Read Yupik Job 12 Bible Online

Job 12 - Yupik bible

Job 12

¹Tua-llu Job-aq kiuguq,

²Nallunailngurmek yuut qanertekaiceci. Tuqukuvci, umyuartuneq tuquciquq maliggluci.

³Tau͡gaam wiinga taringyugngaunga elpecicetun; aciqsinrunritua elpecen̄i; tamalkuita qalartelci yuut tamarmeng nallunritait.

⁴Yugnikestekengramteng maa-i temcik'laraatnga; temciyulartut, ellualriarung'e'rma pinarqutaileng'e'rma-llu; tau͡gaam avani pellullermi Agayutem kiulallrui piicautenka.

⁵Camek arenqiallugutaituci, tau͡gken wiinga anglaniteklua; yagtarci yuk iquqatalria.

⁶Teglengalriit tau͡gken agayutailnguut-llu uitanqegciluteng yuulartut, Agayutem-llu eq'urcetaartai elluarrluteng uitalartut, kiingan tememeng pinillra agayutkeng'e'rmegteggu.

⁷Yaqulgung'e'rmeng ungungssiunge'rmeng-llu amllernek avalingqertut elpecen̄un elitnauruteksugngakmeggnek;

⁸apciki nunam imarpiim-llu ungungssii umyuartutiitnek.

⁹Tamarmeng nallunritaat ATANREM unatainun piliaqellrucirteng.

¹⁰Agayutnguuq piliallmi unguviita nirtuutestiit; yuut-llu unguviit elliin piniani uitauq.

¹¹Alungutevci neqnirtassiaryulauciatun neqkanek, tuaten-llu ciutek niicunqelartuk qaneryaranek.

¹²Umyuartuneq yugni ak'allaurtellriani uitauq, Agayun tau͡gaam umyuartuuq artuqaunani-llu. Yuut ak'allaurtellriit taringumaut; Agayun taringumauq piningqerrluni-llu cat qaillun piyukuniki piyugngaluki.

¹⁴Agayun piunririkan, kia nautenqigcugngangaitaa, itercikan kia ancugngangaitaa?

¹⁵Nuna kinlaraa Agayutem ellallirceteksaitaqaku; ul'ura'aqluni-llu meq nuqinganritaqaku.

¹⁶Agayun pinirtuq cirlakirrlainaraqluni-llu; tamarmek iqluurumalria iqluurtii-llu elliin piniani uitauk.

¹⁷Tegularaa atanirturtet umyuartuciat, ciuliqagcilriit-llu usviilngurtun ayuqlirivkarluki.

¹⁸Angayuqat angayuqaunrircet'larai itengqalriarurcelluki-llu;

¹⁹ellmikutuurcet'larai agayulirtet yuut-llu pinilegpaulriit.

²⁰Yuut cacetuqutekek'ngait nepairtelarai, teguaqluki-llu ak'allaurtellriit umyuartuciit.

²¹Qigcignairut'larai angayuqat, piniarucetaqluki-llu atanirturilriit.

²²Tuqutun-llu tan'gercetqapiaralria tanqigivkalaraa.

²³Atanruviit pinirivkalarai anglirivkarluki-llu, tua-i tau͡gken cirlakluki piunrirluki-llu.

²⁴Ciuliqagtait usviilnguurcet'larai ayagavkarluki-llu piciatun uunguciinaki nanluciinaki-llu;

²⁵caavtaalartut tan'germi taangiqellriatun-llu ayalualuteng.