Read Yupik Exodus 22 Bible Online

Exodus 22 - Yupik bible

Exodus 22

¹“Angun teglekuni kuluvagmek wall'u qusngimek, tauna-llu tunluku wall'u tuqulluku, akilirarkaugaa kuluvaukan tallimanek kuluvagnek, qusngiukan-llu cetamanek qusnginek.

²Akilitarkaugaa teglellni. Akiliutekailkan teglelleq tunciqaat teguarurtelluku akiliutnguluni teglellerminun. Teglegaq ungungssiq teglegtellrani nataqumakan unguvaluku kuluvauli, ciulvauli, qusngiuli, cimirarkaugaa malrugnek. “Yuum-llu tegliulria unugmi angukaku kaugturluku-llu tuqulluku, tauna tuqucilleq pinarqelriarunrituq. Tau͡gaam erenrani tuqucikuni pinarqelriaruarkauluni.

⁵“Angutem naucetaarvigmi wine-arkanek-llu naucetaarvigmi ungungssiutni nerevkaqaku, tauna-llu allam naucetaarvianun ayagluni nerkaki naumalriit tamaani, cimirciqai ungungssim nerellri naucetaami wine-arkautmi-llu assinritnek.

⁶“Angun kumarcikuni kenermek elliin naucetaarvimini, ayuluni-llu ayagluni allam naucetaarvianun, ekualuki mukaarkat naumalriit kepliarumaluteng-llu quyungqalriit, kenermek kumarcillrem akilirciqai ekuavkallni.

⁷“Yuum avaliqsukuniki allam yuum akiutai wall'u allat qelegnarqelriit piutai, taukut-llu teglegumakata eniinek, teglellrem nataqumakuni malrurqugnek amllertataitnek akilirciqai.

⁸Tau͡gaam teglengalria nataqumanrilkan avaliqestellrat taukut qelegnarqelriit, taicimaarkauguq agayuviatnun, tuani-llu ukvernarcariluni taukut teglellrunritniluki.

⁹“Aklutangqerqan wall'u ungungssirtarluni kuluvagnek, ciulvagnek, qusnginek, wall'u allamek camek tamalriartangqerqan, yuuk-llu malruk qanqagnek, ‘Wiinga pikaqa,’ taukuk pikniluku qanellrek ayaucimaarkauguk yuut agayuviatnun. Agayutem nallunaillra pinaqniluku, akilirciqaa aipani malrurqugnek amllertatiinek.

¹⁰“Yuum avaliqsukuniki allam yuum ciulvautai, kuluvautai, qusngiutai, wall'u allat ungungssiutai, tamakut-llu iliit tuqukan wall'u akngirrluni wall'u ayakaucimaluni, tangvagtaunani-llu,

¹¹angun tauna ayagluni agayuvigmun ukvernarcariarkauguq teglellrunritniluku taum yuum ungungssia. Tegelgumallrunrilkan ungungssiq pikestiin canrilkarkaugaa tamarillni, taum-llu aipaan akilirnarqevkenaku.

¹²Tau͡gaam teglegumakan nutaan cimirarkauluku.

¹³Ungungssit-llu yuilqurmiutaat tuquskatgu, taiskiliu asguranairutekluku; cimirngaitaa yuilqurmiutaat ungungssit tuqucatgu.

¹⁴“Angun-llu navraquni ungungssimek allamek yugmek, tauna-llu akngireskan wall'u tuquluni, pikestii tuantenritellrani, yuum taum navrallrem akilitarkaugaa.

¹⁵Tau͡gaam pikestii tuanlluku pikan, yuum taum akilirngaitaa, navrauterluni pikan cagmaumallra navrautiin patumaciqaa.

¹⁶“Angutem unayaqluku akusrarutekekaku anguciuqsailnguq arnaq, nulirruciucirarkaugaa nuliqsagulluku-llu.

¹⁷Tau͡gaam arnam atiin pisqumanrilkaku, atii akilirciqaa nasaurlurmun nulirruciutngutulim pitatiinek.

¹⁸“Tuqutarkaugarci arnaq angalkumirtaatuli.

¹⁹“Tuqutarkaugarci angun ungungssimek akusrarutekilria.

²⁰“Tuqucimaarkauguq kina imna ekuagilria piciatun agayutnun, ATANERMUN wangnun kiingan pivkenani.

²¹“Pinerrlugayaqunaciu wall'u nanglluku allanrulria. Umyuaqiciu allanrullrucirci Egypt-aami.

²²Pinerrlugayaqunaciu arnaq aipaineq wall'u elli'iraulria.

²³Nangeskuvciki ellait-llu wangnun kaigaluteng iqluvkenii niiciiqanka; qayagauqata ikayungcarluteng

²⁴eq'uqerciiqua cakneq, tuqulluci-llu anguyagkun, nuliaci-llu aipainrurciiqut irniaci-llu atairulluteng.

²⁵“Navriskengkuvci akinek yum'a iliitnun arrsaulriamun, navriskengtulitun piyaqunaci ilatii tapeqluku akiliisqelluku.

²⁶Tegukuvciu iliita ulikutaa akqutkevkarluku akiilnguillerkaanun, tunkiu ataam akerta tevirpailgan,

²⁷tua-i-wa kiingan pikngaku urumatkaqluku. Qavaquni allamek uligkaituq. Wangnun qayagauqan kiuciqaqa. Tua-i-wa wiinga takumcutalriaruama.

²⁸“Qanerpegun caunrilkuuryaqunaku Agayun, aniqlaavkenaku-llu yugpet ciuliqagtiit.

²⁹“Elliilaqina wangnun mukaarkautevnek, wine-autevnek, olive-aat-llu uquatnek pinariaqan. “Cikilaqicia-llu yung'eqarraarutevcen̄ek angutnek.

³⁰Cikilaqicia irniqarraarutaitnek kuluvautevci qusngiutevci-llu. Angucalut ungungssit irniqarraarutait aanaitni uitavkaraqluki malrunlegni ernerni, pingayunelgatni erenret elliitekaqluki wangnun.

³¹“Elpeci yuugarkauguci allakaumaluci wangnun, taumek ner'arkaunrituci yuilqurmiutaat ungungssit tuqutellrita kemgitnek; tunlaqiciki tamakut qimugten̄un.