Read Yupik Exodus 35 Bible Online

Exodus 35 - Yupik bible

Exodus 35

¹Moses-aam quyurtai tamalkuita Israel-aam yui qanrulluki-llu, “Makut maa-i ATANREM alerquutekellri elpecen̄un atuusqelluki:

²Ernerni arvinlegni caliarkaci caliaqeciqaci tau͡gaam erenret malrunelgat kencignarqellriaruciquq, erneq uitayaraq allakaumalria wangnun ATANERMUN. Yuk tuani ernermi calilria tuqucimaarkauguq.

³Uitavigpecen̄i-llu kenermek kumarcingaituci ernermi Sabbath-aami.”

⁴Moses-aam Israel-aam yui tamalkuita qanrutai, “Waten ATANEQ alerquriuq:

⁵Elliici ATANERMUN. Tamarmeng yuut piyuumilriit taiskilit ATANERMUN elliiluteng suulutaamek, tegglimek qerrirlimek wall'u punernermek;

⁶'lumarraqegtaarmek; qiuglimek, qesurlimek, kavirlimek-llu qusngit melqurritnek 'lumarrarmek; 'lumarrarmek-llu qusngirngalnguut melqurritnek piliaqumalriamek;

⁷qusngit angucalut amiitnek, kepcimalriamek kavirlimek; qecikegtaarnek; murakegtaarnek acacia-nek;

⁸kenurrat uqurkaitnek; avukusngalrianek mingugkanek tepkegcilrianek-llu aruvagkanek;

⁹teggalquqeqtaarnek-llu allanek-llu qevleqsagnek, ellimaarkanek agayulirten͞gunrem as'arcen̄ariinun qat'gailitamun-llu.

¹⁰“Tamarmeng angutet calitulit tailluteng piliaqerkaugait ATANREM alerquutekellri piliaqesqelluki:

¹¹Pelatekaq Agayuvik, elatiin iluan-llu qallirkai, negcii, enertai-llu, canirutai, naparyai naparyain-llu tusngallrit;

¹²Akqutem Yaassiiga, ayagatsuutekak, patua, capkutarkaa-llu;

¹³estuuluq, ayagatsuutekak, aklui-llu tamalkuita; kelipat-llu elliitekumalriit Agayutmun;

¹⁴kenurrarvik aklui-llu; kenurrat uqurtuumarmeng;

¹⁵aruviarvik tepkegcilrianek ayagatsuutek-llu; mingugkaq, narnirqellriit aruvagkat; capkutaa iteryaraan Pelatekam Agayuviim;

¹⁶ekuavik elliitnek, punerneret inguqerri tapeqluki, ayagatsuutek, aklui-llu tamalkuita; ermigcuun tusngavia-llu;

¹⁷capkutat umegkat, naparyait tusngallrit-llu; capa-llu umgem iteryaraan capii;

¹⁸Pelatekam umgem-llu acilitai ilavkui-llu; Pelatekam ilavkui capet-llu ilavkuit;

¹⁹tangnirqellriit-llu aturat agayulirtet atulararkait kevgiuraqameng Tanqilriami, kencignarqellriit aturarkai Aaron-aam agayulirtem qetunrain-llu.”

²⁰Tamarmeng Israel-aat ayagtut,

²¹tamarmeng-llu piyuumilriit taitut elliiluteng ATANERMUN, Pelatekam Agayuviim caliaqumallerkaanun. Taitut tamalkuitnek atuugarkanek agayukuneng agayulirtet-llu aturikatki aturyulrianek.

²²Tamarmeng-llu piyuumilriit angutet arnat-llu taitut kenugutnek pin-anek, aqlitnek, kulutnek, uyamignek, allanek-llu ayuqenrilngurnek qevleqsagnek, tunluki-llu elliitekluki ATANERMUN.

²³'Lumarraqegtaarnek-llu pilget taitut: qiuglinek, qesurlinek, kavirlinek-llu; qusngirngalnguut melqurritnek piliaqumalrianek 'lumarrarnek; aminek-llu kavircimalrianek, qecigkilngurnek-llu qatvianek.

²⁴Tamarmeng-llu piyugngalriit taitut qerrirlinek punernernek-llu elliitekluki ATANERMUN. Tamarmeng-llu murakegtaarautellget acacia-nek calianun aturarkanek taitut.

²⁵Tamarmeng-llu calitulit arnat taitut 'lumarraqegtaarnek yualukaitnek-llu qiuglinek, qesurlinek, kavirlinek piliallermeggnek.

²⁶Yualukiurluteng-llu cali qusngirngalnguut melqurritnek.

²⁷Ciuliqagtet-llu taitut teggalquqegtaarnek allanek-llu qevleqsanek qat'gailitami as'arcen̄a'armi-llu uitaarkanek,

²⁸ayuqenrilngurnek-llu tepkegcilrianek uqunek kenurrat uqurkaitnek, uqum mingugkam tepkegcilriit-llu aruvagkat pikaitnek.

²⁹Tamarmeng Israel-aam yui piyuumilriit taitut elliitekluki caliarkamun, ATANREM alerquutekellruciatun Moses-aakun caliaqesqelluku.

³⁰Moses-aaq-llu qanertuq Israel-aam yuinun, “ATANREM cucukaa Bezalel-aaq qetunraa Uri-m, tutgarii Hur-am, Judah-m ilakelriartainek.

³¹Agayutem piniminek imillrua piyugngarivkarluku umyuarturivkarluku elisngarivkarluku munarluku-llu caliyugngarivkarluku,

³²caliaqumaarkat uptellerkaatnun, aturluki suulutaat, qerrirlit, punerneret-llu;

³³teggalquqegtaaraat elliqainaurrluki; muriit-llu canaluki; tamalkuita-llu tangniriluki caliaqnarqellriit.

³⁴ATANREM-llu elitnauruteksugngarivkallrua caliyaraq allanun Bezazel-aankugnun Oholiab-aaq-llu, Ahisamach-am qetunraanun Dan-am ilakellgutkelriartainek.

³⁵Ayuqenrilnguut makut caliaqetukaitnek caliyugngarivkarak: cavignek tangnircaristet; 'lirqistet wall'u elucirkiuristet; 'lumarralistet 'lumarraqegtaarnek; qiuglinek, qesurlinek, kavirlinek-llu qusngit melqurritnek 'lumarrarnek; allanek-llu 'lumarrarnek. Caliaqsugngariakek caliarkat ayuqenrilnguut elucirkiuriyugngalutek-llu elluarrlutek.