Read Yupik Exodus 29 Bible Online

Exodus 29 - Yupik bible

Exodus 29

¹“Waten piarkauguten naaqiskuvki Aaron-aaq qetunrai-llu agayulirten͞gurrluki caliamnun: upluci ataucimek piyagarmek nulirtem̄ek malrugnek-llu angucalugnek qusngignek natlugnerilnguugnek.

²Mukaarkat-llu assinritnek tau͡gaam quuleciraunaku, kelipiluci olive-aat uquitnek ilaluku ilait tau͡gaam ilaunaki. Ilait-llu mamkunaki assaliayaartun elucilirluki olive-aat uquitnek mingugluki.

³Caqumun ekluki elliitekluki-llu wangnun ekuagikuvet nulirtem̄ek angucalugnek-llu qusngignek.

⁴“Tailluku Aaron-aaq qetunrai-llu iteryaraanun Pelatekam Agayuviim upyutmek-llu ervuqertelluki.

⁵Nutaan Aaron-aaq agayulirtet aturaitnek ac'etniarci, keggatmek, 'lumarrarmek-llu as'arcen̄araam iluqlianek, as'arcen̄a'armek, qat'gailitamek, naqugutmek-llu.

⁶Nacaq-llu nemrucaraq at'elluku, tuavet-llu elliluku kencignarqelria naaqicimallran nallunailkutaa igaumaluni, ‘ATANERMUN Allakaumalria.’

⁷Uquq-llu tua-i teguluku qamiqurranun kuvluku mingugluku-llu.

⁸“Qetunrai-llu tailluki keggatnek at'elluki.

⁹Naqugucirluki nacarluki-llu nemrucaranek. Tuaten naaqitarkaugan Aaron-aaq qetunrai-llu. Ellaita kinguvrita-llu kevgiurciqaatnga agayulirten͞guluteng akwarpak.

¹⁰“Nulirtem̄ek tailluci Pelatekam Agayuviim ciuqerranun, Aaron-aaq-llu qetunrai-llu qanrulluki unatait ellisqelluki taum qamiqurranun.

¹¹Tuqulluku-llu nulirta tuani tanqilriami ciuqamni iteryaraani Pelatekam Agayuviim.

¹²Nulirtem augan iliinek piluten, yuararpegun-llu ekuaviim kangran kangiraini anngalriit mingugluki; ilii-llu augem kuvluku acianun ekuaviim.

¹³Nulirtem qiluin uquat tenguan-llu picalqurra, tartuk-llu uqurtuumakenka, ekuaniaci ekuavigmi elliitekluki wangnun.

¹⁴Tau͡gaam nulirtem kemga amirtuumaan qilui-llu ekuaniaci nunavci elatiini. Man'a elliitnguuq agayulirtet assiilnguita au͡gautekaatnun.

¹⁵“Cali teguluku angucalum qusngim aipaa, Aaron-aam-llu qetunrain-llu unatait qamiqurranun ellivkarluki.

¹⁶Tuquqaarluku auga ciqertautniarci qacarnerinun ekuaviim.

¹⁷Kepurluku-llu temii erurluki-llu ilurrlui iruk-llu kingulirnerek. Elliluki-llu allat natain qamiqurran-llu qaingatnun.

¹⁸Nutaan-llu ekualuku tamalkuan ekuaviim qaingani, neqkauluku elliitekluku. Tepii mat'um elliitem ilukegcinarquq wangnun.

¹⁹“Cali teguluku aipaa angucaluq qusngiq naaqicissuutekaq, Aaron-aam-llu qetunrain-llu unatait qamiqurranun ellisqelluki.

²⁰Tuquqaarluku augan ilii minguutniarci Aaron-aam qetunrain-llu tallirpilirneret ciutaita atlirneritnun, cali-llu tallirpilirneritnun ayautaitnun, tallirpilirneritnun-llu putukuitnun. Ilakuaq-llu auk ciqrulluku ekuaviim caniqerrinun.

²¹Augem-llu iliinek ekuaviim qainganelngurmek uqumek-llu qevcallerrluki Aaron-aaq, qetunrai, aturait-llu, allakaumaarkaurtelluki wangnun.

²²“Angucalum qusngim uqua pamyua-llu au͡g'arluku uqurtuumaan, ilurrluin-llu uqua, tenguan-llu picalqurra, tartuk-llu uqurtuumakenka, tallirpilirneq-llu qugtuqaa,

²³issratmek-llu tegulluci kelipanek ayuqenrilngurnek ataucitaarluki: cake-aamek uqulegmek aipirluku uquilngurmek assaliayaartun ayuqelriamek elliitekumallernek wangnun.

