Read Yupik Job 28 Bible Online

Job 28 - Yupik bible

Job 28

¹[20] Mine-artangqertuq elagvignek qerrirlimek; Suulutaam avurrluirviinek pitangqertuq.

²Cavik nunam akuliinek tegumalartuq, kavirliq-llu cavik uruggluku teggalqunek tegumaaqluni.

³Mine-aliurtet yuvrialaraat tan' gercetqapigtellria. Yuarvik'larait nunam et'uqri Elagaqluteng-llu teggalqunek tan'germi.

⁴Yuut uitaviata yaaqsikiini Wall'u yuum it'gain ayagviksuilkiitni, Elalartut amiguyuitnek mine-at. Tamaani calilartut alianarqellriami, Ilavkugnek agaluteng elanret iluatni.

⁵Nunamek neqkat naulartut, Tau͡gaam tamatum nunam acia Navguumalartuq ciamcimaluni-llu.

⁶Nunam teggalqurri teggalquqegtaarnek sapphire-aanek pingqelartut, Urraa-llu suulutaartangqerraqluni.

⁷Qakurtat tangyuitait tumyarat mine-anun, Yaqulgem-llu falcon-aam iigken tangeqsaitaa.

⁸Yugtutulim wall'u allam alingnarqelriim ungungssim Watqapik tamakut tumyarat egilraviksuitait.

⁹Mine-aliurtet elalarait teggalqut tegqapigtengraata, Elagaqluteng ingrit aciitgun.

¹⁰Iteryariaqameng teggalqut ukilluki, Nataqut'lartut teggalquqegtaarnek.

¹¹Elalartut kuiget kangiit tekilluki, Iirumallret-llu nallunrircetaqluki.

¹²Nani-mi umyuartuneq nalaqumaciqa? Nani eliciiqseta taringyaramek?

¹³Umyuartuciq nalaqumangaituq yuut akuliitni; Yuum nallua qailluqapiar akitutacia.

¹⁴Imarpiim et'uqri Qanertuq umyuartuneq tamaani nalaqumayuitniluku.

¹⁵Kipucimasciigatuq qerrirlimek wall'u suulutaamek akilirluku.

¹⁶Suulutaaqegtaaraam teggalquqegtaaraat-llu pitacirciigataat akia.

¹⁷Akitunruuq suulutaami, Assigtami-llu suulutaarrlainarmek pilimalriami wall'u cikunguaqegtaarmek.

¹⁸Akitutacia umyuartunrem amllenruuq Coral-aani wall'u crystal-aani wall'u ruby-ni.

¹⁹Assinqukacagiit topaz-at avurrluitqapiaralria-llu suulutaaq Pitassiarucunaituq umyuartunrem akianun.

²⁰Naken-mi tua-i umyuartuneq pilarta? Nani-llu taringumayaraq uitaa?

²¹Umyuartuneq unguvalrianun tamalkuitnun iirumauq, yaqulgung'e'rmeng-llu tangerciigataat.

²²Tuqu tuaten piunririyaraq-llu Qanerlutek qanrutkumallrani tau͡gaam niitellruniluku.

²³Agayutem kiimi tumyaraq nallunritaa, Nallunritaa nani nataqumalaucia umyuartunrem,

²⁴Tua-i-wa nuna tangviimiu iquanek ayagluku iquanun, Tangvagluki-llu cat tamalkuita qiliim acianelnguut.

²⁵Agayutem anuqa tuaten tuknitaarkaurcetlerminiu Taqlerminiu-llu angtacirkaa imarpiim;

²⁶Agayutem cuqkiullerminiu natmun ellalluk igtarkaucia, Kalluk-llu tumkiullerminiu;

²⁷Tuani tau͡gaam tangellrua umyuartuneq naspaaluku-llu qaillun pitallra, Elliin elluakellrua.

²⁸Agayutem-llu yuk qanrulluku, “Umyuartuyukuvet, qigcikarkaugan ATANEQ, Taringyaurcukuvet, assiilnguq tunutarkaugan.”