Read Yupik Exodus 37 Bible Online

Exodus 37 - Yupik bible

Exodus 37

¹Bezalel-aam Akqutem Yaassiigek piliaqak murakegtaarnek aturluni, yuinaak malruk tallimanek cipluku (45) cetyaarnek taktalukek, yuinaq malrunlegnek cipluku cetyaarnek (27) iqtutarrlukek, yuinaq-llu malrunlegnek cipluku cetyaarnek (27) qertutarrlukek.

²Qallilirlukek-llu suulutaamek ilutuumakenka, suulutaamek-llu menglelirlukek kassutmun.

³Teguyarirlukek-llu cetamanek kulutnek suulutaanek, nunalgarrluki-llu cetamanun kanagainun malruulukek atunem avategkeni.

⁴Tegumiaqessuucirlukek-llu murakegtaraagnek acacia-gnek qallilirlukek suulutaamek,

⁵nuvullukek-llu kulutnun qacarnerani uitalrianun.

⁶Patulirlukek-llu suulutaarrlainarmek yuinaak malruk tallimanek cipluku (45) cetyaarnek taktarrluku, yuinaq-llu malrunlegnek cetyaarnek (27) iqtutarrluku.

⁷Malrugnek-llu mulut'uugumalriignek suulutaagnek cherubim-aagnek piliuq,

⁸atunem patum iquugken pikakegnek, taqlukek-llu patumun ilakliiyullukek.

⁹An'gilak cherubim-aak atunem caumallutek patum qaingani, yaqugkenka nengingalriik patumaluku.

¹⁰Estuuluq caliaqaa murakegtaarnek acacia-nek it'ganernek pingayunek taktarrluku, akimiaq pingayunek cipluku cetyaarnek iqtutarrluku, yuinaq-llu malrunlegnek cipluku cetyaarnek (27) qertutarrluku.

¹¹Qallilirluku suulutaamek, suulutaamek-llu menglelirluku.

¹²Qerrlulirluku pingayunek cetyaarnek iqtutarrluku kassutmun, qerrlua-llu menglelirluku suulutaamek.

¹³Cetamanek-llu suulutaanek kulutnek pikiurluku, elliluki-llu cetamanun kangirainun kanagain uitallritnun.

¹⁴Kulutet uitavigkakek tegumiaqessuutek takellriik ellimaut mengliin yaaqsinrilkiinun.

¹⁵Takellriik tegumiaqessuutek piliaqak murakegtaaraagnek acacia-gnek qallilirlukek-llu suulutaamek.

¹⁶Qantaliluni-llu suulutaanek estuulum pikainek: saskat, caqut, ilutulriit-llu wine-anun elliitnun assigtarkat.

¹⁷Kenurrarviliuq-llu suulutaarrlainarmek, tusngallra napartii-llu suulutaamek mulut'uugumalriamek piliaqlukek; tangnircautai naunraat, tapeqluki naugaaraat, qikmiruarit-llu atauciurnerurrluki.

¹⁸Arvinlegnek avayangqerrarkauluni akiqliqellrianek, pingayutaarlutek avategkeni.

¹⁹Atauciq avayaq pingayunek tangnircautengqerraqluni naunraruanek elucingqerrluteng almond-aatun pet'ngelriatun naugaarluteng qikmiruarluteng.

²⁰Napartii tangnircautengqerrluni cetamanek naunrarnek almond-aatun elucilegnek naugaariluni qikmiruarluni-llu.

²¹Naugaaralriartangqerraqluni ataucimek aciat tamarmeng pingayutaaraat avayat.

²²Naugaaraat, avayat, kenurrarvik-llu atauciurneruluteng piliaqumaut mulut'uugumalriamek suulutaamek.

²³Kenurrarvik atauciq malrunlegnek kenurrarciraa, kenurriurcuutait-llu uqurviit-llu piliaqai suulutaamek.

²⁴Aturluni suulutaamek yuinaat pingayun akimiarmek (75) uspernek, piliaqellrui kenurrarvik aklui-llu.

²⁵Ekuavik piliaqaa murakegtaarmek acacia-mek, ekuavigkaq tepkegcilriamek. Yaassiigenqegtuq akimiaq pingayunek cipluku cetyaarnek taktaluni, akimiaq-llu pingayunek cetyaarnek iqtutaluni, ataucimek-llu yaaltamek (1 yard) qertutaluni. Pugumalriit qaingan kangiraini ilakliiyusngaluteng ekuavigmun.

²⁶Qallilirluku-llu qainga, qacarneri, pugumallrit-llu suulutaamek. Menglelirluku-llu suulutaamek kassutmun.

²⁷Malrugnek-llu suulutaagnek kulutegnek ellivikluku akiqliqellrianek mengliin acianun, nuvusngassuutekagkenek muriik ayagatsuutekaan.

²⁸Ayagatsuutekak-llu muriik piliaqak murakegtaaraagnek acacia-gnek, qallilirlukek-llu suulutaamek.

²⁹Kenciknarqellriamek-llu mingugkamek uqumek piliuq, narnirqellriamek-llu aruvagkamek, tepkegcautetun ayuqluku avukusngalriamek.