Read Yupik Exodus 26 Bible Online

Exodus 26 - Yupik bible

Exodus 26

¹[13] “Taqniarci ilua Pelatekam Agayuviim qulnek aturluci 'lumarraqegtaarnek qilaumaluteng tapeqluku qiugliq, qesurliq, kavirliq-llu qusngim melqurra. Menglii qaralilirluku Cherubim-aanek.

²Tamalkuita angtatekluki akimiarunrita'arnek yaaltanek taktarrluki malrugnek-llu yaaltagnek iqtutarrluki.

³Mingqulluki talliman atauciurrluki, allat-llu talliman tuaten cali piluki.

⁴Putulirlukek-llu qiuglimek 'lumarrarmek elalirnerkakegnegun tamarkenka taqumalriik.

⁵Yuinaak malruk qulmek cipluku (50) putunek ellivikluku ciuqliq ayagnerakun 'lumarrakun aipaa-llu nangneqliakun.

⁶Pililuci-llu yuinaak malruk qulnek cipluku (50) negciyagarnek suulutaanek, tamakutgun taukuk itusngaarkaulutek atauciurrlutek.

⁷“Pelatekaq-llu patukiurluku qula ataucimek cipluku 'lumarrarnek qusngirngalnguut melqurritnek piliaqumalrianek.

⁸Angtatekluki taqniaci, taktaluki yaaltanek akimiarnek iqtutaluki-llu yaaltagnek malrugnek.

⁹Mingqulluki talliman atauciurrluki, aipaani-llu arvinelguluki mingqulluki, atauciq arvinelgat tapluku taplegtekluku manuani Pelatekam.

¹⁰Putulirluku aipaa nangneqliata itucimalriit mengliikun yuinaak malruk qulnek cipluku (50) aipaan-llu cali menglii tuacetun.

¹¹Yuinaak-llu malruk qulmek cipluku (50) punernernek negcililuci itullukek-llu tamakutgun malruk atauciurrlukek patukaurrlukek.

¹²Agarrluku aipaan cipnera tunulirneranun Pelatekam.

¹³Iqukegni-llu yaaltam avga atunem avategkeni Pelatekam aqevlavkarlukek, patukutaqlukek.

¹⁴“Malrugnek cali patuliluci, atauciq ingrirmiutaat amiitnek kavircimalrianek aipaa-llu qecigkilngurnek qecignek qalliuluni patuugarkamek.

¹⁵“Naparyai Pelatekam murakegtaarmek acacia-mek pililuki.

¹⁶Atauciq akimiarnek it'ganernek taktaluku, yuinaq-llu malrunlegnek cipluku (27) cetyaarnek iqtutaluteng.

¹⁷Naparyat malruuqaqluki ayuqellrianek pairutlerkiraqluki, tamalkurmeng allat tuaten pingqerturararkauluteng.

¹⁸Ungalalirnera yuinarnek enerkiurluku,

¹⁹yuinaagnek-llu malrugnek (40) tusngallerkiurluki qerrirlimek malruugurluki ataucimun enerkiuramun, nayumiqastekevkarluki malrugnun aningalriignun.

²⁰Neglirnera-llu yuinarnek (20) enerkiurluku,

²¹yuinaagnek-llu malrugnek (40) qerrirlimek enerkiurat acikaitnek, malrutaarluki naparyat acilirluki.

²²Tunua-llu Pelatekam kanavalirnera arvinlegnek naparyirluku,

²³kangirai-llu malrutaarluki.

²⁴Kangirami enerkak itullukek aciagnegun, itusngaarkaulutek quletmun. Malruk naparyak acikek avvingaarkauguk kangkek tau͡gaam kulutmun ataucimun quyurcimalutek, malrugnek kangiralegtun ayuqerkaulutek.

²⁵Pingayunlegnek naparyangqerrarkauluni akimiaq ataucimek cipluku qerrirlimek acikarluteng, malrutaarluteng atauciq enerkiuraq.

²⁶“Akimiarnek-llu qer'aqrucirluku murakegtaarmek acacia-mek, tallimanek cali Pelatekam ingluan enran pikainek,

²⁷talliman-llu enrinun akiani, talliman-llu kanavalirnermi tunuani.

²⁸Qer'aqrun ellimaarkauluni qukaanun qulmun enran Pelatekam iquanek ayagluni amavet iquanun.

²⁹Enerkiurat suulutaamek qallirrluki suulutaanek-llu kulutnek itucirluki.

³⁰Naparrluku Pelatekaq picirkiurumaciatun nasvitellrucimtun ingrim qaingani.

³¹“Capkucirluku-llu 'lumarraqegtaarmek qilaumaluteng ilakluteng qiugliq, qesurliq, kavirliq-llu. Menglait-llu qaralilirluki cherubim-aanek.

³²Agarrluku-llu cetamanun murakegtaarnun acacia-nun naparyanun suulutaamek qallircimalrianun, aciit qevlercetellrianun tusngaluteng negcignek-llu agaruterluteng.

³³Uitavkarluku negcigni nalqigluteng pimalrianun qiliini Pelatekam, elliluku-llu Akqutem Yaassiiga imalek igarviignek teggalqugnek tunuanun capem. Capem avgumaarkaugaa Tanqilria Tanqipialriamek.

³⁴Patuluku-llu Akqutem Yaassiiga.

³⁵Tanqikapiaralriim elatiinun elliiniartuci estuulumek mengelmun neglirnermun kenurrarvik-llu ungalalirnermun.

³⁶“Iteryaraa-llu Pelatekam capkutarkiurluku 'lumarraqegtaarmek, ilakluteng qilaumalrianek qiugliq, qesurliq, kavirliq-llu. Menglii-llu mingeqluku canguanek tangnircarluku.

³⁷Piliniartuci-llu tallimanek naparyanek murakegtaarnek acacia-nek capkutam pikainek qallilirluki suulutaanek; negciit-llu cali suulutaamek piliaqumaarkauluteng tusnganerkiurluki-llu tallimanek punernernek.