Read Yupik Exodus 36 Bible Online

Exodus 36 - Yupik bible

Exodus 36

¹“Bezalel-aaq Oholiab-aaq-llu tamarmeng-llu allat munalriit ATANREM piyugngarivkallri umyuarturivkarluki-llu, caliaqsugngarivkarluki caliarkat piliaqellratni Agayuvik, caliarkaugut maligtaquluki ATANREM alerquutai.”

²Moses-aam taisqai Bezalel-aaq Oholiab-aaq-llu tamalkuita-llu allat ATANREM piyugngarivkallri, cali-llu piyugteqellriit ikayuucugluteng, ayagniisqelluki-llu caliarkait.

³Moses-aamek-llu akurturtut yuut elliitellritnek atu'urkanek Pelatekaq Agayuvik piliaqumallrani. Yuut tau͡gaam cali taqeksaunateng elliiguralartut unuaquaqan.

⁴Tua-i Pelatekam Agayuviim caliaqestain tamarmeng caliateng peggluki ullagluku

⁵Moses-aaq qanrutaat, “Yuut cali taiqu'rtut elliitnek cipluki aturarkat ATANREM caliaqesqellrinun.”

⁶Tua-i Moses-aam alerqurai tamaanelnguut elliinermek taqesqelluki Agayuvigkamun; tua-i yuut allanek taicinrirtut.

⁷Elliitellrit tamakut amllerameng ciptarkaurrluteng-llu caliarata qaqitellerkaanun.

⁸Tamarmeng munalriartaita tamakut calistet caliaqaat Pelatekaq Agayuvik. Piliaqaat-llu aturluteng qulnek 'lumarraqegtaarnek qilaumalrianek qiuglinek, qesurlinek, kavirlinek-llu qusngit melqurritnek, qaralilirluku-llu mingeqluku cherubim-aanek.

⁹'Lumarraat angtatkurluteng akimiarunrita'arnek yaaltanek taktaluteng malrugnek-llu yaaltagnek iqtutaluteng.

¹⁰Talliman mingqutait itulluki, talliman-llu allat cali tuaten mingqulluki itulluki.

¹¹Putulirlukek-llu qiuglimek 'lumarrarmek menglekenkun elalirnerkun tamarkenka.

¹²Yuinaak malruk qulmek cipluku (50) putuliraat ciuqliq, aipaa-llu cali tuaten ayuqellrianek putulirluku.

¹³Negciliut-llu yuinaak malruk qulmek cipluku (50) suulutaanek, tamakutgun itutarkaulukek mingqusngalriik malruk atauciurrlukek.

¹⁴Qilagkiuraat Pelatekaq Agayuvik qula ataucimek cipluku 'lumarrarnek qusngirngalnguut melqurritnek piliaqumalrianek.

¹⁵Piliaqait angtatekluki, akimiarnek yaaltanek taktaluki malrugnek-llu yaaltagnek iqtutaluteng.

¹⁶Tallimauluki itutait ataucimi arvinelguluki-llu allami aipaani.

¹⁷Putuliraat-llu yuinaak malruk qulnek cipluku (50) nangneqliat ataucim, yuinaq-llu qulmek cipluku (30) menglii allam.

¹⁸Negciliut-llu yuinaak malruk qulnek (50) punernernek, itutessuutekiurlukek patuk quyurrlukek patuulararkaurtellukek.

¹⁹Allagnek cali malrugnek patuliut atauciq qusngit angucaluita amiitnek kavircimalrianek, aipaa-llu qecigkilngurnek aminek elaqliuluku patuugarkaq.

²⁰Enertain napartait murakegtaarnek acacia-nek piliaqait.

²¹Atauciq naparta akimiarnek it'ganernek qertutaluni yuinaq-llu malrunlegnek cipluku (27) cetyaarnek iqtutaluni.

²²Tamarmeng-llu enertarkat cipnengqerturluteng itusvigkameggnek.

²³Ungalalirnera yuinarnek enerkiuraat,

²⁴yuinaagnek-llu malrugnek (40) qevlercetellrianek tusngallerkiurluki aciit, malruk itusngavigkak tamarkenka nayumiqavkarlukek.

²⁵Neglirnera-llu cali yuinarnek enerkiurluku,

²⁶yuinaagnek-llu malrugnek (40) qerrirlimek tusngallerkiurluki.

²⁷Tunua-llu kanavalirneq arvinlegnek enerkiurluku

²⁸malrutaarluki-llu kangirai.

²⁹Makut kangirain enri aciit kassuusngaut itukluteng-llu qulmun. Ukuk enrek kangiraagkenun malrugnun atulriik tuaten piliaqumauk.

³⁰Pingayunelguut enerkat, akimiaq-llu ataucimek cipluku qevlercetellriit tusnganret malruuqaqluteng ataucimi enermi.

³¹Akimiarnek-llu canirutnek piliut, murakegtaarnek acacia-nek, talliman ataucim canirneran enertain pikaitnek,

³²talliman-llu akiqliitnun talliman-llu kanavalirnermun iquanun.

³³Qukaatni canirun ellimaluni qukarluki naparyat, ayaumaluni-llu iquanek iqua tekilluku.

³⁴Qallilirait-llu enri suulutaamek, suulutaanek-llu kulutnek ellivikluki, ellissuutekluki canirutnun, cali patumalrianun suulutaamek.

³⁵Capkutarkiurtut 'lumarraqegtaarnek taqumalrianek, qiuglinek, qesuuranek, kavirlinek-llu, tangnircaumaluteng-llu mingqumalrianek cherubim-aanek.

³⁶Cetamanek-llu napakegtaarnek acacia-nek naparyarkiurait capkutat suulutaamek qaingit patuluki, suulutaanek-llu kulutnek elliivikluki, cetamanek-llu qevlercetellrianek tusngallerkiurluki.

³⁷Iteryaraa-llu capkutarkiurluku 'lumarraqegtaarmek qecigkilngurmek, taqumalriamek qiuglimek qesuuramek kavirlimek-llu, mingeqluku-llu tangnircaumaluni.

³⁸Uumun capmun tallimanek naparyarkiurtut, kulutnek ellivikluki, qallilirluki-llu kangrit qaingit-llu suulutaamek, tallimanek-llu punernernek tusngallerkiurluki naparyat.