Read Yupik Exodus 17 Bible Online

Exodus 17 - Yupik bible

Exodus 17

¹Israel-aat tamarmeng unitaat Sin-am yuilqurtaa nugtartaarluteng-llu ATANREM picirkiuciatun. Arulairtut-llu Rephidim-aamun, tau͡gaam tauna mertaunani.

²Tuani yuut qanemyuugarluteng Moses-aamun qanertut, “Merr'iskut.” Moses-aam-llu qanrutai, “Ciin qanemyuugarceci wangnun? Ciin ATANEQ naspaaceciu?”

³Tau͡gaam yuut meqsuameng qanemyuugartu'rtut Moses-aamun qanerluteng, “Ciin anucikut Egypt-aamek quligtelluta tuquvkaryarturluta irniaput-llu ungungssiput-llu?”

⁴Moses-aaq-llu cumiggluni piicagtuq ATANERMUN, “Qaillun piciqsia ukut yuut, teggalqunek miluquniararaatnga?”

⁵ATANREM qanrutaa Moses-aaq, “Ciuliqagtaita ilait malikluki ciunratgun ayagci, ayarun kaugturcuutekellren Nile-amun ang'aqluku.

⁶Nangengqaciqua ciunerpecen̄i Ingrimi Sinai-ami; teggalquq kaugtuquvni mermek maqciquq yuut merkaatnek.” Moses-aaq-llu tuaten pillruuq takuatni Israel-aam yuin ciuliqagtaita.

⁷Tauna-llu aciraat Massah-mek Meribah-mek-llu,[9] tua-i-wa Israel-aat qanemyuugarluteng ATANEQ naspaallruatgu qanerluteng, “Atanrem-qaa nayuraakut wall'u-qaa nayunritaakut?”

⁸Tua-llu Amalekite-at tekilluteng anguyagait Israel-aat Rephidim-aami.

⁹Moses-aam-llu Joshua qanrutaa, “Angutet ilaitnek cucuklirluten anguyagyartuqiciki unuaqu. Nangengqaciqua kangrani ingrim tegumiaqluku ayaruq Agayutem tegumiaqesqellra.”

¹⁰Joshua-llu Moses-aam pisquciatun piuq callugluki Amalekite-at, Moses-aaq, Aaron-aaq, Hur-aq-llu mayullratni pengum kangranun.

¹¹Moses-aam tallini naluumaaqaku Israel-aat piningqelartut, tallini tau͡gken atrartaqaku Amalekite-at piniraqluteng.

¹²Moses-aam-llu tallik mernungagnek Aaron-aankuk Hur-aq-llu teggalqumek taituk aqumvigkaanek, avategkenun-llu pilutek Moses-aam tallik naluumaakek pektairlukek akertem tevirnatkaanun.

¹³Waten piluteng Joshua-m cirlakai Amalekite-at.

¹⁴Tua-llu ATANEQ Moses-aamun qanertuq, “Igausgu man'a cirlakillerci umyuaqumaniartuq. Qanrutekluku-llu Joshua-mun Amalekite-at wangnun nangluki piunrirciqniluki umyuaqumanqiggngairutelluki.”

¹⁵Moses-aaq-llu ekuaviliuq acirluku-llu “ATANEQ nallunailkutaqaqa.”

¹⁶Qanerluni-llu, “Nalugluku qulvanun ATANREM nallunailkutaa! ATANREM callugturciqai Amalekite-at akwarpak.”