Read Yupik Exodus 38 Bible Online

Exodus 38 - Yupik bible

Exodus 38

¹Ekuagiluni elliivigkaq piliaqaa murakegtaarmek acacia-mek. Yaassiigenqegtuq, malrunlegnek avek-wa it'ganernek taktaluni, malrunlegnek-llu avek-wa it'ganernek iqtutaluni, cetaman-llu avek-wa it'ganernek qertutaluni.

²Qaingan-llu kangiraini pugumalriit piliaqai atauciurnerurrluki ekuavigmun, nutaan-llu qallilirluki punernermek.

³Ekuaviim-llu aklui tamalkuita piliaqai: qantat, qanikciurutet, ilutulriit-llu qantat, negciit, kenrem-llu assigtai. Tamarmeng makut aklui taqumaut punernermek.

⁴Inguqit'liuq punernernek elliluku-llu mengliin acianun, ekuaviim avga tekisngaluku.

⁵Cetamanek-llu kulutnek teguyarirluku, elliluki-llu cetamanun kangirainun.

⁶Murakegtaaraagnek-llu acacia-gnek tegumiaqessuutekiurluku, qallirrlukek punernermek.

⁷Kulutnun-llu nuvullukek avategkeni ekuaviim. Ekuavik taqumauq tuskanek ilua imaunani.

⁸Punerneq-llu ermigcuun piliaqaa, punerneq-llu inguqerra tarenriurutaitnek arnat iteryarami kevgiulriit tuani Pelatekami.

⁹Pelatekaq Agayuvik capkiuraa 'lumarraqegtaarmek, ungalalirnermi yuinaak malruk qulmek cipluku (50) yaaltanek taktaluni.

¹⁰Nayumiqasterluni yuinarnek punernernek naparyanek yuinarnek-llu punernernek tusnganerluteng, negcignek-llu nuvucirluki qevlercetellrianek.

¹¹Capa neglirnermi ayuquq tuaten.

¹²Kanavalirnermi-llu captangqertuq yuinaq tallimanek (25) yaaltanek taktaluteng, qulnek naparuterluni, qulnek-llu tusnganerluteng negcigluteng nuvuterluteng-llu qevlercetellrianek.

¹³Calaralirnermi-llu iteryarami yuinaq tallimanek (25) yaaltanek iqtutalriamek captangqertuq.

¹⁴Avategkeni iteryaram captangqertuq malrunelgen avegmek yaaltanek capmek. Pingayunek naparterluni pingayun-wa tusnganret.

¹⁶Tamarmeng capet kassutmun piliaqumaut 'lumarraqegtaarmek.

¹⁷Naparyat tusngallrit piliaqumaut punernernek. Negciit, nuvutait, naparyat-llu kangrit qalliliumaut qerrirlimek. Tamarmeng-llu naparutai avatiini itusngaluteng qerrirlinek nuvutnek.

¹⁸Iteryaram-llu capkutaa piliaqumauq 'lumarraqegtaarmek, qilaumaluni qiuglimek qesuuramek kavirlimek-llu, mingeqluku tangnircaumaluni. Taktaluni qulnek yaaltanek, pingayuak avguluku yaaltanek, qertutaluni capiitun mengliin.

¹⁹Naparuterluni cetamanek, punernernek cetamanek tusnganerluteng. Negciit, naparyat-llu kangrita patuit nuvutait-llu piliaqumaut qerrirlinek.

²⁰Acilitai tamarmeng Pelatekam avatiin-llu capain piliaqumaut punernernek.

²¹Waniwa igausngallrit amllertaciita atullret caviit Pelatekamun qemangqaviagnun igarviik teggalquk. Taukugni Qulen Alerquutet igausngaut. Moses-aam alerqurai igautesqelluki, ukut-llu Levite-at tamana caliaqluku, calillermeggni ayuqucirtuasterluteng Ithamar-amek, qetunraanek Aaron-aam agayulirtem.

²²Bezalel-aam, qetunraan Uri-m, tutgariin Hur-am, Judah-m ilakellgutkelriartainek, caliaqellrui cat tamalkuita ATANREM alerquuciatun.

²³Ikayurtii Oholiab-aaq, qetunraa Ahisamach-am, ilakellgutkellriartainek Dan-am, tangnircautelisten͞guuq elucirkiurten͞guluni, 'lumarraqegtaarnek-llu 'lumarristen͞guluni, qiuglinek, qesuuranek, kavirlinek-llu.

²⁴Tamarmi suulutaaq ATANERMUN tunumalleq, kenciknarqellriamun Pelatekamun Agayuvigmun, uqamangqertuq uspernek tiissitsaak malruk yuinaat-llu qulngunritaraat akimiarmek cipluki (2,195), uqamaltassiariaqameng cuqciyaraat aturluku.

²⁵Qerrirlit nunanek naaqumallernek uqamaltaut uspernek malrunelgen tiissitsaat, tiissitsaam-llu avga yuinaak malruk qulmek ciplukek (7,550).

²⁶Waten amllertalria akiliutekelqaat yuut naaqutngullret naaqumallratni, tamarmeng cuq'liumacirteng tekilluku akiliriluteng. Usperilauciat taum nalliini cuqekluku waten akiliutait amllertaut. Tiissitsaam avga, yuinaat-llu talliman pingayunek cipluni tiissitsaat, tiissitsaam avga, yuinaagnek malrugnek qulnek cipluni (603,550) angutet yuinarmek allrakungelriit wall'u ak'allaunrulriit tuani waten amllertaut naaqutngullret.

²⁷Qerrirlimek, malrunelgen avegmek cipluku tiissitsaanek (7,500) uspernek atullruut yuinarnun tallimanun tusngallrinun Pelatekam capet-llu; yuinaat pingayun akimiarmek (75) uspernek aturaqluteng ataucimun tusngallermun.

²⁸Uitaqalria yuinaak malruk qulmek cipluku (50) usperet, qerrirliq aturluku Bezalel-aaq nuvutnek pilillruuq negcignek-llu naparyat pikaitnek kangrit-llu qallilirluki.

²⁹Punerneret-llu ATANERMUN tunumallret uqamangqertut, talliman tiissitsaat yuinaat-llu akimiaq qulmek (5,310) uspernek.

³⁰Tamatumek tusngallerkiurai Pelatekam iteryaraanelnquut; punerneq ekuavik ingugerri-llu, ekuaviim-llu aklui,

³¹acikai-llu kassutmun capiin, capem-llu iteryaraan, tamalkuita-llu acilitai Pelatekam avatiin-llu capiin.