Read Yupik Exodus 23 Bible Online

Exodus 23 - Yupik bible

Exodus 23

¹“Sagciyaqunaci qannguanek. Ikayuryaqunaciu pinarqut'lek angun nallunairinguarluci iqluurluci.

²Maligarutaaryaqunaci amllenrulrianun alarrluteng pikata, apervikualuteng tuaten elluaq mumiggluku.

³Ingluarvikevkenaku-llu arrsaulria yuk naspaamallrani.

⁴“Tangerquvci inglukestevci ungungssianek tarratellriamek qaunqestaunani ut'ruskiciu pikestiinun.

⁵Tangerquvci-llu eq'ukestevci ciulviinek iqumalriamek nangercesciiganani atmani uqamailata, kituryaqunaciu. Ikayurluku nangreskiciu.

⁶“Yuk arrsaungraan elluarrluku cuqtarkaugarci apqaurvigmun ullauskan.

⁷Kina piciunrilngurteggun picetaarucaqunaciu. Pinarqutailnguq ellualriit-llu tuquceteksaunaki, uitasngaitaqa kina imna tuaten assiitetalriamek pilria.

⁸Assinrilngurmek pisqengraiceci akilirpagluci ciuniuqsaunaki, ciuniuritulit tuaten ayuqellrianek akinek cikmilriatun ayuqelaata piciulriim tungiinun, ellualriit-llu piyullrat iqlutun ayagcetaqluku.

⁹“Nangelrakeksaunaki allanret; allanruyaraq nallunrilavciu elpeci-llu allanrullruavci Egypt-aami.

¹⁰“Allrakuni arvinlegni nauceciilararkauguci nunautevcen̄i quyurciluci-llu naugillrinek.

¹¹Tau͡gaam allrakut malrunelgatni uitavkaqiciu quyurtevkenaki-llu qaingani naulriit. Arrsaulriit nerniartut tamaani naulrianek ungungssit-llu yuilqurmiutaat uitalriit nerniarait. Wine-anek-llu naucetaarvici olive-aat-llu napait tuaten piniaci.

¹²“Caliaqluci ernerni arvinlegni nitilimi, tau͡gaam erenret malrunelgatni caliksaunaci, teguaci, allanret, calisteci, ungungssici-llu mernuinercirniartut.

¹³“Niicugniaqluki cat tamalkuita wii ATANEQ qanellrenka elpecen̄un. Piicaksaunaci allanun agayutnun atrit-llu apaaksaunaki.

¹⁴“Atulaqiciki pingayun agayunerpiit nerevkariyarat allrakumi wangnun qigcikutekluki.

¹⁵Abib-am iraluani, tuani iralumi anllerci Egypt-aamek nallairaqan, atulaqiciu Quuleciriyarailngurmek Kelipartularvik, tuaten ayuqluku alerquutekellrucimtun elpecen̄un. Quuleciralegnek kelipanek nereksaunaci erenret malrunelgen aturluki. Agayuyartuqsaunaci-llu wangnun elliitekalgirpek'naci.

¹⁶“Atulaqiciu naucetaarpecen̄ek quyurciyaram agayunerpii quyurcillerci ayagniraqavciu. “Atulaqiciu naucetaanek quyurciyaram agayunerpii uksuarmi quyurciaqavci atsaitnek wine-arkat atsangqetulit-llu napat.

¹⁷Allrakuaqan ukuni pingayuni agayunerpagni tamarmeng angutevci tailuteng piicagviksartulararkaugaatnga Wii ATANEQ Agayutevcen̄i.

¹⁸“Quuleciralegnek kelipanek elliiksaunaci ekuagiaqavci ungungssinek wangnun. Uquit ungungssit ekuamallret wangnun ukuni agayunerpagni uitavkaqsaunaki unuakurnatkaanun.

¹⁹“Allrakuaqan taitaqluki eniinun ATANREM Agayutevci ciuqliit mukaarkat quyurteqarraalci. “Keniqsaunaki piyagaat qusngit wall'u qusngirngalnguut aanaita milgitnun.

²⁰“An'gilamek ayagceciciqua ciunerpeciuggun cayailkuciumastekarpecen̄ek pektellerpecen̄i, ayautestekarpecen̄ek-llu nunamun uptellemnun.

²¹Murilkelluku niisngaluku-llu ingluliuqsaunaku-llu pikiciu, wiinga ayagcetellruamku, au͡g'arisngailaci ingluliuquvcen̄i.

²²Tau͡gaam maligtaquurquvciu tamalkuita-llu pisqutenka atuquvciki callugciqanka tamalkuita ingluci.

²³An'gilaqa-llu ayagceciiqaqa ciunerpeciuggun, ayauciiqaaci-llu nuniitnun Amorite-at, Hittite-at, Perizzite-at, Canaanite-at, Hivite-at, Jebusite-at-llu, wiinga-llu piunrirciqanka.

²⁴Ciktaaqsaunaci agayutaitnun piicaksaunaci-llu tamakunun, agayumacimegteggun-llu piciryarait piciryaraqliuteksaunaki. Piunriraqluki agayutait itumtaqluki-llu qigcikekait teggalqut napalriit.

²⁵Piicagvik'laquvcia wiinga, ATANEQ Agayutevcen̄i, atawaqerceciiqamci, neqkangqertelluci merkangqertelluci-llu au͡g'arluki-llu tamalkuita naulluuteci.

²⁶Nunavcen̄i arnat irnicualarngaitut irniarilngaunateng-llu. Wiinga-llu unguvamavkarciqamci.

²⁷“Pairnirastevcen̄un alikevkarciqua, ayuquciiruceciiqanka-llu yuut callukengaci. Tuigceciiqanka ingluci qimagtelluki-llu elpecen̄ek.

²⁸Ingluci nuniinga'rceciiqanka; ayagtelluki Hivite-at, Canaanite-at, Hittite-at-llu iluvainanerpecen̄i.

²⁹Ayagcessngaitanka allrakum ataucim iluani. Tuaten pikuma ungungssit yuilqurmiutaat amllerissiiyaagciqngata nuna-llu yuirtessiyaagluni.

³⁰Tau͡gaam carrauqaqluki anevkarturciqanka elpeci amllerinatkarpecen̄un nuna piksagucugngariluku.

³¹Nunasi engelengqe'rceciiqaqa Red Sea-mek Philistine-at imarpiatnun yuilqumek-llu Euphrates-aamun; cirlakevkarciqngamki tamatum yui elpecen̄un, ayagtelluki ciunerpecen̄ek.

³²Akqut'lillgutkeksaunaki tamakut yuut agayutait-llu.

³³Yuut tamakut uitavkaryaqunaciki tamaani nunavcen̄i, assiilngirceciiqaiceci wangnun. Agayulaquvci agayutaitnun tuqunarqelriaruluni picurlautnguciquq elpecen̄un.”