Read Yupik Exodus 34 Bible Online

Exodus 34 - Yupik bible

Exodus 34

¹ATANEQ qanertuq Moses-aamun, “Pililuten malrugnek teggalqugnek igarviignek ciuqliigtun ayuqellriignek, igauciiqanka qaingagnun igat igausngallret ciuqliigni navvlerpet.

²Upluten unuaqu mayuqina Ingrikun Sinai-akun, tangerciqamken kangrani.

³Allam maliggngaitaaten; yuk-llu atauciungraan tangrruuvkaryaqunaciu ingrim qaingani. Qusngit-llu wall'u kuluviit ingrim aciani nerevkaryaqunaciki.”

⁴Tua-i Moses-aaq teggalqugnek igarviignek piliuq, unuakuarmi-llu taukuk Ingrimun Sinai-amun ATANREM alerquuciatun.

⁵ATANEQ-llu atrartuq amirlukun tuani-llu nangerngallgutekluku. At'ni-llu tanqilria aperluku, ATANEQ.

⁶Tua-i-llu ATANEQ ciuqerrakun kiturluni qayagaluni, “Wiinga ATANEQ Agayutnguunga naklegtaqapigglua takumcutarlua-llu, qenqerrngiatua nasvagaqluku tau͡gaam angelria kenkutka piciuciqa-llu.

⁷Akqutka atularaqa amllernun kinguveqellrianun, au͡g'araqluki assiilnguut; tau͡gaam anucimirqecetaanrilngaitanka irniarit tutgarait-llu pingasuingurtellratnun cetamaingurtellratnun-llu kinguvrita angayuqrita assiilngillrat pitekluku.”

⁸Moses-aam-llu egmianun ciktaarvikaa nanrarluku.

⁹Qanerluni, “ATANEQ, ilumun ilukegcitkekuvnga kaigavikamken maligeskut. Ukut yuut niicuitut tau͡gaam au͡g'ariskut caarrlugmek assiilngurmek-llu, ciuniurluta-llu nakmiin yugpetun.”

¹⁰ATANEQ qanertuq Moses-aamun, “Watua akqut'liunga Israel-aam yuinun. Ciuqerratni tamalkuita yugpet irr'inarqelrialiciqua nunami tamiini atanruvilegni-llu pimaksailngurnek. Tamarmeng yuut tangerciqait irranarqelriit wii ATANERMI piyugngakenka. Tua-i-wa angelriamek irr'inarqellriamek piciqngama elpeci pitekluci.

¹¹Atuqiciki elpecen̄un alerquutekellrenka unuamek. Ayagceciiqanka Amorite-at, Canaanite-at, Hittite-at, Perizzite-at, Hivite-at, Jebusite-at-llu ciunerpecen̄ek.

¹²Picirkiullguteksaqunaciki yuut tumevcen̄i picurlautngurcuartuq elpecen̄un.

¹³Tau͡gaam ekuaviit navguraqluki, piunriraqluki kencikekait napalriit, kepurluki-llu tangrrutait agayutnguameggnun Asherah-mun.

¹⁴“Ciktaaryaqunaci allanun agayutnun. Tua-i-wa wii ATANEQ ingluliurtenka uitasngailamki.

¹⁵Picirkiuqsaunaci nunam yui ilakluki. Tua-i-wa agayutnguameggnun agayuaqameng ekuagiluteng-llu unayaq'larciqngaceci ilagaasqelluteng, naspaamanayukluci-llu aglumaluci neqnek elliitekellritnek agayutmeggnun.

¹⁶Qetunraci-llu nulirtularnayukluki tamakut ilaitnek arnanek, ellaita-llu iqlutmuruciiqngatki agayulangevkarluki agayutnguameggnun.

¹⁷“Agayutngualiksaunaci cavilqunek ciktaarvikluki-llu.

