Read Yupik Exodus 32 Bible Online

Exodus 32 - Yupik bible

Exodus 32

¹Yuut nerinit'ngengameng Moses-aam atrallerkaanek ingrimek ullagluku quyurrvikaat Aaron-aaq qanrulluku-llu, “Agayut'likut ciuliqagtekamten̄ek, Moses-aaq imna Egypt-aamek anutestellerput qaillun piciilamteggu.”

²Aaron-aam tua-llu qanrutai, “Yuuvkarciki suulutaat kulutet aqlitait nuliarpeci, panigpeci, qetunrarpeci-llu, tailluki-llu wangnun.”

³Tamarmeng-llu yuut aqliteteng yuuluki taitait Aaron-aamun.

⁴Aaron-aam teguluki aqlitet urugtai, kuvluku-llu uruumalria yurcirissuutmun eluciliumalriamun, pililuni-llu suulutaamek kuluviit angucaluatnek. Yuut-llu qanertut, “Israel-aam yuini, una agayutkarput Egypt-aamek anutesteklerput!”

⁵Aaron-aaq-llu ekuaviliuq ciuqerrakun agayutnguam qanerluni-llu, “Unuaqu nerevkariciqukut ATANERMUN.”

⁶Unuaquan unuakuarmi taitut ungungssinek ekuagarkanek allanek-llu neqkanek agayukuneng elliitekameggnek. Yuut-llu aqumluteng ner'ut kiituani akusrartengut taangiqluteng mer'aluteng akusrarutekiluteng tuaten.

⁷ATANEQ-llu qanertuq Moses-aamun, “Patagmek atraa, yut'en anutelten Egypt-aamek assiilngirtut cakaarlua-llu.

⁸Ak'a cakaarait ayuqucirtuutekellrenka alerquutet; pililuteng kuluviit angucaluatnek suulutaamek ciktaarvikluku-llu, cali-llu elliivikluku ekuagiluteng, qanerluteng-llu, ‘Waniwa agayutsi Israel-aam yuini, anutestellerci Egypt-aamek.’

⁹Nallunritaqa ukut yuut qanruyutmeggnun maligtaqutesciigaluciat.

¹⁰Arulairtengnaqsaqunii, qenrucamki piunriqataranka. Nutaan-llu elpet kinguveten-llu angliriluki atanruvigpaurceciiqanka.”

¹¹Tau͡gaam Moses-aam kaigavikaa ATANEQ Agayutni qanerluni, “Ciin yut'en eq'urruciki anagulluki, anutelten Egypt-aamek pinirpegun artuqailucirpegun-llu?

¹²Ciin-llu Egypt-aarmiut waten qanerkangevkarciqsiki, ‘Umyuarrliqulluki ayautellrui tuquvkarnaluki ingrini, nangluki nunam qainganek au͡g'arluki.’ Eq'uqertellren pellugcessgu; umyuan cimirru ca assiitellria ellaitnun tuc'etevkenaku.

¹³Umyuaqiki pisteten Abraham-aaq, Isaac-aaq, Jacob-aaq-llu, elpenek akqelten qanrulluki, ‘Kinguveci amllertarivkarciqanka agyatun qilagmi, man'a-llu nuna tamalkuan akqutkelqa cikiutekciqaqa kinguverpecen̄un, ellaitnun piksagutarkauvkarluku akwarpak.’”

¹⁴Tua-i ATANEQ umyualinqigtuq assiitellriamek piqataryaaqellerminek yum'inun.

¹⁵Moses-aaq-llu atrartuq ingrimek tegumiaqlukek teggalquk malruk igarviik, igausngaluteng taukugni qulen alerquutet.

¹⁶Agayutem ellminek igarviik piliaqellruak igaulluki-llu alerquutet qaingagnun.

¹⁷Joshua-m niicamiki yuut qayagpagalriit Moses-aaq qanrutaa, “Niitua anguyautellriit nepaitnek yuut uitaviatni.”

