Read Yupik Exodus 33 Bible Online

Exodus 33 - Yupik bible

Exodus 33

¹ATANEQ qanertuq Moses-aamun, “Maaken ayagluci elpet yuut-llu Egypt-aamek anutelten, ayagluci-llu nunamun akqutkellemnun Abraham-aamun, Isaac-aamun, Jacob-aamun kinguvritnun-llu.

²An'gilamek ayagceciciqua ciuliqagtekarpecen̄ek, qimagceciiqanka-llu Canaanite-at, Amorite-at, Hittite-at, Perizzite-at, Hivite-at, Jebusite-at-llu.

³Ayakatartuci nuqlitnailngurmun naungignarqellriamun-llu nunamun. Tau͡gaam wiinga maliggngaitamci, niicuilnguungavci tumevcen̄i piunrirrnayukluci.”

⁴Man'a niitnirqenrilnguq yuut niicamegteggu angniirutut kenuguteteng-llu yuuluki.

⁵ATANREM-wa Moses-aaq alerqullruani qanrutesqelluki, “Elpeci niicuilnguuguci. Ellma nayuqacuaqaqumci piunriryaramci nangqapiggluci. Watua yuuciki kenuguceci wiinga-llu qaillun pillerkaqa elpecen̄un caliaqeciqaqa.”

⁶Tua-i Ingriq Sinai-aq unicamegteggu Israel-aam yui aturnanrirtut kenugutnek.

⁷Israel-aam yui arulairaqata Moses-aam kencignarqellria Pelatekaq Agayuvik napartelaraa yaaqvaariluku qavartarviat. Aterpagcimaluni Pelatekamek Tuanelvianek ATANREM. Tamarmeng-llu ayuqucingnauryulriit ATANERMUN tuavet ayalartut ullagaqluku.

⁸Moses-aaq-llu tuavet ayagaqan yuut pelatekameng amiigitni nangengqalartut tangvagluku iternatkaanun.

⁹Itrumariaqan Moses-aaq napalria amirluq atralartuq Pelatekam-llu amiigani uitaluni, ATANREM-llu Moses-aaq qalarut'laraa amirlumek.

¹⁰Yuut amirluq tangrraqamegteggu amiigani Pelatekam ciktelartut qigcigyugluteng.

¹¹ATANREM Moses-aaq qalarut'laraa tungaunaku yuuk yugnikutellriik qalarut'lauciagtun. Moses-aaq utertaqan qavartaumavimeggnun pistii Joshua, Nun-am qetunraa, Pelatekami uitalartuq.

¹²Moses-aaq qanertuq ATANERMUN, “Ilumun qanrutellruarpenga wangnun ukut yuut ciuliqagtesqelluki tuavet nunamun, tau͡gaam kina maligkaqa apeqsaunaku. Qanellruuten nallunritnilua ilukegciteknilua-llu.

¹³Ilumun ilukegcitkekuvnga qanrusnga picirkiurarpenek, kevgiurnaamken ilukegcivkarturluten-llu. Umyuaqiu-llu cali uum nunarpiim yui elpenun nakmiin yuk'uciat.”

¹⁴ATANREM qanrutaa, “Maligciiqamci cirlakivkarluci-llu.”

¹⁵Moses-aaq kiuguq, “Maligtarkaunrilkuvkut maaken ayagcecaqunakut.

¹⁶Qaillun wii ukut-llu yuut nallunriciiqseta elpenun ilukegcitkucirput maligtenrilkuvkut? Nayuquvkut yugni allani maani nunami mistulriatun ayuqeciqukut.”

¹⁷ATANEQ qanertuq Moses-aamun, “Qanrucirpetun piciqua, tua-i-wa nallunrilamken ilukegcitekluten-llu.”

¹⁸Moses-aaq-llu qanertuq, “Ucurnarqucin wangnun tangercessgu.”

¹⁹ATANEQ kiuguq, “Ciuqerpegun kiturciqamken tangssunarquciqa tamalkuan tangerrniaran, tuani-llu qanruciiqamken kencignarqellriamek atemnek. Wiinga ATANRUUNGA. Nakleksukenka-llu wiinga naklekarkauluki.

²⁰Kegginaqa tangertessngaitaqa elpenun, yuum tangerqunia unguvangailan.”

²¹ATANEQ-llu cali qanertuq, “Canimni teggalqumek pitangqertuq nangengqavigkarpenek.

²²Ucurnarquciqa qitngirnarqellria kituqan teggalqum qerranqurranun elliciqamken unatemnek-llu patuluten kiturnatkamnun.

²³Unatenka au͡g'aqumki tunuka tangerrniaran kegginaqa pivkenaku.”