Read Yupik Exodus 39 Bible Online

Exodus 39 - Yupik bible

Exodus 39

¹Qiuglinek, purple-aanek, kavirlinek-llu piliaqait tangnirqellriit aturat, agayulirtet atulararkait kevgiuraqameng Tanqilriami. Pilillruat Aaron-aaq agayulirten͞gulriit aturaitnek ATANREM alerquuciatun Moses-aaq.

²As'arcen̄a'ar piliaqaat 'lumarraqegtaarmek qiuglimek, qesuuramek, kavirlimek-llu; suulutaamek yualirluku.

³Mulut'uugtut saanermek suulutaamek, kepurluku-llu amililuku caliaqsunariluku nuvucunariluku 'lumarraqegtaarmun, qiuglinun, qesuuranun, kavirlinun-llu qusngit melqurritnun.

⁴Tusailiciut-llu malrugnek as'arcen̄araam pikagkenek ellilukek-llu qacarneregkenun ituksugngarivkarlukek.

⁵Tupinqeggluni taqumalria naqugun piliaqumalria, au͡gkut ayuqaitnek ellimauq as'arcen̄a'armun atauciurnerurrlukek, tua-i ATANREM alerqullruciatun Moses-aaq.

⁶Teggalqut-llu kavircetellriit carnelian-aat uptait elliluki-llu suulutaanek tusngallirluki. Tamakunun munallerteng aturluku cetrutait Jacob-aam qetunrain qula malrugnek cipluku atrit.

⁷Elliit tusailitagkenun as'arcen̄araam umyuaqutnguvkarluki qula malrugnek cipluku ilakutellriartainun Israel-aam, ATANREM alerquuciatun Moses-aaq.

⁸Piliaqaat qat'gailitaq aturluteng atullermeng ayuqaitnek as'arcen̄a'ar piliaqellermeggni, qaralii-llu ayuqluki.

⁹Yaassiigenqegtuq tapingaluni qulngunrita'arnek cetyaarnek taktaluni qulngunrita'arnek-llu cetyaarnek iqtutaluni.

¹⁰Nalleqliqellrianek cetamainek teggalquqegtaarnek ellivikaat qainga: Ciuqliit ruby-mek, topaz-aamek, garnet-aamek-llu.

¹¹Tungliit-llu, emerald-aaq, sapphire-aq, diamond-aaq-wa.

¹²Pingasuingit-llu, turquoise-aq, agate-aq, amethyst-aaq-wa.

¹³Cetamaingit-wa, beryl-aaq, carnelian-aaq, jasper-aaq-wa. Makut tusngavingqertut suulutaanek.

¹⁴Teggalqut atauciuqaqluteng igaumaluteng Jacob-aam qetunrain iliita atranek nallunailkuciumaluki qula malrugnek ilakellgutkelriartai Israel-aam.

¹⁵Qat'gailitaq kalivniyagarkiuraat suulutaamek qipumalriamek pelacinagtun.

¹⁶Suulutaanek-llu tusngallerkiurtut, malrugnek-llu kulutegnek, ellilukek-llu kulutek kangiraagkenun qulirnerani qat'gailitam.

¹⁷Qillrutagket-llu malruk suulutaak pelaciniik kulutegnun.

¹⁸Iqukek-llu qillrullukek tusngallerkiuragnun suulutaagnun. Waten piluteng nunalgartagket manulirnekegnun tusailitagken as'arcen̄araam.

¹⁹Malrugnek-llu kuluteliut suulutaagnek ellilukek-llu kangiraagkenun atlirnerani qat'gailitam, ilulirneregkenun mengliin as'arcen̄araam tunglirneranun.

²⁰Cali allagnek kulutegnek piliut, ellilukek-llu atlirneranun manulirneragnun tusailitagken as'arcen̄araam, mallgeskiinun mingqumallran, quliinun-llu naqugutem.

²¹ATANREM alerquuciatun Moses-aaq qillrutait kulutai qat'gailitam kulutainun as'arcen̄araam qiuglimek pelacinagmek qillrucirluki, as'arcen̄araam qaingani uitavkarluku qulirnerani naqugutem tuaken au͡g'artarkaunrirluku.

²²Aturaq as'arcen̄a'armun iluqliuluni atulararkaq tamarmi taqumauq qiuglimek piliaqumalriamek 'lumarrauluku qusngit melqurritnek.

²³Pugyaraa allegyailkuciumaluni merigngalriamek kassutmun.

²⁴Akua-llu kassutmun ellivikumaluni atsarpaguanek 'lumarraqegtaarmek, qiuglinek, qesuuranek, kavirlinek-llu, akunlirturaumaluteng kuluk'uunarnek suulutaanek, ATANREM alerqullruciatun Moses-aaq.

²⁷Keggatekiurluki-llu aturanek Aaron-aaq qetunrai-llu,

²⁸qamiqurrit-llu nemerkiurluki nacaliluki-llu, mamkilngurmek-llu 'lumarrarmek qerrullililuki nanilngurnek,

²⁹qukait-llu nemerkiurluki 'lumarraqegtaarmek qiuglinek, qesuuranek, kavirlinek-llu tangnircarluku-llu mingeqluku, ATANREM alerqullruciatun Moses-aaq.

³⁰Tangnircaun-llu piliaqaat, kencignarqellria nallunailkutaa allakaumalriim ATANERMUN kevgauluni. Tauna suulutaaruluku qaingakun-llu igarluku, “Allakaumalria ATANERMUN.”

³¹Qillrutaat-llu manulirneranun qamigurran nemrutaanun qillrucirluku qiuglimek pelacinagmek, ATANREM alerquuciatun Moses-aaq.

³²Pelatekam caliaqumallra qaqiqurainartuq. Israel-aat caliaqellruit cat tamalkuita ATANREM alerqullruciatun Moses-aaq.

³³Taitait-llu Moses-aamun aklui tamalkuita: negcii, enertai, qerarutai, naparyai, tusngallret,

³⁴amit-llu kavircimalriit patukai, qeciit-llu qecigkilnguut, capkutarkat-llu.

³⁵Akqutem-llu Yaassiiga teggalqugnek igarviignek imalek, naparyai-llu patua-llu.

³⁶Estuuluq-llu aklui-llu, kelipat-llu elliitngullret Agayutmun,

³⁷kenurrarvik-llu suulutaarrlainaq, kenurrai-llu, tamalkuita-llu aklui, uquq-llu kenurrain uqurkaat;

³⁸suulutaaq-llu ekuavik, uquq-llu mingugkaq, narnirqellria-llu aruvagkaq, capkutaa-llu iteryaram.

³⁹Punerneq-llu ekuavik, punerneret-llu inguqerri, naparyai, aklui-llu tamalkuita; ermigcuun-llu tusnganraa-llu.

⁴⁰Capkutai-llu elaqliim, naparyai, tusnganrit-llu, capkutaa-llu iteryaraan elaqliim ilavkui-llu; Pelatekam-llu acilitai, cat-llu atuugarkat Pelatekamun Agayuvigmun;

⁴¹tangnirqellriit-llu aturait agayulirtet atulararkait Tanqilriami, kenciknarqellriit-llu aturait Aaron-aam qetunrain-llu.

⁴²Israel-aat caliaqellruit tamalkuita ATANREM alerqullruciatun Moses-aaq.

⁴³Moses-aam-llu yuvrirai cat tamalkuita, tangerrluki-llu caliaqumaciit tamalkuita ATANREM alerquuciatun. Moses-aam-llu atawaqercetai.