Read Yupik Exodus 6 Bible Online

Exodus 6 - Yupik bible

Exodus 6

¹Tua-llu ATANEQ Moses-aamun qanertuq, “Tangrrarkaugaten piarkanka pikumki Pharaoh-mun. Wiinga umyugaa aksangraan cingciqaqa pegtevkarluki yuunka. Ilumun ayagcetetngurciiqai cingluki nunaminek.”

²Agayutem Moses-aaq qanrutaa, “Wiinga ATANRUUNGA.

³Alailallruunga Abraham-aamun, Isaac-aamun, Jacob-aamun-llu, Pinilriarulua Agayun, tau͡gaam wangnek nallunaillrunritua ellaitnun tanqilriakun atemkun ATANERKUN.[5]

⁴Akqut'lillgutkellruanka akeqluki-llu Canaan-aam nuniinek cikirciqniluki, nunamek uitavikellratnek allanruluteng.

⁵Cali-llu wiinga niitellruaqa yuuniarallrat Israel-aat Egypt-aarmiunun teguarulriit, umyuaqluku-llu wiinga akqutkelqa.

⁶Taumek waten qanruski Israel-aam yui, ‘Wiinga ATANRUUNGA; aviuciiqamci teguarunrirtelluci Egypt-aarmiunun. Talliqa pinilria nalugciqaqa anirturluci, anucimirqecetaarun-llu alingnarqelria ellaitnun tuc'etarkauluku.

⁷Nakmiin yuksaguciiqamci. Agayutkeciqerpecia-llu. Nallunrirciqerci ATANRUCIQA Agayutsi teguarunrirceskumci Egypt-aarmiunun teguarullerpecen̄ek.

⁸Ayauciiqamci nunamun piciulua akqutkellemnek cikiutekciqniluku Abraham-aamun, Isaac-aamun, Jacob-aamun-llu; cikiutekciqaqa elpecen̄un nakmiin piksagutelluku. Wiinga ATANRUUNGA.’”

⁹Man'a Moses-aam qanrutkaa. Tau͡gaam niicugniyuumiitaat, tua-i-wa umyugait navgumiimeng calirpagcecimallermegteggun.

¹⁰Tua-llu ATANEQ qanertuq Moses-aamun,

¹¹“Ullagluku Pharaoh qanrusgu, Israel-aanun-gguq man'a nunii unitelliu.”

¹²Tau͡gaam Moses-aam kiugaa, “Israel-aarung'e'rmeng niicugniyunritaatnga, ciin-mi tua-i Pharaoh-m niicugniyartanga? Qalartelqa elluatuuksaitelartuq.”

¹³ATANREM alerqurak Moses-aankuk Aaron-aaq-llu: “Qanertek Israelite-anun Pharaoh-mun-llu alerqurnilutek wangnun anutesqelluki Israel-aam yui Egypt-aamek.”

¹⁴Reuben-aaq, Jacob-aam yung'eqarraarutii qetunrangqertuq cetamanek: Hanoch, Pallu, Hezron, Carmi-llu; makut maa-i Reuben-aam ilai.

¹⁵Simeon-aaq qetunrangqertuq arvinlegnek: Jemuel, Jamin, Ohad, Jachin, Zohar, Shaul-aaq-llu qetunraa arnam Canaan-aarmium. Makut maa-i Simeon-aam ilai.

¹⁶Levi-aq qetunrangqertuq pingayunek: Gershon, Kohath, Merari-llu. Levi-aq yuullruuq allrakuni yuinaat arvinelgen akimiaq malrugnek cipluku (137).

¹⁷Gershon-aaq malrugnek qetunrangqertuq: Libni, Shimei-aq-llu. Taukuk amllernek kinguvengqellruuk.

¹⁸Kohath-aq cetamanek qetunrangqertuq: Amram, Izhar, Hebron, Uzziel-aaq-llu. Kohath-aq yuullruuq yuinaat arvinelgen qula pingayunek cipluku (133).

¹⁹Merari malrugnek qetunrangqertuq: Mahli Mushi-llu. Ukuk ilakellriartaqak Levi-am ilakluki kinguveteng.

²⁰Amram-aaq nulirtullruuq atami nayagaanek Jochebed-aamek. Taumi qetunrangqertuq Aaron-aamek Moses-aamek-llu. Amram-aaq yuullruuq yuinaat arvinelgen akimiaq malrugnek cipluku (137).

²¹Izhar-aq pingayunek qetunrangqertuq: Korah, Nepheg, Zichri-mek-llu.

²²Uzziel-aaq-llu pingayunek qetunrangqertuq: Mishael, Elzaphan, Sithri-llu.

²³Aaron-aaq nulirtullruuq Elisheba-mek, Amminadab-aam panianek, Nahshon-aam anelgutiinek. Taumi qetunrai: Nadab, Abihu, Eleazar, Ithamar-aq-llu.

²⁴Korah-llu pingayunek qetunrangqertuq: Assir, Elkanah, Abiasaph-aaq-wa. Ukut ilakellriit Korahite-at ciuliaqait.

²⁵Eleazar-aaq, Aaron-aam qetunraa, nulirtullruuq Putiel-aam paniin iliitnek, tuani-llu qetunrangqertuq Phinehas-aamek. Makut tusngavikait yuungnaqellriit ilakellriartain Levi-am yuin.

²⁶Ukuk wani-wa Aaron-aankuk Moses-aaq-llu ATANREM qanrutellrek, “Ciuliqagteki Israel-aam yui Egypt-aamek.”

²⁷Elkenka-llu Pharaoh qanrutellruak Israel-aat teguarunrircetesqelluki Egypt-aami.

²⁸ATANREM Moses-aaq qalarutlermini Egypt-aami

²⁹qanellruuq, “Wiinga ATANRUUNGA. Qanrusgu Pharaoh tamalkuitnek qanllemnek.”

³⁰Tau͡gaam Moses-aam kiullrua, “Nallunritan qalartelqa elluatuunrituq, qaillun Egypt-aam angayuqran niiciiqanga?”