregni malrugni neqkanmeggnek, akimiaq ataucimek cipluku saskat imarkanritnek atauciq yuk pikirturluku. Tamarmeng yuut ciulirnerita ullagluku qanrucatni mat'umek Moses-aaq,

²³elliin qanrutai, “Waten ATANEQ alerquillruuq, ‘Unuaqu tanqilriaruuq erneq mernuinercillerkaq, tanqilria agayuneq allakaumalria ATANERMUN. Uucici unuamek camek uucullerpecen̄ek, qallauciluci-llu canek qallaucullerpecen̄ek. Ilakuat tamalkuita aninqen̄iaci unuaqu pikauluki.’”

²⁴Moses-aam picirkillruciatun ilakuateng qelkait unuaqullranun. Assiirutevkenateng-llu paralurpek'naki-llu.

²⁵Moses-aaq qanertuq, “Nericiki makut unuamek, tua-i-wa unuamek Sabbath-aaruan, uitayaraq ATANERMUN allakaumaluni mernuinercirvigkauluni. Unuamek nunam qainga tamakunek pitangqerrngaituq.

²⁶Ernerni arvinlegni avularciquci neqkarpecen̄ek; tau͡gaam erenret malrunelgatni uitayaraungan pitangqerrngaituq.”

²⁷Erenret malrunelgatni, yuut ilait anluteng neqkanek yuaryaaqut tau͡gaam nataqutevkenateng.

²⁸ATANEQ-llu qanertuq Moses-aamun, “Qaillun pitalriamek alerquutenka aturyuumiiteqatarceciki?

²⁹Umyuaqiciu, wii ATANEQ, cikillruamci ernermek mernuinercirvigkamek, taumek erenret arvinelgatni cikilarciqamci neqkanrulrianek erenregni malrugni. Tamarpeci uitaurqici uitavigpecen̄i erenret malrunelgatni.”

³⁰Tua-i yuut mernuinercilartut erenret malrunelgatni.

³¹Israel-aam-llu yuin tamana neqkaq aciraat manna-mek. Naucetaarkatun qatellriatun ayuqluni nerellra-llu ayuqluni mamkilngurtun cake-aatun evegtaat neqkautiitnek avuluku uucimalriatun.

³²Moses-aaq qanertuq, “ATANREM waten picirkillruakut: Aninqisqelluta manna-mek kinguvemta pikaatnek, ellaitnun tangrresqelluku neqkaq wangkutnun cikiutekellra neresqelluku yuilqumi, anutellermini wangkuta Egypt-aamek.”

³³Moses-aam-llu qanrutaa Aaron-aaq, “Putiilekaamek piluten pingayunelgen saskat imarkanratnek manna-mek ek'iniartuten tuavet. Elliluku-llu ATANREM ciuqerranun. Tauna avaliquralarniaraat kinguverpeci.”

³⁴ATANREM picirkillruciatun Moses-aaq, Aaron-aam ellia manuanun Akqutem Yaassiigan, uitaurallerkaanun.

³⁵Israel-aat-llu nerlartut kelipayagarnek allrakut yuinaak malruk (40) aturlukek, Canaan-aamun nunalgartellerteng tekilluku.

³⁶Kinertellrianek cuqciyaraq tuani atullrat pitauq yuinaat cuqneret (20 quarts).