Read Yupik Exodus 24 Bible Online

Exodus 24 - Yupik bible

Exodus 24

¹ATANEQ qanertuq Moses-aamun, “Mayurluten ingrikun taitai elpet, Aaron-aaq, Nadab-aq, Abihu-llu, yuinaat-llu pingayun qulmek cipluku (70) ciuliqagtait Israel-aat, cali tau͡gaam yaaqsiggarluci palurrluci ciktaarniartuci.

²Elpet kiivet, allat pivkenateng, mallgeskemnun tainiartuten. Yuut-llu maliggluten ingriq mayurngaitaat.”

³Moses-aam-llu atrarluni yuut qanrucarturai tamalkuitnek ATANREM pisqellrinek picirkiurainek-llu. Tamarmeng-llu yuut ataucikun kiuluteng qanertut, “Wangkuta piciqaput tamalkuita ATANREM qanellri.”

⁴Moses-aam igautai tamalkuita ATANREM alerquutai. Unuakuarmi makluni ekuaviliuq ingrim aciani elliiluni teggalqunek qula malrugnek cipluku, ataucimek Israel-aam ilakellriartai pikirturluki.

⁵Ayagyuanek-llu ayagceciuq, taukut-llu ekuagiluteng ATANERMUN. Cali-llu tuquciluteng kuluvagnek elliitekanek ilakuyucimun.

⁶Moses-aam-llu ungungssit augita avgat tegua qantanun-llu assigtarluku, avgat-llu ciqrulluku ekuavigmun.

⁷Akqutem-llu kalikai teguluki ATANREM alerquutainek imalget. Naaqai qastuluni yugnun, yuut-llu qanerluteng, “Mat'um augem takarnarquciraa ATANREM akqut'liallra pillgutekluci makut tamalkuita alerquutet cikiuteklermini.”

⁸Moses-aam-llu qantaq teguluku augmek imalek, auk ciqrutaa yugnun. Qanerluni-llu, “Man'a auk nallunailkutauguq akqutkellerpecen̄un aturarkauniluku akqun ATANREM taqellra ilakluci.”

⁹Moses-aaq, Aaron-aaq, Nadab-aq, Abihu, yuinaat-llu pingayun qulnek cipluku (70) Israel-aat ciuliqagtait mayurtut ingrimun.

¹⁰Tangrraat-llu Israel-aat Agayutiit. Tuani it'gain aciat naterluni teggalquqegtaarmek sapphire-amek qiugcetetaluni qilagtun.

¹¹Agayutem akngirtenritai ukut Israel-aam yuin ciuliqagtait; tangrraat Agayun, ner'ut-llu merluteng-llu pillgutekluteng.

¹²ATANEQ qanertuq Moses-aamun, “Mayua ingrimun ullaglua utaqaniartuten tuani; cikirciqamken malrugnek teggalqugnek igarviignek imalgegnek alerquutnek igautellemnek ayuqucirtuutekauluki yugnun.”

¹³Moses-aankuk ikayuni-llu Joshua uptuk, Moses-aaq-llu mayurtuq tanqilriakun ingrikun.

¹⁴Moses-aam ciulirneret qanrutai, “Wani utaqacikuk uterrnatkamegnun, Aaron-aankuk Hur-aq-llu maantuk ilakluci; ilasi camek pitkangqerquni ullagniagci.”

¹⁵Moses-aaq-llu mayurtuq Ingrimun Sinai-amun amirlum-llu tauna ingriq patuluku.

¹⁶Qitngirnarqellria tanqia ATANREM taungucia atrartuq ingrimun. Israel-aam yuinun tanqik ayuquq kenertun ekualriatun ingrim kangrani. Amirlum patumaa ingriq ernerni arvinlegni. Erenret-llu malrunelgatni ATANREM Moses-aaq qayagauraa amirlumek.

¹⁸Moses-aaq-llu mayurtuq ingrim kangranun pulaluni amirlumun, tuantuq-llu ernerni yuinaagni malrugni (40) unugtuumaita.