Read Yupik Job 11 Bible Online

Job 11 - Yupik bible

Job 11

¹Tua-llu Zophar-aaq Naamathite-aq kiuguq,

²Kia-qaa kiungaitai makut caunrilnguut? Qanrumallran-qaa yuk ellualriarurceciiqaa?

³Job-aaq, qannguarutvet-qaa yuut nepairciqai? Picingssautekikuvet-llu iliita-qaa kasnguyugcessngaitaaten?

⁴Qanravet qanellren elpet piciuniluku; Agayutem-llu tangellrani canganarqutaitniluten.

⁵Umyuaqa-tuq tua-i aturluku Agayutem tungaunani kiuliten!

⁶Qanrucaqiiten umyuartuyaraq amllerteggun piyarauniluku; ilait taringellerkaat yugmun arturnaqluni. Nallunrilkiu-llu man'a; Agayutem nangteqevkaraaten pinarqellren nurrluku.

⁷Nallunriryugngaan-qaa qailluqapiar Agayutem pinian, angtacian-llu pitaciak?

⁸Agayutem qilak engelkenritaa, qailluitung'e'rpet taringengaitan. Agayutem nallunritaa tuqumalriit nuniit, elpet tau͡gaam nalluan.

⁹Agayutem angtacia pivigtunruuq nunami, iqtunruluni-llu imarpigmi.

¹⁰Agayutem tegukaten qanercetaarvigmun-llu ayaulluten, kia arulaircartau?

¹¹Agayutem nallunritai naliit yuut catngunriluciit; tanglarai tamalkuita assiilnguut caliarit.

¹²Tau͡gaam usviilnguut yuut umyuarturiciqut, yuilqurmiutaat ciulviit anlangkata aanameggnek nuyurrunateng.

¹³Job-aaq, umyualinqigten. Yaggvikiu Agayun,

¹⁴Assiilnguq unatevni uitakan, pegesgu yaaqvanun, assiitellria-llu uitavkarpek'naku enevni.

¹⁵Nutaan tuani kegginan ciugciiqan canganarqutaunak, cacetuciquten, alingengaunak-llu.

¹⁶Nalluyaguciiqan nangteqellren; umyuaqumanrirciquq mertun ul'rraarluni entellriatun.

¹⁷Unguvan tanqinruciquq akertem tanqiani erenrem qukallrani, unguvam-llu tan'gercetenqurraullri ciqinqerciqut unuakuartun.

¹⁸Elluiluten yuuciquten neryuniurutmek muirumaluten; Agayutem camun piyailkuciumaciqaaten mernuirucelluten-llu.

¹⁹Inareskuvet cam alingevkarngaitaaten; amllellriit yuut ikayurcetaalarciqut elpenun.

²⁰Tau͡gaam assiitellriit yuut nanikualuteng yuaraciqut; tangerciqaat-llu nau͡gg'un anagvigkartailucia. Kiingan neryuniurutkeciqaat nangnermek aneryaalteng.