Read Yupik Exodus 28 Bible Online

Exodus 28 - Yupik bible

Exodus 28

¹“Taisqiu anelguten Aaron-aaq qetunrai-llu Nadab, Abihu, Eleazar, Ithamar-aq-llu allakarluki Israel-aam yuinek, kevgiurniaraatnga agayulirten͞guluteng.

²Agayulirtetarnek aturaliniaran anelguten Aaron-aaq, takarnarqutkainek tangnirqutkainek-llu.

³Quyurrluki tamalkuita elisngalriit calistet cikillrenka piyugngacimek, qanrulluki-llu Aaron-aaq aturalisqelluku. Naaqicimaniartuq agayulirten͞gurrluku kevgiullerkaanun wangnun.

⁴Maa-i makut aturat piliarkait: qat'gailitaq, as'arcen̄a'ar, qalliq qaraliliumalria, nacaq nemrucaraq, iqtulria-wa naqugun. Makut taq'erkaugait aturat Aaron-aamun qetunrainun-llu agayulirten͞guluteng kevgiurniaraatnga.

⁵Caliaqestait makunek aturluteng piniartut: qiuglinek, qesurlinek, kavirlinek-llu qusngit melqurritnek 'lumarrarnek; suulutaanek yualukanek 'lumarraqegtaarnek-llu.

⁶“As'arcen̄a'ar piliaqniaraat qiuglinek, qesurlinek, kavirlinek-llu qusngit melqurritnek 'lumarrarnek, suulutaamek yualukamek, 'lumarraqegtaarnek-llu, mingeqluku tangnircaumaluku.

⁷Tusailitangqerciquq malrugnek mingqusngalriignek menglegkenun, taukugnegun itutelararkaulukek.

⁸Naqugutmek-llu pililuci 'lumarrarmek taqumalriamek, as'arcen̄a'armun piliaqellerpeci ayuqiinek, mingqulluku-llu as'arcen̄a'armun atauciurrlukek.

⁹Malrugnek-llu ayuqenrilngurnek qaralilgegnek teggalquqegtaaraagnek piluci, qaingagnun-llu igaulluki atrit qula malrugnek cipluku Jacob-aam qetunrai,

¹⁰igaulluki tungliqutaciicetun yuurtellrita, arvinlegnek aternek atauciq aipaa-llu cali arvinlegnek.

¹¹Teggalquliurtem̄un caliaqevkarlukek igautelluki Jacob-aam qetunrain atrit ellilukek-llu suulutaamek tusngallirlukek.

¹²Taukuk-llu teggalquk ellilukek as'arcen̄araam tusailitagkenun umyuaqutnguvkarlukek Israel-aam qetunrainun; Aaron-aam ang'aquralarciqai atrit tusgegmini. Tuaggun wiinga ATANEQ umyuaqerrlainalarnianka yuunka.

¹³Pililuci malrugnek suulutaagnek tusngallerkagnek

¹⁴malruinek-llu kalivnernek suulutaarrlainaagnek qipumalriignek ilavkuyagartun ayuqlirilukek, tusngallerkiuragnun-llu ellilukek.

¹⁵“Qat'gailiciluku-llu agayulirten͞guneq atulararkaanek taringnaurqami Agayutem piyullranek. Taqniarci 'lumarrarnek as'arcen̄a'armun atullerpeci ayuqaitnek aturluci tangnircautai-llu ayuqluki.

¹⁶Yaassiigenqeggarkauguq tapluku-llu malruurrluni, qulngunrita'arnek-llu cetyaarnek iqtutaluni qulngunrita'arnek-llu taktaluni.

¹⁷Ellivikluku cetamainek nalkuralrianek teggalquyagarnek. Ciuqlirmun elliiluci ruby-mek, topaz-aamek, garnet-aamek-llu;

¹⁸tunglianun-llu emerald-aaq, sapphire-aq, diamond-aaq-wa;

¹⁹pingasuingatnun-llu turquoise-aq, agate-aq, amethyst-aaq-wa;

²⁰cetamaingatnun-llu beryl-aamek, carnelian-aamek, jasper-aamek-llu. Makut tusnganengqerrarkauluteng suulutaamek.

²¹Makut tamarmeng qula malrugnek cipluku teggalqut igangqerrarkaugut atritnek Jacob-aam qetunrain, nallunairluki ilakellriartai Israel-aam yuin.

