Read Yupik Job 27 Bible Online

Job 27 - Yupik bible

Job 27

¹Job-am-llu qalartellni ayagninqigcamiu qanertuq:

²Agayun unguvaciatun, elluarrlua cuqcimallerkamnek allurcesteka, Artuqailnguq-llu, unguvama cungaqisngavkartii;

³Agayutem anernermek cikiumallran taktaciatun

⁴qerrlugka watqapik assiitellriamek qanerngaituk, alungutka-llu watqapik iqlungaituq.

⁵Wiinga qanerngaitqapigtua qanllerci piciuniluku; aguagutkeciqaqa pinarqutailuciqa tuqullerkaqa erneq tekilluku.

⁶Tegumiaqeciqaqa elluaruciqa, peggngaunaku-llu; umyuama kasnguyugcecuitaanga iliitnek erenret atullma.

⁷Tamarmeng ingluliurtenka callugtenka-llu anucimirqecetaarumakilit yugtun assiitellriatun elluanrilngurtun-llu.

⁸Camek neryuniurutkangqertat agayutailnguut Agayutem unguviit tegukaku?

⁹Agayutem-qaa niiciiqaa qayagauqan, picurlagnarqelriim tekiskaku?

¹⁰Piksuumikellrulitgu kitak angniq elliin cikiutek'laqii: taqsuunateng kitak piicalallrulit elliinun.

¹¹Elitnauqernaamken qaillun angtacianek Agayutem pinian, nalqiggluku-llu Artuqailnguum Agayutem picirkiuraa.

¹²Tau͡gaam, qang'a, tamarpeci tungaunaku tangellruarci; ciin-mi tua-i caunrilngurnek qalarceci?

¹³[19]Artuqailnguum Agayutem waten anucimirqecetaalarai assiitellriit, nangcitulit yuut.

¹⁴Qetunraliryaaqeciquq, tau͡gaam tamarmeng tuqucimaciqut anguyagkun; irniarit-llu camirrluteng neryuitut.

¹⁵Tuqutaullrunrilnguut cangerlagkun tuquciqut, nulirqellrungraiceteng-llu angniilutekngaitaat tuqullrat.

¹⁶Assiitellriit yuut quyurciyaaqeciqut qerrirlinek urr'artun pitarrluki, pengiluteng-llu aturanek qikutun pitarrluki;

¹⁷pengiyaaqeciqai, tau͡gaam elluarrluteng yuulriit aturciqait, pinarqutailnguut-llu avenqegciiqait qerrirlit.

¹⁸Assiitellriit yuut enelilartut negairet kuvyaicetun ayuqelrianek wall'u uqisviggartun pistem naucetaarviim nayurtiin piliallratun.

¹⁹Nangneqlirmek inarciiquq tukuulriaruluni, tupakuni maaten piciquq imkut tukuutai tayima.

²⁰Alingem tuciiqaa alqunaq ulqertellriatun; anuqem unugmi tengciiqaa.

²¹Calaramek anuqem tengciiqaa eniinek;

²²anurvauciiqaa takumcukevkenaku pinertutacirramitun qimangnaqnginanrani.

²³Anuqa culu'uggluni aqvaqullrani, alingevkarluku piunririlriamek piniminek.