²⁴Makut-llu tamalkuita unataitnun Aaron-aam qetunrain-llu elliluki allakaraurrluki elliitnguvkarluki wangnun.

²⁵Nutaan-llu unataitnek teguluki ekualuki ekuavigmi, qainganun elliluki ekuagarkam elliitem, neqkauluki elliitnguluki wangnun. Makut tepiit ilukegcinarquq wangnun.

²⁶“Qat'gai-llu qusngim angucalum Aaron-aam naaqicimallranun atuullrem, yagulluku elliiyarakun elliitekciqerci ATANERMUN; tauna-llu elpeci pikarkauluku.

²⁷“Agayulirta naaqicimaaqan angucalum qusngim qat'gai qugtuqaa-llu naaqiciyarami elliitngulriit wangnun elliitnguarkaugut, allakaumaluteng-llu agayulirtet pikarkauluki.

²⁸Wiinga cimirngaunaku picirkiuraqaqa waten yuut piyarami elliigaqata ilakuyucimun, tamakut qat'gai qugtuqaa-llu angucalum qusngim agayulirtet pikarkauluki. Una elliin cikiutnguuq wangnun ATANERMUN.

²⁹“Kencignarqelriit Aaron-aam aturai kinguvarcimaarkaugut qetunrainun tuqullran kinguani, ellaitnun atulararkauvkarluki agayulirten͞gurrluki naaqicimaaqata.

³⁰Aaron-aam qetunraan agayulirten͞gurtellriim atani tuqukan, it'lararkam-llu Tanqilriamun kevgiurluni, atulararkaugai makut aturat malrunlegni ernerni.

³¹“Kemga qusngim naaqicissuutngullrem Aaron-aamek qetunrainek-llu keniqiciu qallaulluku tanqilriami.

³²Aaron-aankut qetunrani-llu nerniaraat qusngim kemga issratmelngurnek kelipanek ilaluku Pelatekam Agayuviim amiigani.

³³Ner'arkaugait assiilngurmun au͡g'aritnguluteng atullret naaqicimallermeggni. Kiimeng agayulirtet makut ner'arkaugait, tua-i-wa kenciknaqngata.

³⁴Kemget wall'u kelipat ilakuarukata unuakullranun ekuavkaqiciki; nerumaarkaunritut, tua-i-wa kenciknaqngata.

³⁵“Ernerni malrunlegni naaqiciyaraq aturniarci Aaron-aamun qetunrainun-llu, alerquutekellrenka tamalkuita aturluki.

³⁶Erenret tamalkuita elliilarniartuci nulirtem̄ek ekuagiluci assiilnguum au͡gautekaanek. Waten pillerpeci menuiruciiqaa ekuavik, nutaan-llu kuvluku uqumek kencignarcarluku.

³⁷Waten pilarniartuci ernerni malrunlegni. Nutaan-llu ekuavik tanqigilriarurciiquq tamarmi; yuunge'rmi wall'u caunge'rmi agturtii tanqilriarullran pinian picurlagcetarkauluku.[15]

³⁸“Waniwa elliitek'lararkaten ekuavik aturluku: qusngiyagaagnek malrugnek ataucimek allrakungelriignek elliilarciquten unuaquaqan.

³⁹Ekuagaqluku aipaa unuakumi aipaa-llu atakumi.

⁴⁰Ciuqliq qusngiyagaq tapilarniarci elliiluci malrugnek usperegnek mukaamek, urcimalriamek urucirluku saskat cetaman imaitnek olive-aat uquatnek. Saskat-llu cetaman imaitnek wine-amek elliitekamek.

⁴¹Ekualuku-llu aipaa atakumi, tapirluku amllertataitnek mukaam, uqum, wine-am-llu unuakumi pillerpeci. Una elliitnguuq wangnun ATANERMUN, tepiin-llu ilukegcivkaraanga.

⁴²Taqsuunaku man'a ekuagiyaraqciqerci elpeci kinguverpeci-llu Pelatekam Agayuviim amiigani ATANREM ciuqerrani. Tuani tangerciqamci qalarulluten-llu elpet.

⁴³Tuani tangerciqanka Israel-aam yui, tauna-llu ucurnarqucima kenciknarivkarciqaa.

⁴⁴Tanqigiciqagka-llu Pelatekaq Agayuvik ekuavik-llu, allakarluki-llu Aaron-aaq qetunrai-llu kevgiuresqellua agayulirten͞guluki.

⁴⁵Uitallgutkeciqanka-llu Israel-aam yui Agayutkeciqaatnga-llu.

⁴⁶Nallunriciiqaat-llu ATANRUCIQA ellaita Agayutiit, anutestekellrat Egypt-aamek ilagarnaluki. Wiinga ATANRUUNGA Agayutiit.