Read Yupik Job 19 Bible Online

Job 19 - Yupik bible

Job 19

¹Tua-llu Job-aq kiuguq:

²Qaillun pitalriamek nangteqatarcecia, navgurlua-llu itumllua qanllerpeciuggun?

³Pulengtaarluci ikiaralararpecia, kasnguyuksaunaci-llu nangcillerpecen̄ek wangnek.

⁴Ilumun-llu wiinga alartellrukuma, qaillun tamatum akngirtaci?

⁵Ilumun-llu elpeci umyuarteqkuvci assinruyukluci wangni, umyuartequlluki-llu nangtequtenka nallunairuteksukluki pinarqelriarucimnun.

⁶Watua nallunriciu Agayutmun nangteqevkauciqa, kuvyaminek-llu caqulua.

⁷Qayagpagtua, Nangtaanga! tau͡gaam kina niicugninrituq; kia niitenritaa qayagauralqa ikayurcetaarlua.

⁸Agayutem tumkaqa capaa, kiturciigatua-llu; tumkaqa-llu tan'geriluku.

⁹Uayallruanga tamalkuitnek tukuutemnek piunrirluku-llu elluarrlua niitnaulalqa.

¹⁰Nangtaanga naken tamiinek. Wiinga-llu caitairutua, neryuniurutka qecugluku napatun unillua-llu nalalua tuqusqellua.

¹¹Agayutem caknerpak qenrutaanga; inglumi arcaqanracetun elliullua.

¹²Anguyagten̄i ayagcetai anguyaasqellua, ilutulrianek elagluteng avatairluku-llu pelatekaqa.

¹³Agayutem anelgutenka ayagcetai wangnek yaaqvanun, nallunrilkenganka-llu allanertun ayuqliriluteng.

¹⁴Tungayiinka yugnikek'nganka-llu tayima catairutut.

¹⁵Allanrulallret-llu enemni nalluyagutaatnga; arnat-llu pistem̄a allanertun ilakumanrilngurtun ayuqliullua,

¹⁶Pisteka qayagauraqamni, kiuyuitaanga taqsuariutengramni-llu ikayuusqellua.

¹⁷Cumacinariunga nuliamnun, pellernarilua anelgutemnun.

¹⁸Mikelnguunge'rmeng-llu caunrilkelaraatnga temciarautekaqlua; nangertaqama picingssautek'laraatnga.

¹⁹Canimenaki yugnikek'ngama eq'uyagutaatnga, kenkenruluki-llu pilallma ingluksagullua.

²⁰Enrenka neputut amimnun kememnun-llu, anaktararallruunga-llu unguvaviluarlua.

²¹Takumcukicia, takumcukicia, yugnikek'ngamni, Agayutem unatiin yagglua iqutaanga.

²²Ciin nangcecia Agayutem nangtellruciatun? Nangcillerci-qaa wangnek amlleriksaituq?

²³Kia-tuq qanellrenka neq'akliki igaulluki-llu kalikarnun!

²⁴Wall'u iqukeggutekun canaulluki qanellrenka teggalqumun igaulluki akwarpak piuyalriit.

²⁵Nallunrilamku Anirturtema unguvacia, nangertarkauguq-llu nunam qainganun.

²⁶Amiqa-llu naulluutem nangellrungraaku temtuumarma Agayun tangerciqaqa.

²⁷Tangerciqaqa iigemkun, elitaqciqaqa-llu, Caceskelli'irtua qanravet,

²⁸“Qaillun nangciiqseta?” cali-llu, “Nangteqellra Job-am elliinun tau͡gaam tusngauq.”

²⁹Tau͡gaam watua alingici nuussirpagmek, nuussirpagmek taitellriamek Agayutem eq'uqertiinek assiilngurmun, nallunritesqelluci cuqcistem̄ek pitangqerrucia.