Read Yupik Job 14 Bible Online

Job 14 - Yupik bible

Job 14

¹Yuk arnamek yuurtelleq yuunerkituq, picurlautai-llu amllerrluteng.

²Naulartuq naucetaatun nalaluni-llu; ayalartuq talinertun, catairulluni-llu.

³Agayun, tangerqatanritarpenga-llu-qaa, wall'u-qaa cuqcivigmun ayaullua qanercetaarciqerpenga?

⁴Menuilnguq watqapik piurrngaituq kingunerluni menuulriamek yuum menuulauciatun pitalriamek.

⁵Ernerkiurumaan tuaten pitalrianek, iralut-llu atu'urkai cuqingaluki, engelkaa-llu taqumaan pellugciigalkii.

⁶Ulurru, ilangcivkenaku uitasgu, nunaniryuuteknaurai erneni caliskartun.

⁷Napa kep'ngermi cali nauyugngauq; unguiryugngauq naugaariyugngaluni.

⁸Mimernai ak'allaurteng'e'rmeng, acilqurra-llu arullrung'e'rmi nunami,

⁹mequinermek pingqerquni naugiciquq avayangluni nutaan naugaaralriatun.

¹⁰Tau͡gaam yuk tuquaqami unguvii iquklit'lartuq; tuquaqami natmun ayalarta?

¹¹Nanvatun meriutellriatun, kuigtun-llu meriulluni kinelriatun,

¹²tuaten-llu yuk tuqulartuq maktenqiggngaunani. Qavarciquq tupayuunani qiliit piunrirnatkaatnun; cerr'irngaituq-llu qavamini.

¹³Tua-i-tuq wiinga-llu iirnga tuqumalriit nuniitnun, iirumavkarlua eq'uqengqallerpet pellugnatkaanun, cuq'lirluku tuantellerkaqa, tauna nallaiqan neq'akarkaulua.

¹⁴Yuk-qaa tuqurraarluni cali unguvanqigcugngauq? Wiinga tau͡gaam utaqalgirciqua cat utumarillerkaatnek, utaqaluku mat'um nangteqnarqellriim iquklitlerkaa.

¹⁵Nutaan-llu elpet qayagaurciquten, wiinga-llu kiuciqamken, elpet-llu ilukegcitkeciqerpenga, elpet piliaqngavnga.

¹⁶Nutaan-llu murilkeciqan piyualqa tamalkuan, assiilnguunka tau͡gaam murilken͞gaunaki.

¹⁷Assiilnguunka au͡g'ariciiqaten qemaggluki-llu kalngagmun nepuyucirluku; alarqaqellrenka tamalkuita perrirciqaten.

¹⁸Ingrit igtelartut ciqumluteng-llu, teggalquq-llu uitallminek au͡gaumaluni;

¹⁹mer'em teggalqut nanglarai; ellarviim-llu nunam marayaa atertaqluku; tuaten-llu elpet yuum neryuniurutii unguvallerkaanek piunrirtelaran.

²⁰Cirlak'laran nangyuilngurmek, tuqulartuq-llu; kegginaan elucia cimirluku tuquvkalaran.

²¹Irniari takarnarqucingelartut, elliin tau͡gaam nallularaa, cali-llu caunrilkumangraata elpekumayuunaku.

²²Tememi tau͡gaam nangteqellra elpekumalaraa, tuquillertun-llu ellminek tau͡gaam angniilutkelartuq.