Read Yupik Job 21 Bible Online

Job 21 - Yupik bible

Job 21

¹Tua-llu Job-aq kiuguq:

²Murilkelluki qanellrenka niicugniqerciki, kiingan taumek qaruyutmek elpecen̄ek piyuutengqertua.

³Patagtuutevkenii qalarcecia, qalarcimarikuma piyukuvci picingssautekniarpecia.

⁴Yugnun qanemyuugauteka pinrituq, elluatutun pitengqerrlua nerinisngialliqua.

⁵Atam tangerqercia. Ayuqucima-qaa tangellran tatamlluci qanerkaunaci tangvagcetenritaaci?

⁶Umyuaqaqamku waten ellilqa cacirkaitelartua, uulegtaqlua qaika-llu qiivluni.

⁷Ciin Agayutem assiitellriit yuut unguvavkalartaki, ak'allaurcetaqluki camek nuuqitevkenaki.

⁸Irniarluteng tutgarluteng-llu, yuugaqluteng-llu tangvagluku anglillrat.

⁹Enemeggni uitaaqluteng alingniuyuunateng, Agayutem-llu anucimirqecetaayuunaki.

¹⁰Pinariaqateng kuluvautait arnacalut tamarmeng qingalartut, irniuraraqluteng-llu arenqiallugtevkenateng.

¹¹Irniarit aquigaqluteng qusngiyagartun

¹²yuraraqluteng-llu aturcetaaraqata cupu'uryaratgun qelutelegteggun-llu.

¹³Yuugaqluteng camek nuuqitevkenateng, qinuunateng-llu yuunriraqluteng nangteqevkenateng.

¹⁴Qanrutaqluku Agayun, “Wangkutnek ayii! Piyuutekenritarput nallunritellrat piciryararpet.

¹⁵Cauga Artuqailnguq, wangkutnun kevgiuresqumaluni? Camek-llu unangeciqseta piicagvikekumteggu?”

¹⁶Qanlartut piluaqalarniluteng cakviullermegteggun, tau͡gaam umyuarteq'lallrat wiinga maligngasciigataqa.

¹⁷Assiitellriim-qaa yuum tanqia nipcimaqaqsaituq? Iliit-qaa picurlagmun tekiteqaqsaituq? Agayutem-qaa qenerrluni anucimirqecetaaqaqsaitai yuut assiitellriit

¹⁸canegtun-llu anuqmun tengcelluki, wall'u urr'artun anuqerpiim ayagaskiitun?

¹⁹Elpet qanertuten Agayutmun mikelnguq anucimirqecetaalarniluku atiin assiilngillri pitekluki. Qang'a! Agayutem anucimirqecetaarliki ellait assiilngillret; nallunrirtelluki ellaita assiilnguit pitekluki anucimirqecetaalarniluki.

²⁰Assiilngiumalriit quglitgu ellaita anucimirqecetaaruceteng; elpekluku-llu eq'uqertii Artuqailnguum Agayutem.

²¹Yuut ciin umyuarniuruteksartatki qaillun kingunermeng ayuquciat iralurtarkiurameng amllertacirkait nang'aqata?

²²Yuum-qaa elitnauryugngaa Agayun, pakmani-llu uitalriarung'e'rmeng cuqcestiit?

²³Yuum ilii tememikun piniinanermini tuqulartuq; angniinanermini cakviurutaunani-llu tuqulartuq,

²⁴temii nerqeluaqaumaluni.

²⁵Ilii-llu tuqulartuq yuucimikun angniutaunani, uigtuaqallruvkenani assilriamek.

²⁶Tamarmeng ayuqluteng tuqulartut tungmagcimaluteng-llu, tamarmeng paralut patumaluki.

²⁷Umyuartequcin akngircugyaaqlua nallunritaqa.

²⁸Elpet aptuten, “Nauwa-mi atanirturilriim enii? Nauwa-mi pelatekaq assiitellriit uitaviat?”

²⁹Apqauqsaitelaraten-qaa yuut ayagatulit allanun nunanun, ukveksuitaten-llu-qaa qanemciit

³⁰tuani ernermi Agayun qenerrluni anucimirqecetaariaqan, yuk assiitellria qaillun pimaksaitniluku?

³¹Kitumek pitaituq yuum assiitellriim pinarqut'lirtekaanek wall'u akinaurtekaanek tamalkuita elliin caliallri pitekluki.

³²Qungurvigmun ayaucimaaqan, qunguanun cumikluku nayurtelegmun,

³³yugugaat maligtelarait ayaucilriit, nuna-llu tungmagingaviani assirluni.

³⁴Qaillun-mi tua-i elpeci caceturqaurciqsecia camek imailngurteggun? Tamarmeng kiuceci iqluurutnguut!