Read Yupik Exodus 5 Bible Online

Exodus 5 - Yupik bible

Exodus 5

¹Tua-llu Moses-aankuk Aaron-aaq-llu ullagaak Pharaoh qanerlutek-llu, “ATANEQ Agayutiit Israel-aat qanertuq, ‘Yuunka ayagceski nerevkarin aturniaraat yuilqumi wii piteklua.’”

²Tau͡gaam Pharaoh-m piak, “Kituuga ATANEQ? Ciin wiinga niilluku ayagcecarcia Israel-aat? Wiinga nalluaqa ATANEQ, Israel-aat-llu ayagcessngaitanka.”

³Moses-aankuk-llu kiuguk, “Agayutiit Hebrews-aat alaillruuq wangkugnun. Ayagceskut ernerni pingayuni yuilqumun ekuagiluta piicallerkamten̄un ATANERMUN Agayutemten̄un, pinrilkumta tuqucuaraakut cangerlagkun wall'u anguyagkun.”

⁴Pharaoh qanertuq Moses-aankugnun, “Ciin yuut ukut taqevkarcetki! Caliaritnun utercetki! Ataam caliyarturcetki!

⁵Elpeci amllenrurtuci Egypt-aarmiuni. Wani-wa tau͡gken elpetek calinermek taqevkarluki.”

⁶Taumi ernermi, Pharaoh-m Egypt-aarmiut, teguat qaunqestait, Israel-aat-llu atanerruarit, picirkirai:

⁷“Canegnek cikinqigcaqunaciki teggalquliarita avukaitnek. Ellaitnek wak'nirnek canegtelangevkaqiciki.

⁸Tau͡gaam piliaqelallrita amllertaciit cakanircetevkenaki, ikeglicaryaqunaciki. Qacigcameng qalartut, ‘Ayagceskut ekuaginiartukut Agayutemten̄un.’

⁹Cakviuqanircelluki calivkarciki calinaurtut niicugnivkenateng qannguanek piciunrilngurnek.”

¹⁰Tua-i teguat murilkestaita Israel-aat-llu atanerruarita anluteng qanrutait Israel-aat, “Pharaoh waten qanertuq, ‘Canegnek cikirngairutamceci teggalqulissuutekarpecen̄ek.

¹¹Elpecen̄ek ayagluci aqvataqluci pisqelluci, tau͡gaam piliaqelallerpeci amllertataitnek cali pililarciquci.’”

¹²Tua-llu yuut ayagaut tamiinun Egypt-aamun yuarluteng canegnek.

¹³Teguat-llu murilkestaita cingait, teggalqulivkarluki ciungani piliaqelallrita amllertataitnek canegnek pikangqelallracetun.

¹⁴Murilkestaita-llu Egypt-aarmiut kaugtualarait Israel-aat calilriit atanerruarit ellaita taqelteng aptaqluki, “Ciin teggalqulinriceci ciungani pilallerpeci amllertataitnek?”

¹⁵Tua-llu atanerruarit Israel-aam yuin, Egypt-aam angayuqra ullagluku qanemyuugartut, “Ciin waten pisikut, wangkuta elpet pistevni?

¹⁶Canegnek cikiumaksaitukut, tau͡gken cali teggalqulisqumaluta kaugtuarumaluta tuaten. Elpet tau͡gaam yut'en pinarqelriaruut.”

¹⁷Pharaoh kiuguq, “Elpeci qessanqerruuci caliyuumiinaci-llu, taumek kaigauci wangnun ayagcecesqelluci, ekuagiluci ATANERMUN piicagyugluci.

¹⁸Watua caliyarturci, canegnek cikiumangaituci, tau͡gaam teggalqulilarciquci amllertataitnek pilallerpecetun ciungani.”

¹⁹Atanerruat tua-i elpekaat arenqiallugucirteng qanrucateng ciunganitun ernerpak taqlermeng amllertataitnek teggalqulilarciqniluki.

²⁰Anngameng Pharaoh-mek tekitagket Moses-aankuk Aaron-aaq-llu, utaqalriik.

²¹Qanrullukek-llu, “ATANREM tangerrluku caliartek anucimirqecetaaqilitek, eq'uyagucecavtekut Pharaoh-mun atanerruarinun-llu, tuquciluugutkangevkarluki wangkutnek.”

²²Moses-aam-llu ATANEQ ataam tuiggvikluku qanertuq, “Ciin assiitellriamek mat'umek yugpenun pisit? Ciin-llu wiinga maavet ayagcecia?

²³Wani-wa-llu ullaggaanemnek Pharaoh qalarulluku-llu pisqucirpetun, yut'en assiinaki pinga'artai, elpet tau͡gken camek ikayuutekaatnek piksaunaki.”