²²Qat'gailitaq-llu qipumalrianek kalivnernek suulutaanek pikiurluku.

²³Malrugnek-llu kulutegnek ellivikluku qulirnerkun kangiragkenkun,

²⁴qillrullukek-llu malruk qipumalriik kalivnerek kulutegnun.

²⁵Iqukek-llu kalivnerek qillrullukek tusngallerkiuragnun, tuaten pikunek ellimaarkauguk manulirneragnun tusailitagken as'arcen̄araam.

²⁶Pililuci cali malrugnek kulutegnek suulutaagnek, ellilukek-llu atlirneran kangiraagkenun qat'gailitam ilulirnermun as'arcen̄araam tunglirneranun.

²⁷Allagnek cali kulutegnek pililuci, ellilukek-llu atlirmun iqukegnun as'arcen̄araam tusailitagken naqugutiin quliinun.

²⁸Qillrulluki kulutet kulutngullgutaitnun qiuglimek pelacinagmek, qat'gailitaq as'arcen̄a'armek au͡g'arrngairulluku.

²⁹“Aaron-aaq itquni Tanqilriamun una qat'gailitaq aturarkaugaa, igaumalria ilakelriartainek Israel-aam, tua-i-wa Wiinga ATANEQ, umyuaqerrlainararkauluki yuunka.

³⁰Ellilukek Urim-aaq Thummim-llu[14] qat'gailitamun, Aaron-aam ang'aqlukek it'larniartuq tanqilriamun ciuqamnun. Cayarani kesianek atularniaraa una qat'gailitaq. Tuaten taringelarniaraa piyulqa Israel-aam yuinun.

³¹“Qalliq as'arcen̄a'armun iluqliuluku aturarkaq taqumaarkauguq qiuglirrlainarmek qusngim melqurranek 'lumarrarmek.

³²Una ukinengqerrarkauguq qamiqum pugyararkaanek, ukineq-llu mingqulluku menglelirluku allegyailkucirluku.

³³Kinguqerra kassutmun atsaruanek qiuglinek, qesurlinek, kavirlinek-llu qusngim melqurrinek 'lumarrarnek, akuleliluki suulutaanek kuluk'uunarnek.

³⁵Aaron-aam una atularciqaa agayulirten͞guluni kevgiuraqami. Itraqan ciuqamnun Tanqilriamun wall'u tuaken an'aqan, kuluk'uunaat nepiit niitnarqelaasqelluki, niitnailkata tuqunayukluku.

³⁶“Tangnircautmek pililuci suulutaamek igarluku-llu qaingakun, ‘Allakaumalria ATANERMUN.’

³⁷Tauna-llu qillrulluku manulirneranun qamiqurran nemran qiuglimek pelacinagmek.

³⁸Aaron-aam una atulararkaugaa qauramini. Tua-i wiinga ATANEQ ciuniulararkauluki elliitait Israel-aat wangnun umyuaqulluki pimalriit, yuut iliini alartelangraata elliigaqameng tamakunek.

³⁹“'Lumarraqegtaarmek pililuci keggaqlirkiuqiciu Aaron-aaq nacaliluku-llu cali. Cali-llu qamiqurra nemliluku, naqugutkiurluku-llu tangnircarluku yualukayaarnek mingqusngalrianek.

⁴⁰“Keggaqlililuki, naquguciluki, nacaliluki-llu Aaron-aam qetunrai, takarnarqutkaitnek tangssunarqutkaitnek-llu.

⁴¹At'elluki makut aturat anelgutevnun Aaron-aamun qetunrainun-llu, naaqilluki-llu wangnun allakarluki. Mingugluki-llu olive-aam uquanek kevgiurniaraatnga agayulirten͞guluteng.

⁴²Qerrullililuki-llu nanilngurnek qukaatnek ciisqurritnun tekisngalrianek, uatait alaiteksaunateng piniartut.

⁴³Aaron-aam qetunrani-llu kesianek atularniarait Pelatekamun Agayuvigmun itraqameng. Wall'u ekuavik ullagaqamegteggu agayulirten͞guluteng kevgiuqata'arqameng Tanqilriami, tuqucimanritniartut matangqacirteng pitekluku. Man'a caqtaarpek'nani picirkauguq Aaron-aamun kinguvrinun-llu.