Read Yupik Job 20 Bible Online

Job 20 - Yupik bible

Job 20

¹Tua-llu Zophar-aaq Naamathite-aq kiuguq:

²Job-aaq, umyuaqa nall'artenritan. Waniwa utaqasciigatua kiunalua.

³Niitua cangakuurutmek tamatum-llu umyuaqa assircetenritaa, tau͡gaam nallunritaqa qaillun kiullerkan.

⁴Ilumun nallunritan ak'allarnek pellullernek, yuk piurteqarraallranek ayagluni,

⁵angnirpalallrat assiitellriit yuut nanilucia, agayutailnguut-llu carrarmi tau͡gaam nunaniryulauciat.

⁶Sugturiyaaqsartuq qilak tekilluku, sugtum-llu ugaani qamiqurran amirlut tekilluki,

⁷tau͡gaam urr'atun tengciiqaa. Nallunritestellri-llu paqnayugciqut natmun ayaucianek.

⁸Qavangutun catairuciiquq, tangrruarullertun unugmi, tangrrunqiggngaunani.

⁹Tangertek'lallrin tangenqiggngaitaat, uitavimini-llu uitanqiggngaunani.

¹⁰Irniarin-llu atameng teglegallrit arrsaulrianek uterceciiqait.

¹¹Temii-llu ayagyualriatun segganqeggsaaqeng'e'rmi, ak'anun pivkenani urraurciiquq.

¹²Assiilnguq neqnirqeng'ermi qanrani, igevkenaku-llu ilii

¹³uitaurcetengraani qanmini neqnirqellranek assikiluni,

¹⁴aqsaqruani iluliqnarqelriarurtelartuq, cungarninaqluni tuqunarqelria pilauciatun.

¹⁵Iglarai teglegamikun tukuurutkellni miryarluki-llu; Agayutem antelarai aqsaqruanek.

¹⁶Assiitellriim yuum igellra tuqunarqelriatun ayuquq; tuqutelaraat ciissirpiim tuqunarqelrialgem keggellracetun.

¹⁷Tangerrngaitai kuiget olive-aat uquatnek imalget, kuiggaaraat-llu carvanilriit milegmek evegtaat-llu neqkautiitnek.

¹⁸Uterceciiqai tamalkuita cakviurutekluki unangkengallni, tukuutmi nunaniryuuteklerkaat pillerkangqerrngaituq,

¹⁹tua-i-wa nangcilriarullruami ikayuyuitellruamiki-llu arrsaulriit, tegutaqluni-llu enenek pilialqenrilkem̄inek.

²⁰Piksugiillmikun camircesciigalami camek aninqiyuituq angniutekaminek.

²¹Ner'aqami ilakuiyuituq, taumek ak'anun tukuutai uitangailnguut.

²²Tukuurteqapigtellran nalliini nangteqnaq tuknilria elliinun tuciiquq.

²³Aqsaqrua camirtesqelluku Agayutem angelria eq'urtellni elliinun tuc'eciiqaa, eq'uqertiinek nerelriatun ayuqerkauluni.

²⁴Qimagyaaqekuniu cavik nuussiq; pitegcautem punernermek cingilelgem iquciiqaa.

²⁵Pitegcaun kapusngaluni akmaciluku, qevleqtaalria pitegcautem cingilga anumaluni tumekluku cungaa, alingem-llu tull'uku.

²⁶Tamarmeng qelkaallri piunriumaut; kenrem yuum kumartelqenrilkiin ekuaciqai pelatekaani-llu uitalriit tamalkuita.

²⁷Qiliit qanrutkeciqait assiilngui, nunam-llu apervikuatekciqaa inglulirluku.

²⁸Tamarmeng tukuutai aterciiqut, aterrluki erenrani Agayutem eq'urtellran.

²⁹Waten ayuqellriamek ciunerkangqertut assiitellriit yuut, tua-inguuq Agayutem tekitarkiuraa elliinun.