Read Yupik Exodus 31 Bible Online

Exodus 31 - Yupik bible

Exodus 31

¹ATANEQ qanertuq Moses-aamun,

²“Cucukellruaqa Bezalel-aaq, qetunraa Uri-m, tutgarii Hur-am Judah-m yuinek,

³pingevkallruaqa-llu pinimnek. Pingevkarluku-llu ayuqucingnamek, munaryaramek-llu, caliyugngarivkarluku munarnarqellrianek.

⁴Upciurallerkaanek-llu cat ayuqucirkaitnek caliaqluki-llu aturluki suulutaat, qerrirlit, punerneret-llu.

⁵Teggalquqegtaarnek-llu kepurillerkaa enekaitnun-llu elliaqluki, muraliulallerkaanek, allanek-llu munarcaarluni tangniqluki caliaqnarqellrianek.

⁶Oholiab-aaq-llu nakmikellruaqa, Ahisamach-am qetunraa, Dan-am yuinek, calillguciisqelluku Bezalel-aaq. Allat-llu elisngalriit calistet piyunarqucilillruanka caliaqesqelluki tamalkuita alerquutellrenka. Makuuluteng caliaqerkait:

⁷Pelatekaq, Akqutem Yaassiiga patua-llu, Pelatekam-llu aklui tamalkuita,

⁸estuuluq aklui-llu, kenurrarvik suulutaarrlainarmek piliaqumalria aklui-llu, aruviarmek-llu ekuavik,

⁹ekuavik elliitnek tamalkuita-llu aklui, ermigcuun acia-llu,

¹⁰tangkegcinarqelriit agayulirtet aturait, Aaron-aam qetunrain-llu atulararkait kevgiuraqameng agayulirten͞guluteng.

¹¹Uquq mingugkaq, narnirqellria-llu aruvagkaq Tanqilriami. Makut caliaqellermeggni pisqelqa atuqapiarluku caliaqelararkaugait.”

¹²ATANREM alerquraa Moses-aaq

¹³qanrutesqelluki Israel-aam yui, “Sabbath-aaq atuqiciu, mernuinercirvika, nallunailkutauciqngan elpecen̄un wangnun-llu akwarpak, kinguverpecen̄un-llu tamalkuitnun nallunritesqelluku wangnun yuk'ucirci.

¹⁴Una mernuinercirvik aturarkaugarci tanqilriaruan elpecen̄un; menulirtii tuqucimaarkauguq; kina-llu imna tuani ernermi calikuni tuqucimaarkauguq.

¹⁵Ernerni arvinlegni caliarkaci caliaqeciqaci tau͡gaam erenret malrunelgat Sabbath-aaruuq, mernuinercirviuluni tanqilriamun ATANERMUN; kina imna calilria uumi ernermi tuqucimaarkauguq.

¹⁶Israel-aam yuin aturarkaugaat una erneq kinguvertuumarmeng nallunailkutauvkarluku akqutmun.

¹⁷Nallunailkutauciquq nangyuunani wangnun Israel-aam-llu yuinun, ernerni arvinlegni ATANREM piliaqellruamikek qilak nuna-llu, erenret-llu malrunelgatni mernuinercirluni.”

¹⁸Agayutem qalarutenriamiu Moses-aaq Ingrim Sinai-am qaingani cikiraa malrugnek teggalqugnek igarviignek, elliin Agayutem igautellruluki taukugnun qulen alerquutet.