Read Yupik Job 18 Bible Online

Job 18 - Yupik bible

Job 18

¹Tua-llu Bildad-aaq Shuhite-aq kiuguq:

²Job-aaq, yuut-qaa elpetun ayuqellriit nepaiteqayuunateng pilartut? Qanenrirluten niicugnikuvet, qalaruciiqamteggen.

³Cam umyuarteqevkartaten usviicukluta kuluvagtun?

⁴Elpenek tau͡gaam akngirtelartuten qenertellerpegun. Ellarpak-qaa yuin uniqurciqaat qenertellren pitekluku? Agayutem-qaa nugtarqeciqai ingrit umyuan cupuiresqelluku?

⁵Kenurraat assiitellriit yuut nepingaciquq; kenra-llu kumanqiggngaunani.

⁶Kenurraat pelatekaatni nipcimaciquq.

⁷Piyuapallilallrung'e'rmi, tau͡gaam maa-i paallagyarpiaralartuq; paallalartuq, ayuqucirtuutek'lallrin ellii pitaqluku.

⁸Ellminek ayuqucimikun kuvyamun naptelartuq;

⁹kapkaanaam pitaqelaraa kitngiakun, au͡g'arciiganaku-llu tegumiaqluku.

¹⁰Nunam qaingani negaq iirumauq; kapkaanaak civcimalutek tumyaraanun.

¹¹Alingnarqelriit tamiin avatiinek alingevkaraat, maligqurluku amllillra tamalkuan.

¹²Kaigem piniarutaa; picurlak-llu upingaurtuq paallacalkallerkaanek.

¹³Naulluutem qaingan amia neraa, tallik iruk-llu tuqum nerluki.

¹⁴Mulngakevkenaku ayaucimauq pelatekamek uitanqegciluni uitallranek, ullaulluku-llu Tuqum Angayuqranun.

¹⁵Maa-i kina imna uitayugngauq pelatekaani sulfur-aamek kanverraarluku uitavillra menuircarluku.[12]

¹⁶Acilqurri camani nalaluteng, quliitni-llu avayai kinerluki.

¹⁷Yuut nunam qaingani nalluyagutaat, atra-llu qanruteksuunaku tumyarani.

¹⁸Egcimauq tanqigmek tan'germun, ellarpagmek ayagcecimaluni.

¹⁹Irniarituq kinguvrunani-llu yum'ini, uitavikellrani-llu kitumek pitaituq uniskiinek.

²⁰Tamarmeng yuut calarami uitalriit kanaknermi-llu niicestai nanikuagut, alingluteng qiivut uuleggluteng-llu.

²¹Tuaten ayuqellriamek ciunerkangqertut yuut assiilngurtulriit, ciunerkaqluku Agayutem caukenritestain.