Read Yupik Job 1 Bible Online

Job 1 - Yupik bible

Job 1

¹Angucetangqellruuq Uz-am nuniini[1] aterluni Job-amek; tauna-llu angun canganarqutaituq nangrunaunani-llu, qigcikilriaruluni Agayutmek, mulngakelriaruluni assiilnguum atullerkaanek.

²Qetunrangqellruuq-llu malrunlegnek panigluni-llu pingayunek.

³Tiissitsaanek malrunlegnek (7,000) qusngiutengqertuq, tiissitsaanek-llu cali pingayunek (3,000) qulugnelegnek ungungssiuterluni, tiissitsaanek-llu (1,000) kuluvagnek, tiissitsaam-llu avganek (500) ciulvagnek. Amllerrluteng-llu pistai; taumek una angun tukuunrullrulria yugni calarami.

⁴Qetunrai-llu nerevkarilartut pitaarluteng, iliit piaqami nerevkariaqluni taivkarluki tamalkuita anelgutni, kelegturaraqluki-llu taukut pingayun arnat anelguteteng.

⁵Nerevkarillrata unuaquani Job-aq unuakuarmi makluni ekuagilartuq irniami amllertataitnek menuircarnaluki. Waten piuralartuq umyuarteqngami iliit pitsaqevkenani assiilngillruyukluku Agayutmun, wall'u umyuamegteggun aniqlaaluku Agayun.

⁶Erneq tekican qilagmiut[2] Agayutem ciuqerranun ullautellerkaat tangercetnaluteng, tuunrangayak taukut ilakellruat.

⁷ATANREM aptaa tuunrangayak, “Naken taisit?” Tuunrangayiim-llu kiugaa, “Tarratellemnek ayagalua nunam qaingani.”

⁸ATANEQ-llu qanertuq tuunrangayagmun, “Murilkellruan-qaa pisteka Job-aq? Nunam qaingani ayuqaituq, canganarqutaunani nangrunaunani-llu. Elliin qigcikaanga mulngakellriaruluni-llu assiilnguum atullerkaanek.”

⁹Tuunrangayiim-llu kiugaa, “Camek-qaa unangutkeksailkuniu Job-am cali qigciksaraaten?

¹⁰Avatairumalriatun ayuqan camun pivkaqsaunaku ellii, ilai, aklui-llu. Callra tamalkuan atawaqercet'laran tukuurrluni-llu.

¹¹Tau͡gaam cairuteskuvni cauluten aniqlaayaraaten!”

¹²Tua-llu ATANREM qanrutaa tuunrangayak, “Job-am cautai tun'anka elpenun qaillun piyugtacirpetun pisqelluki, tau͡gaam ellii akngirteqeryaqunaku.” Tuunrangayak-llu ayagluni ciuqerranek ATANREM.

¹³Erenret iliitni qetunrai panii-llu nerellratni merluteng-llu anngaqlikacaameng eniini,

¹⁴qaneryartulria taiguq aqvaqurluni Job-amun qanrulluku-llu, “Kuluvagngalngurnek qimugcirluta nunamek itumciinanemten̄i, ciulviit-llu yaaqsigpek'nateng nernginanratni,

¹⁵alqunarmek Sabean-aat[3] curukarait teguluki-llu tamalkuita. Tuqurqelluki-llu tamalkuita pisteten. Wiinga tau͡gaam kiima qimagtua qanrucarturluten-llu.”

¹⁶Tauna-llu qanrinanrani alla taiguq qanerluni, “Kalluum kenran tuqutai qusngit qusngiliurtet-llu nangluki; wiinga kiima qimagtua qanrucarturluten-llu.”

¹⁷Tauna-llu cali qanrinanrani alla taiguq qanerluni, “Chaldean-aat[4] pingasuirrluteng alqunaq curugaitkut, ungungssit-llu qulugnelget teguluki, tuqurqelluki-llu pisteten. Wiinga-llu kiima qimagtua qanrucarturluten-llu.”

¹⁸Cali tauna qanrinanrani, alla pista taiguq qanerluni-llu, “Qetunraten paniten-llu nernginanratni anngaqlikacagaam eniini,

¹⁹anuqerpiim yuilqum tungiinek cayukarluni ena uitaviat imtaa nanerluki-llu ayagyuat tuqulluki. Wiinga kiima anagtua qanrucarturluten-llu.”

²⁰Tua-i-llu Job-am nangerrluni ulikutani allguraa qamiquni-llu qiurluku nuyairulluku. Nunamun-llu cikluni agayuluni.

²¹Qanerluni, “Caunii yuurtellruunga, caunii cali tuquciqua. ATANEQ cikiqengellruuq waniwa-llu tegulluni. Nanraumali ATANEQ!”

²²Tuaten pimange'rmi Job-aq assiilngillrunrituq, Agayun-llu tut'esteksugnaunaku.