Read Yupik Exodus 30 Bible Online

Exodus 30 - Yupik bible

Exodus 30

¹“Ekuavilikici murakegtaarmek acacia-mek tepkegcilrianek ekuavigkamek.

²Yaassiigenqeggarkauguq, akimiaq pingayunek cipluku cetyaarnek taktaluni, akimiaq-llu pingayunek cipluku cetyaarnek iqtutaluni, it'ganernek-llu pingayunek qertutaluni. Qaingan kangiraini pugumalriit ilakliiyusngaarkauluteng taumun.

³Qaingan qacarneri tamalkuita pugumalriari-llu patuluki suulutaamek, suulutaamek-llu menglelirluku.

⁴Malrugnek-llu suulutaagnek kulutegnek teguyarirluku mengliin aciakun avategken'gun, uitavigkiurlukek muriik ayagatsuutekak.

⁵Makuk ayagatsuutekak murakegtaaraulukek acacia-rulukek qallirrlukek-llu suulutaamek.

⁶Una ekuavik elliniarci capem elalirneranun agalriim ciuqerrani Akqutem Yaassiigan. Tuani wiinga tanglarciqamken.

⁷Unuakullra tamalkuan Aaron-aam kenurrat auluksarturaqamiki tuani aruviaralarniartuq tepkegcilriamek.

⁸Tuaten-llu cali pilarniartuq atakumi kenurrat kumartaqamiki. Una elliiyaraq aruviarnek atulararkaugarci taqsuunaku kinguverpeci-llu.

⁹Inerquusngalrianek wani aruvagkanek ekuagiksaunaci wall'u ungungssinek mukaarkanek-llu. Elliiksaunaci-llu wine-amek kuvluku qainganun.

¹⁰Allrakumi ataucirqumek Aaron-aam menuircalararkaugaa ekuavik, kangiraini pugumalriit augmek mingugluki, ungungssim assiilnguut au͡gaumallerkaatnun ekuamallrem auganek. Man'a atularciqerci ataucirqumek allrakum iluani taqsuunaku ukanirpak. Una ekuavik kencignarqeqapiartuq ATANERMUN.”

¹¹ATANEQ qanertuq Moses-aamun,

¹²“Israel-aam yui naaqekuvteng atauciuqaqluteng unguvaseng akilirciqaat ATANERMUN, cangerlagpak ellmeggnun tut'esqevkenaku naaqumallermeggni.

¹³Tamarmeng naaqutngulriit akilirarkaugut pisqumatacirmegcetun, cuqcimalriamek tamatum nalliini cuqciyaraat aturluku. Man'a tamarmeng akilirarkaqaat wangnun elliitekluku.

¹⁴Tamarmeng naaqutngulriit angutet yuinarnek allrakungelriit cipluku-llu, akiliriciqut elliitekluku ATANERMUN.

¹⁵Tukuulriim cipluku pingaunani, arrsaulriim-llu cali enurrluku pingaunani, ATANERMUN elliikuvci unguvavci akikaanek.

¹⁶Avularniaten akit yuinek Israel-aam aturluki-llu Pelatekam Agayuviim piilutainun. Una akiliquraun unguviita akiliutekaa, wiinga-llu nalluyagusngaitaqa cayailkuciumallerkaat.”

¹⁷ATANEQ qanertuq Moses-aamun,

¹⁸“Punernermek ermigcuuciluci punernermek-llu tusnganirluku. Elliluku-llu akuliignun Pelatekam Agayuviim ekuaviim-llu, mermek-llu imirluku.

¹⁹Aaron-aam qetunrani-llu atularciqaat meq eruraqamegteki unateteng it'gateng-llu

²⁰Pelatekamun Agayuvigmun iterpailegmeng wall'u ekuavik ullagpailegmegteggu ekuagiyarturluteng ATANERMUN. Waten pilaqilit tuqucimanritniartut.

²¹Unateteng it'gateng-llu erularciqait tuqunritnaluteng. Man'a piciryaraugarkauguq, ellaita kinguveteng-llu atulararkauluku akwarpak.”

²²ATANEQ qanertuq Moses-aamun,

²³“Tepkegcilrianek ayuqenrilngurnek piluten: qula malrugnek cipluku usperegnek myrrh-amek, arvinlegnek uspernek narnirqellriamek cinnamon-aamek, arvinlegnek uspernek tepkegcilriamek cane-amek,

²⁴qula-llu malrugnek cipluku cassia-mek, tamarmeng usperumaluteng (tamatum nalliini usperiyaraq aturluku). Atauciq-llu gallon-aaq olive-aat uquat avulluku.

²⁵Tamakut aturluki kencignarqellriamek mingugkiurniartuten pilauciicetun tepkegcauciaqameng tepkegcaucitulit.

²⁶Tauna aturluku mingugniaran Pelatekaq Agayuvik, Akqutem-llu Yaassiiga,

²⁷estuuluq tamalkuita-llu aklui, kenurrarvik aklui-llu, tepkegcilrianek-llu aruviarvik,

²⁸elliitet ekuaviat aklui tapeqluki, ermigcuun tusngallra-llu cali.

²⁹Makut waten piluten allakarciqaten tanqilriarurtevkarluki. Caunge'rmi yuunge'rmi agturtii picurlagcecimaciquq tanqilriim piniakun.[16]

³⁰Mingugluku-llu Aaron-aaq qetunrai-llu, naaqilluki-llu, agayulirten͞guluteng kevgiurniaraatnga.

³¹Qanrulluki-llu Israel-aam yui, ‘Man'a tanqilria minguk atularciqaat kevgiulriit wangnun ukanirpak.

³²Kuvumaarkaunrituq yuungina'arnun, aturluku-llu piliaqsaraa allamek ayuqiinek pilingaituci. Tanqilriaruuq, tuaten-llu aulukarkauluku tanqilriaruluku.

³³Kia-llu ayuqelikaku wall'u atuqaku yugmun agayulirten͞gunrilngurmun tauna ilaungairuciiquq yumnun.’”

³⁴ATANEQ qanertuq Moses-aamun, “Tegulluten amllertatekluki makut tepkegcilriit naunraat, stacte, onycha, galbanum, aruvagkaqegtaarkamek-llu frankincense-aamek.

³⁵Aturluki-llu aruviarkiurluten, akuyulluki tepkegcaucitulim pilauciatun. Taryirluku-llu menuitniartuq tanqigluni-llu.

³⁶Ilii-llu arilluku powder-aarrurrluku, Pelatekamun Agayuvigmun piluku Akqutem Yaassiigan ciuqerra kanevluku. Aulukciqan man'a tanqilriaruqapiaralriatun pitarrluku.

³⁷Tuaten ayuqellriamek piliyaqunaci elpeci aturarkarpecen̄ek. Aulukekiu tanqilriatun pitarrluku allakaumalriatun wangnun.

³⁸Kina imna ayuqiinek pilikuni elliin tepkegcauteknaluku, tauna ilaungairuciiquq yumnun.”