Read Yupik Exodus 9 Bible Online

Exodus 9 - Yupik bible

Exodus 9

¹ATANEQ qanertuq Moses-aamun, “Ullagluku Pharaoh qanrusgu wiinga, Hebrews-aat Agayutiitni, waten qanernilua, ‘Yuunka ayagceski agayuniartut wangnun.

²Qunukenqigeskuvki ayagcecuumiinaki

³anucimirqecetaarciqamken, ungungssiuteten cangerlagmun tuknilriamun tut'elluki, elussitarpenun, ciulvagpenun, qulugtellrianun, kuluvagnun, qusnginun, qusngirngalngurnun-llu.

⁴Allakaumalriatun Israel-aat ungungssiutait piciqut Egypt-aarmiut piitnek; Israel-aam yuin ungungssiutait tuqungaunateng.

⁵Wiinga ATANEQ pillerkiurtua unuaqu man'a piarkauluku.’”

⁶Unuaquan-llu ATANEQ tuaten piuq; tamarmeng Egypt-aarmiut ungungssiit tuquluteng. Israel-aat tau͡gken ungungssiit atauciunge'rmi tuquvkenani.

⁷Tua-i Pharaoh-m paqcetai, tangerrluku-llu Israel-aat ungungssiit atauciunge'rmi tuqunritlinilria. Tau͡gaam Pharaoh cali asvailami yuut ayagcecunritai.

⁸Tua-llu ATANEQ qanertuq Moses-aankugnun Aaron-aaq-llu, “Amllenrilngurmek unatem imaanek qamllermek teguskitek kaminiamek. Taukut Moses-aam eggniarai qulmun ciuqerrani Pharaoh-m.

⁹Kavyakinani urraurciiquq cekavvluni Egypt-aam nuniinun tamalkuan, aninguarurrluteng-llu callanrurrluteng qaingitni yuut ungungssit-llu.”

¹⁰Qamllermek kaminiamek pirraarlutek, ullagluku nangertuk Egypt-aam atanran ciuqerranun. Moses-aam-llu qamlleq egtaa qulmun, aninguarurrluteng-llu callanrurrluteng qaingitni yuut ungungssit-llu.

¹¹Angalkut-llu taisciigatut ciuqerranun Moses-aam aninguarameng, aninguat naungaceteng Egypt-aarmiut tamarmeng.

¹²Tau͡gaam cali ATANREM Pharaoh umyugaakun asvairutevkaraa, ATANREM-llu qanellratun niicuumiinakek Moses-aankuk.

¹³Moses-aaq cali ATANREM qanrutaa, “Makcara'arluten unuaqu Pharaoh qanruskiu ATANEQ, Agayutiit Hebrews-aat, qanerniluku waten, ‘Yuunka ayagceski agayuniartut wangnun.

¹⁴Nutaan wani-wa anucimirqecetaarngaitanka kiingita atanerruaten yut'en-llu, tau͡gaam elpet-llu tapqulluten anucimirqecetaarciqanka, nallunritesqelluten allatailucianek wangtun ayuqellriamek ellarpiim iluani.

¹⁵Tua-i-wa ak'a cangerlagmun tuc'etellruyaramci tamarpeci piunrircelluci.

¹⁶Tau͡gaam una pitekluku unguvavkaramken: pinimnek nasvitnaluten atqa-llu niitnausqelluku nunami tamalkuan.

¹⁷Tau͡gaam cali ucuryagtuten ayagcecuumiinaki-llu yuunka.

¹⁸Uum nalliini unuaqu cakneq kavcirceciiqaqa, Egypt-aam piurteqarraallranek ayagluni una engelkarrluku tuaten pitaksailngurmek.

¹⁹Ellimeqlirluten ungungssiten cat-llu tamalkuita ellamelnguut itertesqelluki talilluki, kavtiit igciiqngata yugnun ungungssinun-llu ellamelngurnun, itrucimanrilnguut tuqulluki.’”

²⁰ATANREM qanellran atanerruat ilait alingenga'arcetai pisteteng-llu ungungssiuteteng-llu itrulluki talilluki.

²¹Ilaita tau͡gaam pamatekenritait ATANREM aarcirtuutai, teguateng ungungssiteng-llu ellami uitalluki.

²²ATANEQ-llu Moses-aamun qanertuq, “Yageski unateten qilatmun kavcirniartuq Egypt-aam nuniinun tamalkuan yugnun, ungungssinun, tamalkuitnun-llu naucetaarvignun.”

²³Moses-aam-llu ayaruni yagutaa qilatmun; ATANREM-llu kalliravkaraa kavcirtelluku, kalluk kenerpallagaluni nuna tekitaarluku.

²⁴ATANREM-llu cakneq kavcircetaa kalluk-llu kenerpallagaluni kavtiit akuliitgun, kavcirluni caknerpak, Egypt-aami tuaten pitaksailngurmek atanruviurqaanranek.

²⁵Cat tamalkuita ellamelnguut kavtagpiim iqutai, yuungraata ungungssiungraata-llu; naucetaarvigni-llu naumalriit caunrirluki, napat-llu tamalkuita ayemqelluki.

²⁶Goshen-aam tau͡gaam nunii Israel-aat uitaviat kiimi kavcirpek'nani.

²⁷Tua-llu Pharaoh-m Moses-aankuk Aaron-aaq-llu taisqak qanrullukek-llu, “Wiinga assiilngirtua. ATANEQ piciulriamek piuq. Wiinga yuunka-llu alangqaukut.

²⁸Piicagtek ATANERMUN, amlleriuq kallillra kavcillra-llu. Ayagcetarkaurtamci maanelngairutuci.”

²⁹Moses-aam-llu qanrutaa, “Anumarikumta nunarpagnek unatenka nalugluki piicagciqua ATANERMUN. Kalluk arulairciquq kavtairulluni nallunriisqelluten nuna ATANERMUN pikucianek.

³⁰Tau͡gaam nallunritua elpet atanerruaten-llu qigcigyaguteksaitarci ATANEQ Agayun.”

³¹Naunraat-llu malruin ayuqenrilnguut piunrirtut, aipait qecugnariameng aipait-llu naugaarluteng.

³²Mukaarkat tau͡gaam piunrinritut kinguqvaggun qecugnarilaameng.

³³Moses-aam-llu unitaa Pharaoh anluni nunarpagnek, unatni-llu nalugluki piicagluni ATANERMUN. Kallinrirtuq kavcinrirluni-llu ellarvanrirluni tuaten.

³⁴Tau͡gaam Pharaoh tangllermini ellallinrian kavcinrirluni-llu kalluk-llu arulairluni, ataam cali assiilngirtuq atanerruartuumarmi umyuamikun asvairiluni.

³⁵Tua-i-am ATANREM ciunguluku qanrutkellruciatun Moses-aakun, Egypt-aam angayuqran Israel-aam yui ayagcecuumiitai.