Read Yupik Job 13 Bible Online

Job 13 - Yupik bible

Job 13

¹Iigma man'a tamalkuan tangellruak, ciutegma-llu niitellruluku taringluku-llu.

²Ca nallunrilkeci, wiinga-llu nallunritaqa, aciqsinrunritua elpecen̄i.

³Tau͡gaam qaneryugyaaqua Artuqailngurmun, pingnatukengaqa-llu pitekluku qanellguteksugaqa Agayun.

⁴Elpeci nallumacirci nallunarcalaraci iqluquluci; yungcaristetun ayuquci assirivkarisciigalngurtun.

⁵Nepaunaci-tuq tua-i uitaqerci, nepaitellerci umyuartuteksararci.

⁶Niicugnici qanrutkellemni pitka, niilluki-llu qerrlugemkun taqsuarirlua kaigatenka.

⁷Piciuvkenaci-qaa qanerten͞guciquci Agayutmun, qallarrluci-llu iqluurcelluku?

⁸Ellii-qaa ingluliurutengnaqerci, Anagyaaquciiqerci-qaa Agayun qanercetaarvigmi?

⁹Canganarqutaicartuci-qaa Agayutem yuvriqaci? Wall'u-qaa iqluyugngaaci, yuum yuullgutminek iqluurilauciatun?

¹⁰Pitalqeggluci piksaitellerci iirumangraan, pinritevkenani elliin kitugciiqaaci.

¹¹Ucurnarqucian-qaa alingevkarngaitaaci, civuuranarqellra-llu-qaa elpecen̄un tusngaituq?

¹²Elpeci qanruyuceci qamllertun ayuqut catnguvkenateng; anagyaaquceci-llu navegyukaaralriatun qikutun ayuqut.

¹³Nepaiteqerci, wiinga qanqernaurtua, tua-i ca wangnun piyukuni piniartuq.

¹⁴Upingaunga unguvaka qevtellerkaanun.

¹⁵Neryuniurutairutua, tua-i-mi cayarta Agayutem tuquskanga; Qanrutkeqataraqa pitka elliinun.

¹⁶Alingitellma anirturyugngayallianga, kina imna yuk assiitellria watqapik Agayutem ciuqerranun pingailan.

¹⁷Niicugnikiciki murilkelluki nalqigutenka.

¹⁸Uptellruaqa pingnatukengaqa nallunrilamku wii alangqanriluciqa.

¹⁹Agayun, taiqatartuten-qaa pinarqut'liryarturlua? Tuaten pikuvet, upingaunga nepaunii tuqunalua.

²⁰Piteklircetqernga malrugnek; umyuallguciuskina, iingnaqenritniartua elpenun;

²¹anucimirqecetaarpiiqnii, elpenek-llu civuurallemnek alingevkanrilnga.

²²Agayun, qanra ciumek, wiinga-llu kiuciqamken. Wall'u wii qanercessnga, elpet kiuniarpenga.

²³Caugat assiilnguunka? Canek alartellrusia? Canek alerquutnek navgillemnek pinarqut'liumasia?

²⁴Ciin ulurasia, inglukestevtun-llu ayuqullua?

²⁵Alingevkaryugngaan-qaa tengeskii napam cuyaa malirqeraluku-llu kinreskii caranglluk?

²⁶Paivciuten cungaqitnarqellrianek pinarqutnek wangnun, ayagyuallemni tuaten assiilnguut atullrenka piluki.

²⁷It'ganka kalivnerciraten, murilkelaran-llu natmun ayalqa tamalkuan; murilkelluku-llu amllilqa tamalkuan, tumellrenka tuaten yuvrirluki.

²⁸Taumek ciqumelrianga muragatun arumalriatun, aturatun ciissiaraat 'lumarranek nertulit nerellracetun.