Read Yupik Exodus 27 Bible Online

Exodus 27 - Yupik bible

Exodus 27

¹“Ekuavililuci-llu murakegtaarmek acacia-mek yaassiigenqeggluku, it'ganret pingayunelgat avguluku taketmun iqtutmun-llu, it'ganret-llu tallimiit avguluku qertutarrluku.

²Kangiraikun pugumalrianek pitangqertelluku ekuavik, tamalkuan atauciurneruvkarluku, qainga-llu tamalkuan punernermek qallilirluku.

³Qantarkiurluki-llu uqurrlilriit qamlleret, qanikciuruciluci, qanciluci, negcililuci, kenercissuutnek-llu qantanek. Tamarmeng makut punernermek taqumaarkaugut.

⁴Punernermek-llu ingelqaarmek pililuci kulutnek kangiraikun tegumiaqessuucirluku.

⁵Ingelqaar ekuaviim mengliin acianun elliluku tekisngaluku ekuaviim avga qulmun.

⁶Tegumiaqessuutekiurluku-llu murakegtaaraagnek acacia-mek punernermek qallilirlukek;

⁷tegumiaqessuutekak nuvusngaarkaulutek kulutnun ekuaviim avategkeni calligcimaaqan.

⁸Ekuavik muragnek piliaqluku iluliluku, picirkiurumallra nasvallrucimtun ingrim qaingani.

⁹“Pelatekaq Agayuvik umegkiurniarci 'lumarraqegtaarnek aqevlaarkanek. Ungalalirnermi yuinaak malruk qulmek cipluku (50) yaaltanek umget taktaarkaugut.

¹⁰Napartengqerrarkauguq yuinarnek (20) punernernek, tusngallerluteng naparyat tamarmeng punernernek, negcigluteng enenguterluteng-llu qevlercetellrianek qerrirlinek.

¹¹Neglirnerem-llu umegkaa tuaten cali ayuqluku.

¹²Kanavalirneq-llu umengqerrarkauguq yuinaq tallimanek (100) yaaltanek taktalriamek, qulnek-llu naparyarluni, qulnek cali tusngallerluteng.

¹³Calaralirneq-llu iteryaram nunii cali yuinaq tallimanek (100) yaaltanek taktalriamek umengqerrarkauluni.

¹⁴Iteryaram avategkeni umegtangqerrarkauguq pingayunelgat avegluku yaaltanek, pingayunek naparyarluteng naparyat-llu tusngallerluteng.

¹⁶Iteryaraani umegtangqerrarkauguq qulnek yaaltanek taktalriamek 'lumarraqegtaarmek, taqumalriamek qiuglimek, qesurlimek, kavirlimek-llu qusngit melqurritnek, mingeqluni-llu tangnircaumaluni. Cetamanek naparyanek nayumiqasterluni cetamanek-llu tusnganerluteng.

¹⁷Tamarmeng naparyat kassutmun umegmi itutengqerrarkaugut qerrirlinek nuvutnek, negciit-llu cali qerrirlinek tusngallrit-llu punerneruluteng.

¹⁸Umek ayuqerkauguk yuinaak malruk qulmek (50) yaaltanek taktaluni, yuinaq tallimanek yaaltanek (25) iqtutaluni, pingayuak avguluku yaaltanek qertutaluni. Umget piliaqumaarkaugut 'lumarraqegtaarnek punernernek atlirnerluteng.

¹⁹Tamarmeng cat aturarkai Pelatekam, nuqsugcimavigkai-llu Pelatekam umgem-llu punerneruarkaugut.

²⁰“Alerqurki Israel-aam yui taitesqelluki assinratnek olive-aat uquata kenurram uqurkaanek, kumauralarniartuq atakumi.

²¹Aaron-aam qetunrani-llu elliciqaat kenurraq Pelatekam iluanun, elatiinun capem, ciuqerrani Akqutem Yaassiigan. Tuani ciuqamni kumalararkauguq atakumek unuakullranun. Man'a alerquun atulararkaqluku Israel-aam yuin kinguveteng-llu akwarpak.