Read Yupik Job 15 Bible Online

Job 15 - Yupik bible

Job 15

¹Tua-llu Eliphaz-aaq Temanite-aq kiuguq:

²Job-aaq, angun-qaa umyuartulria kiugarkauguq qanrucirluni caunrilngurnek?

³Umyuartulria yuk qalarrngaituq elpetun ellminek-llu anagyaaqulluni picimitun qalarrluni.

⁴Umyuan aturluku pikuvet, kia qigciksanritaa Agayun; kina-llu piicalaryanrituq elliinun.

⁵Assiinak yuucin nallunaituq qanllerpegun; cucukngavgu qanlauciat yuut qanqayulriit.

⁶Qanerpet pinarqellriarurcetaaten, wiinga pinritamken; qanllerpet tamarmeng pinarqelriarurcetaatgen.

⁷Umyuartequten-qaa elpet ciuqlikacagauluten yuurtellruyukluten? Tuantellruuten-qaa Agayutem ingrit piliaqellrani?

⁸Niicugnillruan-qaa picirkiullrani Agayun? Yuum-qaa umyuartucia elpet kiivet pikan?

⁹Camek nallunrilkengangqercit wangkuta nallukengamten̄ek? Cat taringumasiki wangkuta taringumanrilkeput?

¹⁰Wangkuta umyuartucirput elitellruaput qiilingelrianek yugnek, yuullernek aatan yuurpailgan.

¹¹Carrartun-qaa pitauq Agayutem qaruyutai elpenun? Wangkuta qanenqegcaarturluta caqtaarpek'naki qanelput qalaruciitarput.

¹²Ciin umyuarpegun caaqerringasit, ciin-llu qenerrluten tangvacurlagcikut?

¹³Agayun qenrutan cangakuurluku tuaten.

¹⁴Caulriim yuk menuicugngaa? Wall'u-qaa yuk arnakun yuurtelleq ellualriaruyugngauq?

¹⁵Atam, Agayutem an'gilaqeng'e'rmiki ukvekenritai canganarqutaunaki pillerkaat; taukuunge'rmeng tangellrani menuitenrilnguut.

¹⁶Tua-llu-wa nutaan yuk uuminarqelria assiilngurtulria, yuk mel'alria assiilngurmek mertun pitarrluki!

¹⁷Nasviciiqamken, niicugninga; tangellrenka-llu qanrutkeciqanka.

¹⁸Taukut umyuartulriit piciulrianek elicetellruatnga elitellermeggnek ciuliameggnek, iirumalrianek-llu avaliinateng.

¹⁹Ellaitnun kiingita nuna cikiutekumallruuq; yugtaunani allamek iqlutmurutestekaatnek Agayutmek.

²⁰Assiitellria yuk qiperrlulartuq akngirniurluni ernerni tamaitni, allrakut aturluki taqumalriit takumcutailngurnun.

²¹Niiskengarluni nepualrianek alingnarqellrianek; uitayugcaliinanrani piunririlriim tekiciiqaa.

²²Neryuniurutaunani tan'germek anallerkaminek, ciunerkangqerrami nuussirpagmek tuqutestekaminek.

²³Yaqulget-llu tuqumalrianek tau͡gaam kemegtutuli[10] utaqalgirtut[11] temii tuqumalria nernaluku. Elliin-llu nallunritaa tan'germek tekitarkangqerrucini;

²⁴nanikuam ciinllugguaratem-llu cakneq alingevkaraak; cirlakuurluku, angayuqatun anguyagmun upingalriatun.

²⁵Unatni yagtellruamiki inglukluku Agayun, caunrilkelluku-llu Artuqailnguq,

²⁶Umyugaa quyigluni inglulilluni-llu; ciumuarluni capkutani naluumaluku curukarnaluku Agayun.

²⁸Uitaaqluni yuilngurni nunarpagni, enet piksagutaqluki pikestaita unitellrit qimagluteng, tau͡gaam anguyiim piunrirciqai tamakut nunarpiit enet-llu.

²⁹Ak'anun tukuungaituq; aklui-llu ak'anun piungaunateng. Talinra-llu tuaten tangrruunrirciquq,

³⁰tan'germek-llu anagngaituq; napayaartun naugaaralriatun ayuqeciquq kenrem avayai ekuakiicetun, naugillri-llu anuqem tengciiqai.

³¹Cacetuqutekinrilli caunrilngurmek, ellminek ukverrluni; camek akiliutii imangqerrngaituq.

³²Avayatun nalalriatun taqmigpailegmi ayuquq, naunqiggngairutellriatun.

³³Napayaartun ayuquq atsai igtellriatun aruvailegmeng, olive-aam-llu napaatun naucetaaminek igqarilriatun.

³⁴Agayutailnguut yuut kinguvengqerrngaitut, enet-llu piliaqellrit aassaqluteng akilirturiluteng kenerkun piunrirciqut.

³⁵Makut yuut imkuugut picirkiurraarluteng assiilngurmek calilriit, umyuangcarturalriit assiitellrianek.