Read Yupik Exodus 40 Bible Online

Exodus 40 - Yupik bible

Exodus 40

¹ATANEQ qanertuq Moses-aamun,

²“Ciuqliim iralum erenrin ciuqliatni, napareskiu Pelatekaq.

³Iluanun-llu ellilukek Akqutem Yaassiigek imalgek Qulnek Alerquutnek, capkutamek-llu capluku.

⁴Estuuluq-llu itrulluku aklui-llu qainganun nek'eggluki; cali-llu kenurrarvik itrulluku kenurrai-llu elliluki.

⁵Elliluku-llu suulutaaq ekuavik aruviarnek manuanun Akqutem Yaassiigan, agarrluku-llu Pelatekam iteryaraan capii.

⁶Elliluku-llu ekuavik elliitnek ciuqerranun Pelatekam.

⁷Elliluku-llu ermigcuun akuliignun Pelatekam ekuaviim-llu, mermek-llu imirluku.

⁸Elliluku-llu avatiin capkutaa, agarrluku-llu iteryaram capii.

⁹“Nutaan-llu naaqilluku allakarluku Pelatekaq tamalkuita-llu aklui, mingugluku kencignarqellriamek uqumek, tua-i tanqilriaruciquq.

¹⁰Tungiikun naaqitniaran allakarluku ekuavik tamalkuita-llu aklui, mingugluku, tua-i tanqilriaruqapiarciquq.

¹¹Cali-llu naaqilluku allakarluku ermigcuun tusngallra-llu, au͡g'utun pillrucirpetun.

¹²“Tailluku-llu Aaron-aaq qetunrai-llu Pelatekam iteryaraanun, mermek-llu erurluki.

¹³Aturarluku-llu Aaron-aaq agayulirtet aturaitnek, mingugluku-llu naaqilluku allakarluku, kevgiurniaraanga agayulirten͞guluni.

¹⁴Qetunrai-llu tailluki, keggatnek-llu at'elluki.

¹⁵Mingugluki-llu, atiit mingullrucirpetun, kevgiurniaraatnga agayulirten͞guluteng. Mat'um minguumallrata agayulirten͞guvkarciqai, ayagluni allakaumallrat kinguvritnun kinguverkaitnun-llu ukanirpak.”

¹⁶Moses-aam caliaqai cat tamalkuita ATANREM alerquuciatun.

¹⁷Tua-i iralum ciuqliim erenrin ciuqliatni, allrakum aipaani, Egypt-aaq unitellermeng kinguani, Pelatekaq naparcimallruuq.

¹⁸Moses-aam ellillrui tusnganri, enertai, canirutai, naparyai-llu naparrluki.

¹⁹Pelatekam-llu qallia saggluku, elaqlia-llu cali elliluku, ATANREM alerquuciatun.

²⁰Tua-llu teggalquk malruk teguak igarviik eklukek-llu Akqutem Yassiiganun. Tegumiaqessuutek-llu nuvullukek kulutegnun Yaassiigmi patua-llu elliluku qaingagnun.

²¹Itrullukek-llu Pelatekamun capkutaq-llu agarrluku. Waten piluni capkucirak Akqutem Yaassiigek, ATANREM Alerquuciatun.

²²Estuuluq-llu itrulluku neglirnermun capem elatiinun,

²³qainganun-llu elliluki kelipat elliitngullret ATANERMUN, ATANREM alerquuciatun.

²⁴Kenurrarvik-llu ellia Pelatekam iluanun, ungalalirnermun estuulum akianun,

²⁵tuani-llu ATANREM takuani kenurrat kumartai, ATANREM alerquuciatun.

²⁶Suulutaaq-llu ekuavik itrutaa Pelatekamun elliluku-llu capem manuanun,

²⁷kumarrluku-llu narnirqellria aruviar, ATANREM alerquuciatun.

²⁸Agarrluku-llu Pelatekam iteryaraan capii.

²⁹Manuanun-llu capem ellia ekuavik, tuani-llu ekuagarkat mukaarkat-llu ekualuki, ATANREM alerqullruciatun.

³⁰Elliluku-llu ermigcuun akuliignun Pelatekam ekuaviim-llu, mermek-llu imirluku erurissuutekamek.

³¹Moses-aam, Aaron-aam-llu qetunrain-llu erularait unateteng it'gateng-llu tuavet,

³²itraqameng Pelatekamun wall'u ekuavigmun, ATANREM alerquuciatun.

³³Moses-aam-llu napartaa kassutmun capii Pelatekam ekuaviim-llu, capem-llu iteryaraan capii. Tua-i piarkani tamalkuan qaqitaa.

³⁴Tua-llu amirlum Pelatekaq patua, qitngirnarqellriim-llu ATANREM tanqian imiraa Pelatekaq Agayuvik.

³⁵Tuaten pian Moses-aaq iterciigatuq Pelatekamun.

³⁶Israel-aam yui pektaullermeggni, upalartut uitavimeggnek amirluq tau͡gaam nalugaqan Pelatekamek.

³⁷Amirlum tuantellran taktaciatun uitalartut nunameggni.

³⁸Israel-aam yuin ayagallermeng taktaciatun tanglaraat ATANREM tuanlucian amirlua. Tauna amirluugaqluni erenrani quliini Pelatekam unugmi-llu kenruluni.