Read Yupik Exodus 21 Bible Online

Exodus 21 - Yupik bible

Exodus 21

¹“Maa-i makut picirkiurutet qanrutkarkaten Israel-aam yuinun:

²Hebrew-mek teguamek kipuskuvci, taum allrakuni arvinlegni kevgiurarkaugaaci. Allrakut malrunelgatni pegtelarciqaci akimek qanerpek'naci.

³Nulirritellrukuni teguaqliutellerpeni nulirkaminek pingaituq ayakuni, tau͡gken nulirtuumallrukuni teguaqliutellerpeni nuliani malikluku piarkauluni.

⁴Angayuqran nulirturcetellrukani irniangluni-llu tan'gaurlurnek wall'u nasaurlurnek, arnaq irniari-llu angayuqallran pikciqai, teguarulleq kiimi ayagarkauluni.

⁵Tau͡gaam teguaq taringevkarluni qanqan kenekniluku angayuqani, nuliani irniani-llu, pegcesqumanritniluni-llu,

⁶tuani atanran ayauciiqaa agayuvigmun nangertelluku-llu amigmun wall'u amiigem naparyaanun. Nutaan ciutii tuani ukiciiqaa teguaqliutarkaurrluku unguvallran taktaciatun.

⁷“Angutem panini tunkuniu teguarurtelluku, tauna pegcimangaituq angutetun teguatun.

⁸Tunumakan umyuartequtestiinun nuliqnaluku, tau͡gaam taum kiputestiin assikevkenaku, tunumaarkauguq utetmun atiinun; angayuqran tunesciiganaku allanrulriamun, elluarrluku aulukellrunrilamiu.

⁹Yuk kipuskuni teguamek arnamek cikiutekaminek qetunraminun, panimitun pitarrluku aulukarkaugaa.

¹⁰Angun nuliami aiparkaanek nulirtunqigeskuni, ciuqlia aulukarkaugaa cakanirpek'naku neqkatgun, aturatgun, aipaqellriit-llu atutukaitgun.

¹¹Aulukenrilkani ukut pingayun aturluki, arnam camek nagutaunani uniciiqaa uini akiliutmek-llu akurturcetevkenaku.

¹²“Kaugtuq'ngelria yugmek tauna-llu tuquluni, kaugtuq'ngelleq tuqucimaarkauguq.

¹³Tau͡gaam pitsaqevkenani pikan, tuqutnaluku umyuarteqevkenani, apertuuciiqamci natmun qimagvigkaanek.

¹⁴Tau͡gaam yuk qenqerrluni pitsaqluni tuqucikan, tauna tuquskiciu qimangraan ekuavimnun anagnayukluni.

¹⁵“Kaugtuq'ngelria ataminek wall'u aanaminek tuqucimaarkauguq.

¹⁶“Kina imna ayakaucilria kitumek tunenaluku, wall'u avaliqnaluku teguaqluku, tuqucimaarkauguq tauna.

¹⁷“Kina-llu aniqlaagilria ataminek wall'u aanaminek tuqucimaarkauguk.

¹⁸“Yuuk callukunek aipani-llu kaugturluku teggalqumek wall'u tenglukaku, tau͡gken tauna tuquvkenani tau͡gaam ingleminun taklarrluni,

¹⁹tauna-llu ataam makcugngariluni tarralluni-llu ayarurluni, pistellra qaillun pimangaituq; tau͡gaam tauna akngirtellni akilirciqaa calillerkaanek cagmarivkaamiu, aulukluku-llu assirinatkaanun.

²⁰“Angun-llu muragmek piluni teguani kaugtuaqaku angun wall'u arnaq, elliin tuqulluku, anucimirqecetaarnarquq.

²¹Tau͡gaam teguaq tuqunrilkan ernerpak, wall'u erenregni malrugni, angayuqra anucimirqecetaarnarqenrituq. Cagmarillra elliin piminek pitalqeggluni elliinun anucimirqecetaarutnguuq.

²²“Angutnek callulriartangqerquni, akngirrluku-llu qingalria arnaq irnicuartelluku, allakun tau͡gken akngiringavkenani, akiliriarkauguq arnam uingan cuq'liuciatun cuqcistem cangakenrilkaku.

²³Tau͡gaam allakun cali arnaq akngiringakan, akngirtestii anucimirqecetaarciqerci: tuqucikan tuqulluku;

²⁴iingirkengkan iingirrluku; keggutairkengkan keggutairluku; unatairkengkan unatairluku; it'gairkengkan it'gairluku;

²⁵uuskengkan uutelluku; kiliqengkan kilirluku; qiucikan-llu qiulluku.

²⁶“Angutem tenglukuniu teguani angun wall'u arnaq iingakun cikmirrluku, pegtarkaugaa pegtellra akiliutekluku iinganun.

²⁷Keggutaireskaku-llu teguani angun wall'u arnaq, pegtarkaugaa pegtellra akiliutekluku keggutiinun.

²⁸“Kuluviit angucalurtaata ciruneminek kapkaku iliit tuqulluku, teggalqunek miluquluku tuqucimaarkauguq kemga-llu nerumaarkauvkenani; pikestii-llu qaillun pimangaunani.

²⁹Tau͡gaam cirunermiaqenglallrukan ciungani, pikestiin-llu elpengcaumang'e'rmi petunrilkaku, tuquciluni-llu yugmek, tamarmek kuluvak angucaluq pikestii-llu teggalqunek miluqulukek tuqucimaarkauguk.

³⁰Tau͡gaam pikestii akilirivkaqatni unguvayugluni akiliriarkauguq cuq'liumacimitun.

³¹Kuluviim-llu angucalua cirunermiaqengkan tan'gaurlurmek wall'u nasaurlurmek, au͡g'um ayuqiinek pimaarkauguq.

³²Cirunermiaqengkan-llu cali angutmek wall'u arnamek teguamek tuqulluku, taum pikestiin akilirarkaugaa teguam angayuqra yuinaq qulnek cipluku (30) akinek, kuluviim-llu angucalua teggalqunek miluquluku tuqulluku.

³³“Angun patuirikan petmigmek, wall'u elakan petmililuni patuvkenaku-llu, angucaluq wall'u ciulvak igeskan iluanun,

³⁴petmiim pikestiin ungungssim pikestii akilirciqaa, piksugngaluku-llu tuqumalria ungungssiq.

³⁵Angutem angucaluan tuquskaku allam angucalua, angutek unguvalria angucaluq tun'arkaugaak, akia-llu avegluku, tuqumalria-llu cali ungungssiq avgarkauluku.

³⁶Tau͡gaam ciungani tuaten pilallrukan cirunermiarayugluni, pikestiin-llu petullrunrilkaku, ungungssiullgutiinek cimirciqaa tuqumalria-llu elliin piksugngaluku.