¹⁸“Quuleciriyarailngurmek Keliparturyaramun nerevkarilallerci aturaqluku alerqullrucimtun, quulecirailngurnek ner'aqluci ernerni malrunlegni Abib-aam iraluani. Tua-i-wa taumi iralumi Egypt-aaq unitellruavciu.

¹⁹“Tamarmeng tan'gaurluut yung'eqarraarutet cali-llu angucalut ungungssit qunguturat irniqarraarutait wiinga pikanka.

²⁰Tau͡gaam utetmun kiputelarciqaci tamalkuita ciulviit irniqarraarutait elliiluci qusngiyagarmek eniinun. Kiputenrilkuvciu uyaqurri navegniaraci. Utetmun kiputaqluki tamalkuita qetunrarpeci ciuqlikacagait. “Kina-llu ciuqamnun iluvarngaituq elliitekaunani.

²¹“Ernerni arvinlegni calilarciquci erenret-llu malrunelgatni mernuinercirluci, nauceciiyaraungraan quyurciyaraungraan-llu.

²²“Aturtura'aqluku-llu Nerevkariyaraa Quyurciyaram ayagnirqavci, quyurciluci mukaarkanek nauceciiqarraallerpecen̄ek. Talisvignun-llu Nerevkariyaraq aturaqluku uksuarmi atsanek avurraarluci.

²³“Pingayurqunek allrakumi tamarmeng angutevci tailuteng ciktaarviksartulararkaugaatnga wii, ATANEQ Agayutiit Israel-aat.

²⁴Anevkaumarikumki atanruvilget ciunerpecen̄ek anglikanirluku-llu nunakarci, kia tegungnaqngaitaa nunasi ukuni pingayuni agayunerpagni.

²⁵“Kelipanek quuleciralegnek elliiksaunaci tuquciaqavci ungungssinek wangnun. Ilakuaruvkaqsaunaku unuaqullranun kemgem ilii tuqucimalleq Kituutem Nerevkaritiini.

²⁶“Allamiaqan taitaqluci eniinun ATANREM mukaarkanek quyurteqarraallerpecen̄ek. “Keniqsaunaci-llu qusngiyagarnek aanaita milgitnek mirluki.”

²⁷ATANEQ qanertuq Moses-aamun, “Makut qaneryarat igaulluki, tua-i-wa makut qaneryarat aturluki akqut'liarkaungama elpenun Israel-aam-llu yuinun.”

²⁸Moses-aaq-llu tuantuq ernerni yuinaagni malrugni (40) unugtuumaita, nereksaunani meqsaunani-llu. Igartuq-llu igarviignun igaulluki qaneryarartai akqutem, tua-i-wa Qulen Alerquutet.

²⁹Moses-aaq atraami Ingrimek Sinai-amek tegumiaqluki Qulen Alerquutet nallullrua kegginami qitngirnaricia Agayun qalarutlermini.

³⁰Aaron-aam Israel-aam-llu yuin tangllermeggni Moses-aam kegginaa, qitngirnaqluni alingut ullallerkaanek.

³¹Tau͡gaam Moses-aam taisqen͞gateng, Aaron-aam tamarmeng-llu yuut ciuliqagtaita ullagaat, Moses-aam-llu qalarulluki.

³²Tamatum kinguakun tamarmeng Israel-aam yuin quyurrvikaat, Moses-aam-llu qalarutai tamalkuitnek ATANREM qalarutkellrinek ellminun Ingrim Sinai-am qaingani.

³³Moses-aam taqngami qalarutnermek kegginani patua.

³⁴Pelatekamun Agayuvigmun itraqami Moses-aaq qalarucarturluku ATANEQ, kegginani capailaraa anenatkaminun, an'aqami-llu yuut qalarut'larai ATANREM ellminun alerquutekellrinek.

³⁵Israel-aam-llu yuin tanglaraat Moses-aam kegginaa qitngirnaqluni. Taumek kegginani patumalaqii qalarucartunqiggnatkaminun ATANEQ.