Read Yupik Exodus 18 Bible Online

Exodus 18 - Yupik bible

Exodus 18

¹Moses-aam cakian Jethro-m, Midian-aam agayulirtiin, niitai tamalkuita Agayutem pillri Moses-aamun Israel-aam-llu yuinun anutellermini Egypt-aamek.

²Moses-aaq-llu ullagaa, malikluku nulirra Zipporah, tamaavet unitellra,

³qetunraak-llu malruk, aipaa aterluni Gershom-aamek, qanellruami, “Allanrullruunga nunami nunakumanrilngurmi.”[10]

⁴Qanertuq-llu, “Atama Agayutiin ikayullruanga anirturlua-llu tuqutauyallemnek angayuqrakun Egypt-aam”; taumek aciraa aipaa Eliezer-aamek.[11]

⁵Jethro taiguq malikluku Moses-aam nulirra, qetunraak-llu malruk, qavartaumallratnun tanqilriami ingrimi.

⁶Iliita-llu Moses-aaq qanrutaa, “Cakin Jethro agiirtuq maligluni nuliarpenek qetunraagpenek-llu.”

⁷Moses-aam-llu cakini pairrsaagaa ciuqerranun-llu pull'uni, cingarluku-llu. Atunem-llu apqaurullutek qaillun ayuqucirmegnek. Moses-aam-llu pelatekaanun iterlutek.

⁸Moses-aam-llu Jethro-mun qanemcikai cat tamalkuita ATANREM pillri Pharaoh-mun yuinun-llu Egypt-aam, Israel-aam yui anirtuumallerkaat pitekluku. Qanrutaa-llu yuut cakviulallratnek tumemeggni qaillun-llu ATANERMUN anirtulallratnek.

⁹Jethro-m makut niicamiki angnirtuq,

¹⁰qanerluni-llu, “Nanraumali ATANEQ anirturtekellren Pharaoh-mek yuinek-llu Egypt-aam! Nanraumali ATANEQ anirtullruaki yun'i teguarullratnek.

¹¹Watua nallunriraqa ATANREM angenrucia tamalkuitni agayutni, tua-i-wa yuut anirtullruaki Egypt-aarmiutgun caunrilkumallratnek.”

¹²Tua-llu Jethro taituq tamalkuuluki ekuagarkanek Agayutmun; Aaron-aam tamarmeng-llu ciuliqagtaita Israel-aat maligtaat nerellgucirnaluku Moses-aam cakia Agayutem ciuqerrani.

¹³Unuaquan Moses-aaq arenqigciuq piyunailliqutaitnek yuut ellmeggnun, yagarcetevkaraat-llu yuut unuakumek ayagluku atakullranun.

¹⁴Jethro-m tangrramiki Moses-aam caarkai aptaa, “Ciin waten caliaqsiki ukut yuut? Ciin kiivet calisit yugnun yagarcetevkarluten unuakumek ayagluten atakuq tekilluku?”

¹⁵Moses-aam kiugaa, “Tua-i-wa yuut tailaata nallunrirnaluteng Agayutem piyullranek.

¹⁶Piyunailliqutelgek tailartuk wangnun, wiinga-llu cuqtelaragka nallunrirtellukek-llu Agayutem picirkiutainek alerquutainek-llu.”

¹⁷Jethro-llu qanertuq, “Man'a elluarrluku caliaqenritan.

¹⁸Elpenek nangciiquten yuut-llu tapqulluki. Arturnarquq man'a elpenun kiimenak.

¹⁹Niicugniqernga assilriamek ayuqucirturnaamken Agayutem-llu nayurciqaaten. Atawauyaaquq cingilgullren yugnun Agayutmun, arenqiallugutait ullautaqluki elliinun.

²⁰Elitnauyunarqaten Agayutem alerquutainek nalqigulluki-llu qaillun ayuqucirkaatnek, qaillun-llu pillerkaatnek.

²¹Cali tau͡gaam cucuklirniartuten piyugngalrianek angutnek, qigcikestainek Agayutem pengegnailngurnek iqlutuunrilngurnek; ciuliqaggniarait tiissitsaaruqa'aqluki (1,000), yuinaq tallimauqaqluki (100), yuinaak malruk qulnek ciptaqluki (50), qulnguqa'aqluki-llu.

²²Cuqcisten͞guniartut yugnek cimiqetaarpek'nateng. Arturnarqellriit tau͡gaam elpenun taitaqluki, tau͡gaam ellaita ellmeggnek artunrilketeng arenqiallugutait yuut arenqigtaqluki. Tuaten pikuvet qaciglikanirciquten caliarkarpet ilait caliaqelangekatki.

²³Waten pikuvet, Agayutem alerquutiinek, elpenek navgurngaituten, yuut-llu makut utertelarniartut umyuamegteggun uitanqegciluteng.”

²⁴Moses-aam tua-i cakimi qanellra niilluku tuaten piuq.

²⁵Cucukiluni-llu piyugngalrianek angutnek Israel-aam yuin ilaitnek, ciulirnerurrluki yugnun, atanirturilriarurtelluki tiissitsaanun, yuinarnun tallimanun, yuinaak malruk qulnek ciplukek, qulnun-llu.

²⁶Caliut-llu cucukellri cuqcisten͞guluteng yugnun, cimiqetaararkauvkenateng, artuqteng taitaqluki Moses-aamun, arturnailnguut ellmeggnek piaqluki.

²⁷Moses-aam-llu cakini Jethro ayagcetaa, tauna-llu ayiimi nakmiin nunaminun ayagluni.