Read Yupik Job 29 Bible Online

Job 29 - Yupik bible

Job 29

¹Job-aq cali qanenqigtuq.

²Unguvaka-tuq ataam Agayutem murilkellran nalliitun ayuqli.

³Tamatum nalliini kesianek Agayutem nayurturalallruanga, tanqigmek-llu cikiumaaqlua piyuagaqama tan'gerkun.

⁴Tamakuni ernerni piluaqerlua yuullruunga, Agayutem-llu yugnikutiin cayailkuciumaluku eneka.

⁵Artuqailnguum Agayutem nayullruanga tamatum nalliini, tamarmeng irnianka avatemni uitaluteng.

⁶Kuluvautenka qusngiutenka-llu milegmek amllermek piaqluteng, napautenka-llu olive-aat naugaqluteng teggalqulinqurrarmi nunami.

⁷Nunamta ciulirnerit quyurtaqata ilalirluki aqumaqama,

⁸ayagyuat avitelaraatnga egmian tangrraqamegten͞ga, angukaraat-llu nangertaqluteng qigcikutmek pilua.

⁹Yuut ciuliqagtait qanenermek taq'aqluteng;

¹⁰angutet-llu takarnanqukacagait nepaunateng uitaaqluteng.

¹¹Tamarmeng tangertenka wall'u niitestek'lallrenka qanerkangqelartut assilrianek cat caliallrenka piluki.

¹²Arrsaulriit qayagaaqata, ikayulallruanka; ikayulallruanka elliraat allamek ikayurtekailnguut.

¹³Yuut nangteqeqapigteng'e'rmeng nanralallruatnga, ikayulallruanka-llu aipainret nanikuanrirtelluki.

¹⁴Kesianek elluarrlua, pitalqegglua-llu piuralallruunga.

¹⁵Cikmiumalriit iikellruatnga piyuasciigalnguut-llu it'gaqlua.

¹⁶Arrsaulriit atakellriatun ayuqellruatnga, allanret-llu qanercetaarvigmi anagyaaqut'lallruanka.

¹⁷Piunrirtelallruanka piniit nangcitulit angutet anirturaqluki-llu nangtaarit.

¹⁸Wiinga neryuniurutkuralallruaqa unguvamallerkaqa, elluilua-llu enemni tuqullerkaqa.

¹⁹Napatun ayuqellruunga acilqurri mermek nuuqitenrilngurtun, avayai-llu unuakumi mecunguralriacetun.

²⁰Yuut tamarmeng nanrarturalallruatnga, pinialiyuunii-llu.

²¹Ayuqucirtuutnek qalarutaqamteng, yuut nepaitelallruut niicugninqegcaarluki-llu qanellrenka.

²²Qalarrnermek taq'aqama camek ilaviitelarait qanellrenka. Qanellrenka ellallugtun ellaitnun meciutaqluteng;

²³tamarmeng ciuniulallruit nauceciiyurtet quyakelauciacetun ellalluk up'nerkami.

²⁴Quuyuarautelallruanka caceskitaqata kegginama angnillran eguaqularai.

²⁵Ataniularanka pillerkiuraqluki-llu; Ciuliqagtelallruanka angayuqam anguyagten̄i ciuliqagtelauciatun, qarutaaraqluki-llu nanikuallratni.