Read Yupik Exodus 8 Bible Online

Exodus 8 - Yupik bible

Exodus 8

¹Tua-llu ATANREM qanrutaa Moses-aaq, “Ullagluku Pharaoh qanrusgu waten ATANEQ qanerniluku, ‘Yuunka ayagceski agayularniartut wangnun.

²Tuaten pinrilkuvet nunan cangerlagnun tuc'eciiqaqa, peleqpel'e'rnun patuvkarluku.

³Nile-amun quyurciiqut peleqpelraat tamaaken-llu nugluteng iterciqut enevnun, inarrvigpenun, inglerpenun, enaitnun-llu atanerruarpet, yugpenun-llu uucirivigpenun tuaten, uucissuutnun-llu.

⁴Qecngaaciqut qaivnun cali-llu yuut atanerruat-llu qaingitnun.’”

⁵ATANEQ qanertuq Moses-aamun, “Qanrusgu Aaron-aaq, ayarua naluusqelluku quliitnun kuiget, kuiliat, allat-llu mermek imalget, nugevkarluki tamaaken peleqpelraat patuluku tamalkuan Egypt-aaq.”

⁶Aaron-aam-llu naluaku ayaruq quliitnun mer'et, peleqpelraat nug'ut tamaaken patuluku nuna.

⁷Angalkut-llu tuunriluteng tuaten cali pillruut peleqpelraat nugevkarluki nunamun.

⁸Tua-llu Pharaoh-m Moses-aankuk Aaron-aaq-llu taisqak qanrullukek-llu, “Piicagtek ATANERMUN au͡gaasqelluki makut peleqpelraat wiinga-llu yuut ayagcetnianka, ekuagiluteng elliiniartut ATANERMUN.”

⁹Moses-aam kiugaa, “Nallunricetniarpenga tau͡gaam qaku piicaucesqumacirpenek, elpet, yut'en, pisteten-llu, peleqpelraat piunriisqelluki elpecen̄ek enevcen̄ek-llu nangluki, Nile-amelnguut kiingita uitaqertelluki.”

¹⁰Pharaoh-m kiugaa, “Unuaqu piicauskia.” Moses-aam-llu pia, “Pisqutacirpetun piciqua nallunriisqelluten allamek agayucetailucianek ATANERTUN Agayutemcetun ayuqellriamek.

¹¹Peleqpelraat ayagciqut enevcen̄ek nunavcen̄ek-llu, Nile-amelnguut tau͡gaam uitaqerluteng.”

¹²Tua-llu Moses-aankuk unitaak Pharaoh. Moses-aaq-llu piicagtuq ATANERMUN au͡gaasqelluki peleqpelraat tuc'etellri Pharaoh-mun.

¹³ATANEQ-llu Moses-aam piicauciatun piuq. Peleqpelraat-llu tuquagut eneni enet-llu avataitni yuilqumi-llu.

¹⁴Egypt-aarmiut-llu quyurtait qerturiluki, nuna-llu tepengluni tamakut tepaitnek.

¹⁵Egypt-aarmiut angayuqrata tangrramiki peleqpelraat tuqulliniata asvairtuq ataam. ATANEQ-llu qanellruciatun niicuumiitak Moses-aankuk.

¹⁶ATANEQ-llu qanertuq Moses-aamun, “Aaron-aaq qanrusgu ayarua nunamun kaugtuutesqelluku, Egypt-aam nuniini tamalkurmi urr'aq melugyaraurrniartuq.”

¹⁷Tua-i Aaron-aam kaugturaa nuna ayaruminek tamarmi-llu Egypt-aami urr'aq melugyaraurtuq patuluki yuut ungungssit-llu.

¹⁸Angalkut-llu tuunrilaryaaqut melugya'rnek alaircecingnaqluteng tau͡gaam pisciiganateng. Nani-llu tamiini melugyaraat arenqialiut.

¹⁹Angalkut qanertut Pharaoh-mun, “Agayutem man'a pilqaa.” Tau͡gaam Pharaoh umyuamikun asvairiami ATANREM qanellruciatun niitenritak Moses-aankuk Aaron-aaq-llu.

²⁰ATANEQ qanertuq Moses-aamun, “Makcara'arluten unuaqu utaqakina Egypt-aam atanran atrallerkaanek kuigmun. Tangerquvgu qanrutniaran waten qanerniluku ATANEQ, ‘Yuunka ayagceski agayuniartut wangnun.

²¹Waniwa aarcirturamken. Pinrilkuvet anucimirqecetaarciqamken ayagcecilua ciivagnek elpenun, atanerruarpenun, yugpenun-llu. Egypt-aarmiut enait muirciqut ciivagnek nuna-llu tamalkuan patuluku.

²²Goshen-aami tau͡gaam pitangqerrngaituq. Yum'a uitaviat ciivagtangqerrngaituq. Waten piciqua nallunritesqelluci wiinga ATANEQ calilriaruciqa maani nunami.

²³Maaggun allakaumaciqut yuunka yugpenek. Una irr'inarqelria piciquq unuaqu.’”

²⁴ATANREM-llu ciiviit tekicetai amlleqapiaraat eniinun Egypt-aam angayuqran pistain-llu enaitnun, tamalkuan-llu Egypt-aarmiut nuniit ciiviit navguraat.

²⁵Tua-llu Pharaoh-m taisqak Moses-aankuk Aaron-aaq-llu qanerluni-llu, “Ayagluci ekuagiyarturci Agayutevcen̄un maani nunami.”

²⁶Moses-aaq qanertuq, “Assirngaituq tuaten pikumta. Tua-i-wa Egypt-aarmiut cangayugciqngata ungungssinek ekuagikumta ATANERMUN Agayutemten̄un. Tuaten pilaucirput tangerqunegteggu teggalqunek miluquluta tuquciiqaitkut.

²⁷Ernerni pingayuni ayayunarqukut yuilqumun ekuagiyarturluta ATANERMUN Agayutemten̄un pisquciatun elliin.”

²⁸Tua-llu Pharaoh qanertuq, “Ayagceciiqamci ekuagiyarturtelluci ATANERMUN Agayutevcen̄un yuilqumi yaaqvanun ayagngailkuvci. Piicauskicia.”

²⁹Moses-aam-llu pia, “Ayaumarikumta piicagciqua ATANERMUN unuaqu ciivagnun unitesqelluten, atanerruaten, yut'en-llu. Tau͡gaam iqluunqigcaqunak ayagcetevkenaki ukut yuut ekuagillerkaatnun ATANERMUN.”

³⁰Moses-aam-llu unilluku Pharaoh piicagtuq ATANERMUN.

³¹ATANEQ-llu Moses-aam pisquciatun piuq. Ciiviit unitaat Pharaoh, atanerruari, yui-llu, atauciunge'rmi ciivak uitavkenani.

³²Tau͡gaam cali wani Pharaoh ataam asvairtuq yuut-llu ayagcetevkenaki.