¹⁸Moses-aaq-llu qanertuq, “Anguyagkun cirlakilriit nepkenritaat, cirlakumalriit-llu cali nepkevkenaku. Wiinga atulrianek niitua.”

¹⁹Moses-aam uitavigteng yaaqsinriamiu agayutnguaq tangerrnarian, yuut-llu yuralriit tangrramiki, cakneq qenqe'rtuq. Tuani ingrim engeliini teggalquk milpautak tegumiaqellregni naveglukek.

²⁰Teguluku-llu agayutnguaq piliallrat uruggluku itumtaa powder-aatun qamllerurrluku, mermun-llu kanevlerqaarluku Israel-aam yuinun mertelluku.

²¹Qanerluni-llu Aaron-aamun, “Ukut yuut qaillun pikiitgen cakneq assiitellriamek assiilngirceciki?”

²²Aaron-aam kiugaa, “Qenrutenrilnga wiinga. Nallunritan ukut yuut assiilngurmek aturnaluteng mayiteq'lauciat.

²³Waten qanrutaatnga, ‘Nalluarput Moses-aam qaillun picia, anutesteklemta Egypt-aamek. Taumek agayut'likut ciuliqagtekamten̄ek.’

²⁴Qanrutanka-llu suulutaat tangnircautekluki atuqengait taitesqelluki. Wiinga-llu kenermun egcamteng tamakut taitellrit una kuluvauluni tuaken alairtuq!”

²⁵Tua-i Moses-aam tangrraa yuut umyuarteng maligtaquluku pillrat, (tua-i-wa Aaron-aam ciuliqagteluaqerpek'naki pivkarluki), kasngunarqellriamek piluteng inglumeng ciuqerratni.

²⁶Tua-i Moses-aaq nangerrluni iteryaraanun uitavimeng qanertuq, “Tamarpeci ATANREM ingluarvikestaini canimnun taici.” Tamarmeng-llu Levite-at quyurtut avatiinun.

²⁷Elliin-llu qanrutai, “Waten qanertuq ATANEQ Israel-aat Agayutiit, ‘Tamarpeci nuussirpaci all'uki, ayagluci waken iteryaramek amavet aipaanun tuqurqiciki anelguceci, yugnikek'ngaci, elaqlici-llu.’”

²⁸Levite-at-llu Moses-aam qanellratun piut. Yuut-llu tiissitsaat pingayun (3,000) tuani tuquluteng.

²⁹Moses-aam Levite-at qanrutai, “Unuamek elpecen̄ek allakartuci caliaranun ATANREM, akikluki irniaci anelguceci-llu. Taumek ATANREM elliin atawaqercetaaci.”

³⁰Unuaquan Moses-aam yuut qanrutai, “Assiitqapigtellriamek assiilngirtuci, tau͡gaam waniwa ataam ingrimun mayurciqua ATANERMUN. Ikika assiilngurpecen̄ek au͡g'aricimallerkarpecen̄ek unangeciqellrianga.”

³¹Moses-aaq tua-i ATANERMUN utertuq qanerluni-llu, “Ukut yuut assiitellriamek assiilngirtut, agayut'liameng suulutaamek ciktaarvikluku-llu.

³²Ataki au͡g'ariski assiilnguitnek. Tau͡gaam piarkaunrilkuvet atqa au͡g'aqiu kalikanek igausngaviatnek yugpet atrita.”

³³ATANEQ kiuguq, “Wangnun assiilngilriit tau͡gaam atrit au͡g'arciqanka kalikamnek.

³⁴Watua ayagluten ayaucarturki yuut qanrutkellemnun; an'gilama ciuliqagciiqaaten. Tau͡gaam pillerkaq tekiciiquq anucimirqecetaarillerkaqa ukunek yugnek assiilnguit pitekluki.”

³⁵Tua-i ATANREM cangerliqevkarai yuut. Tua-i-wa Aaron-aaq suulutaamek kuluviit angucaluatnek pilivkaatgu.