Read Yupik Exodus 7 Bible Online

Exodus 7 - Yupik bible

Exodus 7

¹ATANEQ qanertuq, “Agayucetun ayuqlirivkarciqamken Pharaoh-mun anelgutvet-llu Aaron-aam qalaruciiqaa prophet-aarpetun.

²Qanrusgu Aaron-aaq tamalkuitnek pisqellemnek, elliin-llu Pharaoh qanrutniaraa Israel-aat ayagcetesqelluki nuniinek.

³Tau͡gaam Pharaoh asvairuceciiqaqa niicugningaitaatek-llu qaillun pitalrianek alingnarqellrianek irr'inarqelrialing'e'rma Egypt-aami. Nutaan-llu arcaqalriamek anucimirqecetaarutmek piciqaqa Egypt-aaq, anulluki-llu yuunka tamaaken nunamek.

⁵Egypt-aarmiut nutaan tangerciqaat ATANRUCIQA talliqa nalukumku inglulirluki, anulluki-llu Israel-aat tamaaken nuniitnek.”

⁶Tua-i Moses-aankuk Aaron-aaq-llu piuk ATANREM pisquciatun.

⁷Qalarutellragnek nalliini Moses-aaq allrakungellruuq yuinarnek cetamanek (80) Aaron-aaq-llu yuinaat cetaman pingayunek cipluku (83).

⁸Moses-aankugnun ATANEQ qanertuq,

⁹“Pharaoh-m qanruskatek nallunairesqellutek irr'inarqelrialiarpetegnegun, Aaron-aaq qanruskiu ayarua egtesqelluku Pharaoh-m ciuqerranun, ciissiurrniartuq.”

¹⁰Tua-i-llu Moses-aankuk ayagtuk Pharaoh-mun ATANREM-llu pisquciatun pilutek. Aaron-aam-llu ayaruni egtaa ciuqerratnun Pharaoh-m atanerruarin-llu, ciissiurrluni-llu.

¹¹Tua-llu Pharaoh-m taisqai umyuartulriit irr'inartaatulit-llu, taukut-llu caqtaarluteng Aaron-aankuk pillrak ayuqeliluku.

¹²Ayaruteng egtait, ciissiurrluteng-llu, tau͡gaam Aaron-aam ayaruan igai ayaruit.

¹³Tau͡gaam cali Pharaoh asvaituq. ATANREM tua-i qanellratun Pharaoh-m niicunritak Moses-aankuk.

¹⁴ATANREM Moses-aaq qanrutaa, “Pharaoh nutaan asvairutuq, ayagcecuumiinaki yuut.

¹⁵Ullakit'gu Pharaoh unuakumi Kuigmun Nile-amun atraqan ang'aqluku ayaruq ciissiurtelleq, utaqaniartek kuigem cen̄iini.

¹⁶Waten qanerniartuten elliinun, ‘ATANREM Hebrews-aat Agayutiita taivkallruanga qanrutesqelluten yun'i ayagcetesqelluki kevgiuresqelluni ellaitnun yuilqumi. Elpet tau͡gaam una tekilluku niicunrituten.

¹⁷Waten ATANEQ qanertuq, nallunrirciqan-gguq Atanrucia maaggun waten pillratun: wiinga kaugturciqaqa Nile-am mer'a tegumiamnek ayarumek, augurtelluku.

¹⁸Neqet tuquciqut, Kuik-llu Nile-aq cakneq tepngiciquq, tepii anagucan Egypt-aarmiut merciigaciiqut tamaaken.’”

¹⁹ATANEQ cali qanertuq Moses-aamun, “Aaron-aaq qanrusgu, ‘Ayarun teguluku yagusgu quliitnun kuiget, kuiliat, nanvat-llu Egypt-aami, mer'at augurrniartuq; augtangqerciquq tamiini Egypt-aami, tamalkuita-llu assigtani muragni qikuni-llu.’”

²⁰Moses-aankuk-llu piuk ATANREM pisquciatun ciuqerrani Pharaoh-m pistain-llu. Aaron-aam nalugaa ayaruni kaugturluku-llu Nile-am mer'a, mer'a-llu tamarmi augurrluni.

²¹Neqet kuigmi tuquut tepii-llu cakneq assiilan Egypt-aarmiut merciigatut tamaaken, augtangluni-llu tamiini Egypt-aami.

²²Tua-llu Pharaoh-m irr'inartaartai ayuqiinek tuaten piut caqtaaryarateng aturluki, elliin-llu asvaitellra cakaninrituq. ATANREM tua-i qanellruciatun Pharaoh-m niicunritak Moses-aankuk.

²³Pharaoh-llu utertuq eneminun umyuarniurutkevkenaku-llu tamana.

²⁴Egypt-aarmiut tua-i elagluteng kuigem mengliikun merkangengnaqut merciigalameng kuigem mer'anek.

²⁵Malrunelgen-llu erenret pellugtut ATANREM augurcetraanranek kuik.