Read Yupik Exodus 4 Bible Online

Exodus 4 - Yupik bible

Exodus 4

¹Moses-aam kiugaa ATANEQ, “Ukveqngaitaatnga niisngaunii-llu. Waten-llu qanruciiqaatnga, ‘ATANREM alairvikellrunritaaten.’”

²Tua-llu ATANREM aptaa, “Cauga tauna tegumian?” Kiugaa, “Ayaruuguq.”

³ATANREM-llu pia, “Egesgu nunamun.” Egcani-llu ayaruq ciissirpaurtuq Moses-aam-llu qimagluku.

⁴Cali-llu pia, “Yaggluten teguu pamyuakun.” Tua-i Moses-aam yaggluni tegua ataam-llu ayaruurrluni.

⁵Qanrutaa-llu ATANREM, “Waten piluten Israel-aanun nallunaiqiu ATANEQ Agayutiit ciuliarita, Agayutii Abraham-aam, Isaac-aam, Jacob-aam-llu alaillrucia elpenun.”

⁶ATANEQ cali elliinun qanertuq, “Unateten aturarpet ilulirneratnun elliki.” Moses-aam tua-i unatni aturami ilulirneratnun pii. Maaten antai mamyuilngurmek apqucingartellinilriit qaterluteng qanikcartun.

⁷Tua-llu Agayun qanertuq, “Ataam elliki aturarpet iluatnun.” Tuaten-llu piuq maaten antai assirillinilriit allatun qaingatun ayuqluteng.

⁸Agayun qanertuq. “Ukveqenrilkatgen wall'u umyugaat pektenrilkan ciuqlirmun irr'inarqellriamun, uum tayima asgurayunrirceciiqai.

⁹Ukveqerkaunrilkatkek ukuk malruk irr'inarqelriik, niitarkaunrilkatgu-llu qanellren, mermek Nile-amek piluten nunamun kuvkiu augurrniartuq.”

¹⁰Tau͡gaam Moses-aaq qanertuq, “Qang'a, Ataneq, ayagcecaqunii. Puqilriarunritua, puqigeksaunii-llu qanellgutkengrraanerpenek. Qanyuliunritua, cukaunani-llu qanelqa.”

¹¹ATANREM qanrutaa, “Kia-mi piliaqellruagu yuum qanra wall'u qanyuirutelluku wall'u niicuirutelluku wall'u tangerrsaurtelluku wall'u cikmirtelluku? Wang'unrituq-qaa ATANEQ?

¹²Kitak ayii, ikayurciqamken qanerkiurluten-llu qallacet'larciqamken.”

¹³Tau͡gaam Moses-aam kiugaa, “Qang'a ATANEQ, ataki allamek ayagceci.”

¹⁴Wani ATANREM qenqerrutaa Moses-aaq qanerluni, “Anelguten-mi Aaron-aaq Levite-aq? Nallunritaqa assirluni qantuuq. Atam wani-wa, paircartuqiiten angnirciquq-llu tangerquniten.

¹⁵Qanellgutekniaran qanrulluku-llu camek qallatarkaucianek. Ikayurciqamtek tamarpetek qanrutkarkarpetegnek, qanruciiqamtek-llu qaillun pillerkarpetegnek.

¹⁶Ellii qanertekciqan qalaruciiqai-llu yuut. Elpet-llu Agayutetun ayuqeciquten elliinun, qanerkiuraqluku.

¹⁷Man'a ayaruq malikniaran; aturluku irr'inarqellrianek pilarciquten.”

¹⁸Tua-llu Moses-aaq utertuq cakiminun Jethro-mun qanrulluku-llu, “Ataki utercessnga tungayamnun Eqypt-aami paqluku cali unguvaciat.” Jethro-m tua-i pisqaa tua-ingunrituurluku-llu.

¹⁹Moses-aaq cali Midian-aamelnginanrani ATANREM qanrutaa, “Uterten Egypt-aamun imkut tuqutessaagteten tamarmeng tuquut.”

²⁰Tua-i Moses-aam nuliani qetunrani-llu malikluki, ciulviit qaingitnun piluki, ayagtut Egypt-aamun ayaruq tegumiaqluku Agayutem ang'aqesqellra.

²¹Cali Agayutem qanrutaa Moses-aaq, “Ut'reskuvet Egypt-aamun pinritevkenak irr'inarqellrianek piniartuten Pharaoh-m ciuqerrani, pinimek cikillrucimtun tuaten pisqelluten. Tau͡gaam Pharaoh asvairuceciiqaqa yuut-llu ayagcessngaitai.

²²Waten, Wii ATANEQ, qanernilua Pharaoh qanrutniaran, ‘Israel-aaq wii yung'eqarraarutkaqa.

²³Qanrutellruyaaqamken qetunraqa ayagcetesqelluku, elliinun kevgiuresqellua, tau͡gaam niitellrunritarpenga. Taumek yung'eqarraaruten wani-wa tuquciiqekeka.’”

²⁴Egypt-aamun ayallrani qavartaqarraarvigmi ATANREM Moses-aaq pairtaa tuqutessaagluku-llu.

²⁵Tau͡gaam nulirran Zipporah-m ipellriamek teggalqumek tegulluni qetunrani nuugirraarluku tauna agtuutaa Moses-aam it'gainun.[4] Piciryaraa nuugiryaram pitekluku qanrutaa Moses-aaq, “Ilumun augkun uinguuten wangnun.” Tua-i ATANREM Moses-aaq tuqutenricen̄araa.

²⁷Tuani ATANEQ qanellruuq Aaron-aamun, “Ayii maramun ullagluku Moses-aaq.” Tua-i ullagaa tangerrsarturluku kenciknarqellriami ingrimi tangrramiu-llu cingarluku.

²⁸Moses-aam-llu canek tamalkuitnek qanrutaa ATANREM qanellrinek Egypt-aamun utertesqellerminiu; qanrulluku-llu irr'inarqellrianek ATANREM pisqellrinek.

²⁹Tua-i Moses-aankuk Aaron-aaq-llu ayagtuk Egypt-aamun quyurtelluki-llu tamalkuita Israel-aat ciuliqagtait.

³⁰Nutaan-llu Aaron-aam qanrutai canek tamalkuitnek ATANREM qanellrinek Moses-aamun. Cali-llu Moses-aam tamalkuita irr'inarqellriit piluki ciuqerratni yuut.

³¹Yuut ellait ukvertut, niicamegteggu-llu ATANERMUN paqtellrucirteng, tangellrucia-llu nangcimacirteng cikluteng nanraraat ATANEQ.