Read Yupik Job 24 Bible Online

Job 24 - Yupik bible

Job 24

¹Ciin Agayutem pillerkiqsaitau cuqcillerkaq, ernermi tuani cuqcimallerkaat kevgiurtain?

²Yuut nugtartelarait nunautet engelait nunauceteng piitnek ilanaluki; teglelartut qusnginek, ilaulluki-llu katngautmeggnun.

³Tegutelartut ciulvagnek elliraat piitnek, teguigaqluku-llu aipaineq kuluvautiinek akiilnguirnatkaanun.

⁴Arrsaulriit calligtelarait tumyaranek; arrsaulriit-llu qimagaluki iiravkaraqluki.

⁵Taumek arrsaulriit yuilqum ciulvaitun, yuaqcaaralartut neqkameggnek mertailngurmi yuilqumi; naken allamek irniateng neqkaitnek nataqutesciiganateng.

⁶Avulartut naucetaarvigni pikenrilkemeggni,[13] avuraqluteng-llu unitallernek wine-arkanek atsanek yuut assiitellriit naucetaarviitnek.

⁷Unugmi qavalartut uligkaunateng maqarqutkaunateng nengelmi.

⁸Ellalluum ingrinun tut'ellriim mecungtelarai, qiuret-llu caniitni uqitarassaagaqluteng allamek uqisvigkailameng.

⁹Assiitellriit yuut pisteksagutelarait aatailnguut mikelnguyagaat teguaqluki-llu irniarit arrsaulriit akiilnguitnun akiliutekevkarluki.

¹⁰Arrsaulriit ellamun anlartut matarmeng aturaunateng; kaigluteng tuaten quyurciaqameng mukaarkanek.

¹¹Olive-aanek ciamlluki uquirilartut, atsanek-llu wine-arkanek, tau͡gken ellait meqsuagaqluteng.

¹²Nunarpiit iluatni kiliumalriit tuquqatalriit-llu qayagpagaut, tau͡gaam Agayutem ilangciksaitai piicautait.

¹³Yugnek pitangqertuq tanqik qessakekiitnek; taringumanritaat, maligcuunaku-llu natmun ayallra.

¹⁴Tuqutarayuli erpailgan maktelartuq tuqucinaluni arrsaulrianek; unugmi-llu tegliuraqluni.

¹⁵Akusrarutekituli utaqalgilartuq tan'geraarallerkaanek; qanerluni, “Kia tangerrngaitaanga”, kegginani-llu patuluku elitaqesqevkenani.

¹⁶Unugmi tegliulriit enenun navguulluteng it'lartut, erenrani tau͡gken iirumaluteng tanqigmun-llu anyuunateng.

¹⁷Tan'gercetqapigtellria ellaitnun unuakuuguq; yugnikngamegteki-wa alingnarqelriari tan'gercetqapigtellriim.

¹⁸[14]Assiitellriit yuut ulem ayautai, nunautiit-llu Agayutem aniqlaatiin aciantuq; caliyarturnanrirluteng naucetaarvimeggni.

¹⁹Qanikcaq catairut'lauciatun kiirmi ellaliyuitaqan-llu, tuaten-llu assiilngiumalriit catairut'lartut unguvalriit nuniitnek.

²⁰Aanakengraiceteng-llu watua umyuaqsuirutait; temait-llu paralut nerluku, piunriumaluni-llu napatun iqumalriatun.

²¹Tuaten pilartut nangcilaata aipainernek takumcuksuunaki-llu irniangyuilnguut arnat.

²²Agayutem, pinimikun, piunrirtelarai pinilriit; Agayun piaqan—assiitellriit yuut tuquluteng.

²³Agayutem elluiluku yuuvkararkauyaaqaa, tau͡gaam kesianek murilkuralaraa.

²⁴Carrarmi assiitellriit yuut elluilartut, tau͡gaam nalalartut carangllugtun, mukaarkat kangricetun kepumallertun.

²⁵Man'a piciunrilkan, kia asguranairyartanga iqlungalriarunilua? Kia-qaa asguranairyugngai qanellrenka piciunritniluki?