Read Yupik Exodus 2 Bible Online

Exodus 2 - Yupik bible

Exodus 2

¹Uum nalliini angun Levi-am ilakutain iliit nulirturtuq Levi-am cali kinguvranek.

²Arnaq-llu qingartuq qetunrangluni-llu. Tangrramiu-llu kenegnartacia iirumaa iraluni pingayuni.

³Tau͡gaam iirumasciigaliamiu kelugkarrlugnek tegulluni tupigluki assigtaliuq, taarmek-llu mingugluku imangarkaunrirluku. Mikelnguq-llu ekraarluku can'get acetulriit kuigem cen̄iini akuliitnun ellia.

⁴Taum-llu mikelnguum alqaa nangengqauq yaaqvaarni tangvagluku qaillun pillerkaa.

⁵Tua-llu Pharaoh-m pania atrartuq kuigmun ervuqeryarturluni, pisten̄i-llu cen̄akun piyuanginanratni Piqerluni tangertuq assigtamek can'get acetulriit akuliitni, pistem̄inun-llu arnamun aqvavkarluku.

⁶Pharaoh-m panian ikircamiu tangrraa mikelnguq tan'gaurluq qialuni. Takumcukluku-llu qanertuq, “Una Hebrews-aat mikelnguita ilakelliniat.”

⁷Tua-llu mikelnguum alqaan Pharaoh-m pania aptaa, “Ataki arnamek Hebrew-mek aqvallii aamarrluku anglicaritestekarpenek.”

⁸Tua-i Pharaoh-m panian kiugaa, “Kitaki tuaten pii.” Tua-i-llu nasaurluq ayagluni mikelnguum nakmiin aanii aqvaluku.

⁹Egypt-aarmiut angayuqrata panian arnaq qanrutaa, “Teguluku una aamarrluku anglicarru akilirciqamken.” Tua-i taum arnam mikelnguq teguluku anglicaraa.

¹⁰Mikelnguq-llu anglirian Pharaoh-m panianun ayautaa. Taum-llu yukliutaa qetunraqsagulluku acirluku-llu Moses-aamek, qanerluni, “Mermek tegullruamku aciraqa Moses-aamek.”[1]

¹¹Moses-aaq-llu tua-i angliriami ayagtuq nunalluki nakmiin ilani Hebrews-aat, tangerrluku-llu qaillun calirpagcecimaciat. Tangertuq-llu Egypt-aarmiumek tuqucilriamek Hebrews-aat iliitnek, Moses-aam-wa nakmiin yuin iliitnek.

¹²Moses-aam avatni kiarqaarluku tangvagtailami kitumek tuqutaa Egypt-aarmiu, temii-llu qau͡gyamun iirluku.

¹³Unuaquan utertellermini tangertuq malrugnek Hebrews-aagnek callulriignek. Qanertuq-llu ayagnercillermun, “Ciin tengluarciu Hebrews-aarullguten?”

¹⁴Angun-llu kiuguq, “Kia atanrurtaten cuqcisten͞gurrluten-llu wangkutnun? Tuquteqatararpenga-llu-qaa wiinga Egypt-aarmiu tuqutellrucirpetun?” Moses-aaq-llu alingalliimi umyuartequq, “Yuut taringellrulliniat qaillun pilqa.”

¹⁵Pharaoh-m-llu tamana niicamiu Moses-aaq tuquituraa, tau͡gaam Moses-aaq qimagtuq ayagluni-llu Midian-aam nuniini uitayarturluni. Erenret iliitni, Moses-aaq aqumgainanrani elakam caniani, Midian-aam agayulirtiin, Jethro-m, panii malrunelgen taigut mermek-llu imirluki ungungssit merviit atameng tamakut ungungssiutai mercetnaluki.

¹⁷Tau͡gaam qusngiliurtet tailuteng ayagcetait Jethro-m panii. Tua-i Moses-aam nangerrluni ikayurai mertelluki-llu katngautait.

¹⁸Utercata atiita aptai, “Ciin unuamek uterteqanqegpakarceci?”

¹⁹Taukut-llu kiugaat, “Egypt-aarmium ikayullruakut qusngiliurtet piyaaqellratni elliin-llu mertaulluta ungungssit mertelluki.”

²⁰Panini qanrutai, “Nauwa-mi? Ciin uniceciu? Kelegciu nerellgucirniaraakut.”

²¹Moses-aaq-llu uitayugtuq tuani, Jethro-m-llu paniminek Zipporah-mek nulirturcelluku.

²²Irniuq-llu nulirra qetunrangluni. Moses-aaq-llu umyuartequq, “Wii allanruunga maani nunami, taumek aciraqa Gershom-aamek.”[2]

²³Allrakut tamakut kinguatgun Eqypt-aam angayuqra tuquuq, tau͡gaam cali Israel-aam yuin qinuciaratkaat teguarullerteng. Qayagaut-llu ikayuusqelluteng, qayagaullrat-llu Agayutem qilagmelnguum niitaa.

²⁴Agayutem niicamiu yuuniarallrat neq'akaa akqutkellni Abraham-aamun, Isaac-aamun, Jacob-aamun-llu.

²⁵Agayutem-llu tangrraa Israel-aam yuin kevgauluki cakviullrat kusguyugluni-llu.